چیئرمین پاکستان پیپلزپارٹی بلاول بھٹو زرداری نے گلگت بلتستان انتخابات کے نتائج پر ردعمل دیتے ہوئے کہا ہے کہ گلگت بلتستان میں “تیر کی بارش” ہوئی ہے اور پاکستان پیپلزپارٹی ایک بڑی سیاسی قوت کے طور پر سامنے آ رہی ہے۔
سماجی رابطے کی ویب سائٹ ایکس پر جاری اپنے بیان میں بلاول بھٹو زرداری نے کہا کہ ابتدائی نتائج کے مطابق پاکستان پیپلزپارٹی خطے کی واحد بڑی جماعت کے طور پر ابھر رہی ہے۔
انہوں نے اس کامیابی پر پارٹی کارکنوں اور جیالوں کو مبارکباد پیش کرتے ہوئے کہا کہ ان کی محنت اورعوامی رابطہ مہم نے مثبت نتائج دیے ہیں۔
بلاول بھٹو زرداری نے عوام کا شکریہ ادا کرتے ہوئے کہا کہ وہ ووٹرز کے اعتماد پر شکر گزار ہیں، ان کا کہنا تھا کہ عوام نے پیپلزپارٹی کے منشور اور قیادت پراعتماد کا اظہار کیا ہے جس کا احترام کیا جائے گا۔
چیئرمین پیپلزپارٹی نے مزید کہا کہ پارٹی گلگت بلتستان میں حکومت بنانے کی کوشش کرے گی اور عوامی خدمت کے مشن کو آگے بڑھایا جائے گا۔
انہوں نے اس عزم کا اظہار کیا کہ عوام کی توقعات پر پورا اترنے کے لیے ہر ممکن اقدامات کیے جائیں گے۔
