خانپور ضلع ہری پور میں گیس سلنڈر دکان میں زور دار دھماکہ، انتظامیہ خاموش

خانپور(نمائندہ خبریں)تحصیل خانپور میں گیس سلنڈر کی دکان پر زور دار دھماکہ ہوا ہے۔ خوش قسمتی سے کوئی جانی نقصان نہیں ہوا تاہم دکان کو شدید نقصان پہنچا ہے۔ دھماکے کے بعد علاقے میں خوف و ہراس پھیل گیا۔*قامی ذرائع کے مطابق تحصیل خانپور میں جگہ جگہ غیر قانونی ایل پی جی گیس سلنڈروں کی دکانیں کھلی ہوئی ہیں۔ ان کا کوئی پوچھنے والا نہیں، نہ کوئی رجسٹریشن ہے اور نہ ہی حفاظتی اقدامات کا خیال رکھا جاتا ہے۔انتہائی
تشویشناک بات یہ ہے کہ ان غیر رجسٹرڈ دکانوں پر پبلک ٹرانسپورٹ کی گاڑیوں میں کھلے عام ایل پی جی بھری جا رہی ہے۔ یہاں تک کہ سکول وینز میں بھی ایل پی جی استعمال کی جا رہی ہے جو بچوں کی زندگیوں کے لیے شدید خطرہ ہے۔اہل علاقہ نے شدید تشویش کا اظہار کرتے ہوئے کہا ہے کہ اگر ان غیر قانونی ایل پی جی دکانوں کے خلاف فوری ایکشن نہ لیا گیا تو کسی بھی وقت بڑا سانحہ رونما ہو سکتا ہے۔عوامی و سماجی حلقوں نے ڈپٹی کمشنر ہری پور اور اسسٹنٹ کمشنر خانپور سے مطالبہ کیا ہے کہ تحصیل خانپور میں قائم تمام غیر رجسٹرڈ ایل پی جی گیس سلنڈر دکانوں کے خلاف فوری کارروائی کی جائے اور پبلک ٹرانسپورٹ اور سکول وینز میں ایل پی جی کے استعمال پر مکمل پابندی عائد کی جائے۔ کم از کم سکول وینز میں تو ایل پی جی گیس پر پابندی عائد کردی جائے تاکہ کسی بڑے سانحے سے بچا جا سکے۔