نجی ٹی وی کی رپورٹ کے مطابق اسلام آباد پولیس کی جانب سے سابق وزیراعظم عمران خان کے خلاف پہلے سے باعزت بری ہونے والے مقدمے میں نیا چالان عدالت میں جمع کرا دیا گیا، عدالت نے پہلے فیصلے کی بنیاد پر کیس کو داخل دفتر کر دیا۔
اسلام آباد کی ڈسٹرکٹ اینڈ سیشن کورٹ میں کیس کی سماعت جوڈیشل مجسٹریٹ شہزاد خان نے کی جب کہ بانی پی ٹی آئی کی جانب سے ان کے وکلاء سردار مصروف خان اور زاہد بشیر ڈار عدالت پیش ہوئے۔
دوران سماعت بانی پی ٹی آئی کے وکیل سردار مصروف خان ایڈووکیٹ نے مؤقف اختیار کیا کہ یہ عدالتی تاریخ میں پہلی بار دیکھنے میں آ رہا ہے کہ کسی ملزم کو بری کیے جانے کے بعد اسی کیس میں چالان دوبارہ عدالت میں پیش کر دیا گیا ہے۔
وکیل بانی پی ٹی آئی نے مزید کہا کہ اسی کچہری میں عدالت پہلے ہی سابق وزیراعظم عمران خان کو بری کر چکی ہے، اس پر جج شہزاد خان نے ہدایت دی کہ پہلے والا عدالتی حکم پیش کیا جائے تاکہ ریکارڈ کا جائزہ لیا جا سکے۔
بعد ازاں بانی پی ٹی آئی کے وکلاء نے بریت کا آرڈر عدالت میں پیش کیا، جس پر عدالت نے ریکارڈ کا تفصیلی جائزہ لیا اور نئے چالان والے کیس کو داخل دفتر کر دیا۔
واضح رہے کہ آزادی مارچ کے سلسلے میں اسلام آباد کے تھانہ ترنول میں درج مقدمہ میں بانی پی ٹی آئی عمران خان کو نامزد کیا گیا تھا۔
