لاہور (این این آئی)صوبائی وزیر اطلاعات و ثقافت پنجاب عظمیٰ بخاری نے کہا ہے کہ وزیراعلی مریم نواز شریف کی کسان دوست پالیسیوں اور انقلابی اقدامات کی بدولت پنجاب میں زرعی شعبہ ترقی کی نئی راہ پر گامزن ہو چکا ہے،وزیراعلی مریم نواز نے کسانوں کا دیرینہ مطالبہ پورا کرتے ہوئے کسان بینک کے قیام کا اعلان کیا ہے، جبکہ گندم کی امدادی قیمت بھی 4500روپے فی من مقرر کر دی گئی ہے، جس پر صوبے بھر کے کسان نمائندوں نے حکومت کے اس اقدام کو خوب سراہا ہے۔اپنے بیان میں انہوںنے کہا کہ پنجاب کی تاریخ میں پہلی مرتبہ کاشتکاروں کی سہولت کے لیے 50ہزار ٹریکٹرز اور جدید سپر سیڈرز فراہم کیے جا رہے ہیں۔ کسان کارڈ کے ذریعے اس وقت 10لاکھ سے زائد کسان براہِ راست مستفید ہو رہے ہیں۔ مریم نواز کے کسانوں پر کامل اعتماد کا ہی نتیجہ ہے کہ کسان کارڈ کی ریکوری سو فیصد سے بھی حاصل ہو رہی ہے۔عظمی بخاری نے صوبائی حکومت کی دیگر فلاحی سکیموں کا ذکر کرتے ہوئے کہا کہ ایک طرف جہاں نوجوانوں کو لیپ ٹاپس اور تعلیمی وظائف دئیے جا رہے ہیں، وہاں دوسری طرف کسانوں کو ٹریکٹر، سپر سیڈر اور کسان کارڈز مہیا کیے جا رہے ہیں۔انہوں نے زور دیتے ہوئے کہا یہ مریم نواز کا پنجاب ہے، بدلتا ہوا پنجاب اور ترقی کرتا ہوا پنجاب،اب صوبے میں فلاحی اور ریلیف پیکج محض فائلوں یا سوشل میڈیا تک محدود نہیں رہے بلکہ گرانڈ پر عملی طور پر ڈیلیور ہوتے نظر آ رہے ہیں۔
