کراچی ‘ مختلف علاقوں میں پولیس مقابلے، 4 ڈاکو زخمی حالت میں گرفتار

کراچی(این این آئی) شہر کے مختلف علاقوں میں مبینہ پولیس مقابلوں کے دوران چار مبینہ ڈاکوؤں کو زخمی حالت میں گرفتار کرلیا گیا۔ پولیس کے مطابق گرفتار ملزمان کے قبضے سے اسلحہ، موبائل فون، نقدی اور موٹر سائیکلیں برآمد ہوئی ہیں، جبکہ زخمی ملزمان کو طبی امداد کے لیے اسپتال منتقل کردیا گیا۔چھیپا حکام کے مطابق لیاری کے علاقے چاکیواڑہ میں ربانی مسجد کے قریب مبینہ پولیس مقابلے کے دوران دو ملزمان جمیل اور محمد زخمی حالت میں گرفتار ہوئے، جنہیں سول اسپتال منتقل کردیا گیا۔پولیس کے مطابق منگھو پیر پولیس اور شاہین فورس نے ناردرن بائی پاس پر کارروائی کے دوران مبینہ مقابلے میں غلام مصطفی نامی ملزم کو زخمی حالت میں گرفتار کیا۔ ملزم کے قبضے سے اسلحہ، موبائل فون، نقدی اور موٹر سائیکل برآمد ہوئی۔ اسے طبی امداد کے لیے عباسی شہید اسپتال منتقل کردیا گیا۔دوسری جانب لیاقت آباد پولیس نے سندھی ہوٹل کے علاقے میں مبینہ مقابلے کے دوران عظیم نامی ملزم کو زخمی حالت میں گرفتار کرلیا۔