پاکستان کے پکل بال کھلاڑی زین وسیم نے شاندار کارکردگی کا مظاہرہ کرتے ہوئے 2026 پکل بال ورلڈ کپ میں مینز 30+ سنگلز کیٹیگری کا گولڈ میڈل اپنے نام کرلیا۔
ویتنام کے شہر ڈا نانگ میں ہونے والے ایونٹ میں زین وسیم نے سیمی فائنل اور فائنل میں بھارتی حریفوں کو شکست دے کر ٹائٹل حاصل کیا۔
زین وسیم کا تعلق لاہور کے Shapes Gym سے ہے۔ ان کی کامیابی کو پاکستان میں پکل بال کے بڑھتے ہوئے رجحان اور بین الاقوامی سطح پر پاکستانی کھلاڑیوں کی صلاحیتوں کے لیے اہم پیش رفت قرار دیا جا رہا ہے۔
گولڈ میڈل جیتنے کے بعد زین وسیم نے اپنے بھارتی حریفوں کو بھی پوڈیم پر مدعو کیا، جسے کھیلوں کے جذبے اور باہمی احترام کی خوبصورت مثال قرار دیا گیا۔
زین وسیم کی اس کامیابی پر پاکستان کے کھیلوں کے حلقوں میں خوشی کا اظہار کیا جا رہا ہے، جبکہ ان کی کامیابی کو ملک کے لیے ایک قابلِ فخر لمحہ قرار دیا گیا ہے۔
