پشاور: محکمہ موسمیات نے آج سے ملک بھر میں شدید گرمی کی لہر کی پیشگوئی کرتے ہوئے خبردار کیا ہے کہ پشاور سمیت خیبرپختونخوا کے بیشتر میدانی اضلاع میں موسم انتہائی گرم اور خشک رہے گا۔
دوسری جانب سوات، دیر، چترال اور دیگر بالائی اضلاع میں چند مقامات پر گرج چمک کے ساتھ بارش متوقع ہے۔
محکمہ موسمیات نے مزید پیشگوئی کی ہے کہ آئندہ چند روز کے دوران خیبرپختونخوا بھر میں گرمی کی شدت میں مزید اضافہ ہوسکتا ہے، جبکہ پشاور، مردان، صوابی، چارسدہ اور ڈیرہ اسماعیل خان سمیت دیگر میدانی اضلاع میں درجہ حرارت 46 ڈگری سینٹی گریڈ تک پہنچنے کا امکان ہے۔
محکمہ موسمیات کے مطابق اسلام آباد، شمالی پنجاب اور بالائی خیبرپختونخوا میں 10 جون تک گرمی کی شدت برقرار رہنے کا امکان ہے، جبکہ 11 اور 12 جون سے موسم میں تبدیلی متوقع ہے۔
محکمہ موسمیات کا کہنا ہے کہ اسلام آباد اور شمالی پنجاب کے مختلف علاقوں میں شدید گرمی کا سلسلہ جاری رہے گا۔ بالائی خیبرپختونخوا کے اضلاع بھی گرمی کی لپیٹ میں رہیں گے۔
واضح رہے کہ نیشنل ڈیزاسٹر مینجمنٹ اتھارٹی (این ڈی ایم اے) نے پیشگوئی کی ہے کہ 11 اور 12 جون کو خیبرپختونخوا اور شمالی پنجاب کے مختلف علاقوں میں بارش کا امکان ہے۔ راولپنڈی، لاہور اور دیگر اضلاع میں بھی گرج چمک کے ساتھ بارش متوقع ہے۔
محکمہ موسمیات کے مطابق پشاور، سوات، چترال، مانسہرہ اور ایبٹ آباد میں 11 اور 12 جون کو بارش ہو سکتی ہے، جبکہ بلوچستان کے اضلاع ژوب اور موسیٰ خیل میں بھی گرج چمک کے ساتھ بارش کا امکان ظاہر کیا گیا ہے۔
ادھر کراچی، حیدرآباد، سکھر اور لاڑکانہ سمیت سندھ کے بیشتر اضلاع میں گرمی کی شدت برقرار رہنے کا امکان ہے۔
محکمہ موسمیات نے مزید بتایا ہے کہ گلگت بلتستان اور آزاد کشمیر میں 12 جون سے بارشوں کا سلسلہ شروع ہونے اور جاری رہنے کی توقع ہے۔
