طالبان رجیم کی پالیسیاں افغانستان کی تاریخی و ثقافتی شناخت کیلئے بھی خطرہ

نیویارک (این این آئی) اقوام متحدہ میں افغان نمائندہ نصیراحمد فائق نے طالبان رجیم کی ثقافتی پابندیوں اور امتیازی پالیسیوں کو آشکارکر دیا۔ اقوام متحدہ میں افغان نمائندہ نصیر احمد فائق نے اقوام متحدہ کے اجلاس میں کہا کہ طالبان کی ثقافت، زبان اور تعلیم پر پابندیاں افغان عوام کی تاریخی و ثقافتی شناخت اور تنوع کیلیے سنگین خطرہ بن گئی ہیں۔ ثقافتی حقوق انسانی حقوق کابنیادی حصہ ہیں، طالبان رجیم کوافغان معاشرے پر اپنا مخصوص نظریہ مسلط کرنیکا حق نہیں، طالبان رجیم نے ثقافتی روایات، فنون اورعوامی اجتماعات پر پابندیاں عائد کی ہیں۔ طالبان رجیم میں جہادی مدارس کے پھیلائو سے انتہا پسندی کے فروغ اورجامع تعلیم کی تباہی کاخدشہ ہے۔