واٹس ایپ میں ایسے متعدد فیچرز ہیں جو آپ کو اپنے پیاروں، دوستوں یا دفتری ساتھیوں سے جڑنے میں مدد فراہم کرتے ہیں۔
مگر لاتعداد گروپ چیٹس، چینلز اور کمیونٹیز کا حصہ بننے کے بعد تمام میسجز کو غور سے پڑھنا بہت مشکل ہو جاتا ہے جس کے باعث کئی بار اہم پیغامات پڑھنے سے رہ جاتے ہیں۔
اس مسئلے کا حل میٹا کی جانب سے ایک نئے فیچر کی شکل میں پیش کیا جا رہا ہے۔
WABetaInfo کی ایک رپورٹ کے مطابق واٹس ایپ کی جانب سے ایک نئے ٹول پر کام کیا جا رہا ہے جو متعدد ان ریڈ (unread) میسجز کی سمری فراہم کرے گا۔
اس فیچر کا مقصد ان افراد کو مدد فراہم کرنا ہے جو متعدد چیٹ گروپس کے رکن ہوتے ہیں اور اکثر متعدد میسجز پڑھ نہیں پاتے۔
رپورٹ کے مطابق فیچر کی خاص بات ہی یہ ہے کہ صرف کسی ایک چیٹ کی بجائے آپ متعدد ان ریڈ میسجز کو سلیکٹ کرکے ان کی سمری حاصل کرسکیں گے۔
رپورٹ میں مزید بتایا گیا کہ اس کے لیے پرائیویٹ پراسیسنگ نامی ٹیکنالوجی کو استعمال کیا جائے گا تاکہ واٹس ایپ یا میٹا اوریجنل میسجز یا اے آئی سے تیار کردہ سمریز تک رسائی حاصل نہ کرسکیں۔
رپورٹ میں بتایا گیا کہ یہ فیچر ان چیٹس پر کام نہیں کرے گا جن میں ایڈوانسڈ چیٹ پرائیویسی کو ان ایبل کیا جائے گا۔
ابھی اس فیچر کے بارے میں کافی تفصیلات سامنے نہیں آسکیں جیسے یہ واضح نہیں کہ چیٹ سمری کو اسی چیٹ کے یوزر انٹرفیس میں ڈسپلے کیا جائے گا یا الگ میٹا اے آئی چیٹ اوپن ہوگی۔
یہ فیچر ابھی واٹس ایپ کے بیٹا (beta) ورژن میں دیکھنے میں آیا ہے۔
تو یہ کہنا مشکل ہے کہ اسے کب تک تمام صارفین کے لیے متعارف کرایا جا سکتا ہے۔
