راولپنڈی(خصوصی رپورٹر)بورڈ آف انٹرمیڈیٹ اینڈ سیکنڈری ایجوکیشن، راولپنڈی کے زیرِ اہتمام میٹرک سالانہ اول امتحان 2026 میں نمایاں پوزیشنیں حاصل کرنے والے طلبہ و طالبات کے اعزاز میں وزیراعلی پنجاب کیش پرائز ایوارڈ تقریب بورڈ کمپلیکس راولپنڈی میں منعقد ہوئی۔ تقریب کا آغاز سیکرٹری بورڈ محمد فہمید نے تلاوتِ لامِ پاک سے کیا۔ تقریب کے دوران نمایاں کامیابی حاصل کرنے والے طلبہ و طالبات کو کیش پرائز سے نوازا گیا اور پوزیشن ہولڈرز میں فی کس ایک لاکھ روپے کے انعامات تقسیم کیے گئے۔تقریب سے خطاب کرتے ہوئے پروفیسر ڈاکٹر اقبال محمود چیئرمین تعلیمی بورڈ راولپنڈی نے کہا کہ وزیراعلی پنجاب مریم نواز شریف اور صوبائی وزیر تعلیم رانا سکندر حیات نے طلبہ و طالبات کی محنت، قابلیت اور نمایاں تعلیمی کارکردگی کو سراہتے ہوئے ان کی حوصلہ افزائی کے لیے کیش پرائز دینے کا اعلان کیا۔ ایسے اقدامات نہ صرف طلبہ کی حوصلہ افزائی کرتے ہیں بلکہ انہیں مستقبل میں مزید محنت اور بہتر کارکردگی دکھانے کی ترغیب بھی دیتے ہیں۔انہوں نے نمایاں پوزیشنیں حاصل کرنے والے طلبہ و طالبات، ان کے والدین اور اساتذہ کو مبارک باد پیش کرتے ہوئے کہا کہ یہ کامیابی طلبہ کی مسلسل محنت، والدین کی رہنمائی اور اساتذہ کی لگن کا نتیجہ ہے۔ ان کا کہنا تھا کہ ملک کا روشن مستقبل باصلاحیت، تعلیم یافتہ اور محنتی نوجوانوں سے وابستہ ہے، جبکہ تعلیم قوموں کی ترقی، خوشحالی اور استحکام میں بنیادی کردار ادا کرتی ہے۔پروفیسر ڈاکٹر اقبال محمود نے مزید کہا کہ حکومتِ پنجاب کی ترجیحات میں نظامِ تعلیم کی بہتری، میرٹ کا فروغ اور باصلاحیت طلبہ کی حوصلہ افزائی شامل ہیں۔ تعلیمی بورڈ راولپنڈی بھی میرٹ کی پالیسی پر عمل پیرا ہے اور شفافیت، محنت اور قابلیت کی بنیاد پر طلبہ کی کامیابیوں کو تسلیم کرنے کے لیے پرعزم ہے۔اس موقع پر کنٹرولر امتحانات پروفیسر تنویر اصغر اعوان نے اپنے خطاب میں کہا کہ میٹرک سالانہ اول امتحان 2026 کے نتائج کی تیاری کے لیے بورڈ کے عملے نے بھرپور محنت اور ذمہ داری کا مظاہرہ کیا۔ انہوں نے کہا کہ نمایاں پوزیشنیں حاصل کرنے والے طلبہ و طالبات مستقبل میں اپنی صلاحیتوں کو بروئے کار لاتے ہوئے ملک و قوم کا نام روشن کریں گے۔ انہوں نے طلبہ کی کامیابی میں والدین اور اساتذہ کے کردار کو بھی قابلِ تحسین قرار دیا۔تقریب طلبہ و طالبات کی تعلیمی کامیابیوں کے اعتراف، ان کی حوصلہ افزائی اور تعلیمی میدان میں میرٹ و محنت کے فروغ کے عزم کے ساتھ منعقد ہوئی۔
