24 گھنٹوں میں 749 ٹارگٹڈ کاروائیاں 239 حوثی ہلاک

صنعا، ریاض، لندن ( نیوز ایجنسیاں) یمنی فوج نے 24 گھنٹوں میں 749 ٹارگٹڈ کارروائیوں میں
239 حوثی ہلاک کرنے کا دعویٰ کیا ہے جبکہ سعودی فوجی اتحاد نے دعویٰ کیا ہے کہ اس نے سعودیہ کی جانب داغا گیاحوثی بیلسٹک میزائل فضا میں ہی تباہ کردیا ہے، ادھر برطانیہ نے اپنے شہریوں کیلئے ضروری سفری ہدایت نامہ جاری کیا ہے۔ یمنی حکومت کی مسلح افواج نے کہا ہے کہ انہوں نے حوثیوں کے خلاف جاری آپریشن فجرِ الیمن کے تحت گزشتہ 24گھنٹوں کے دوران حوثی ملیشیا کی عسکری صلاحیتوں کے خلاف 749ٹارگٹڈ کارروائیاں کی ہیں جن میں 239حوثی کمانڈروں اور جنگجوؤں کو ہلاک یا زخمی کر دیا گیا ہے۔عرب میڈیا کے مطابق مسلح افواج کے ترجمان کرنل ماجد النزیلی نے بیان میں بتایا کہ ان کارروائیوں کے دوران حوثیوں کے فیلڈ کمانڈ سینٹرز، قلعہ بندیوں، توپ خانے کے ٹھکانوں اور نقل و حرکت و رسد کیلئے استعمال ہونے والی گاڑیوں کو کامیابی سے نشانہ بنایا گیا۔ترجمان کا مزید بتانا ہے کہ ان وسیع فوجی کارروائیوں میں مجموعی طور پر 117گاڑیاں اور مختلف قسم کا فوجی ساز و سامان بھی تباہ یا مکمل طور پر ناکارہ بنا دیا گیا ہے۔دریں اثناء سعودی عرب کی قیادت میں یمن کے حوثیوں کے خلاف سرگرم اتحاد نے دعویٰ کیا ہے کہ اس کے فضائی دفاعی نظام نے مملکت کے مشرقی صوبے کی جانب داغا گیا بیلسٹک میزائل فضا میں ہی روک کر تباہ کردیا۔فرانسیسی خبر رساں ادارے کے مطابق اتحادی افواج کے ترجمان ترکی المالکی نے سوشل میڈیا پلیٹ فارم ایکس پر جاری بیان میں کہا کہ فضائی دفاعی نظام نے حوثی ملیشیا کی جانب سے داغے گئے بیلسٹک میزائل کو روک کر تباہ کردیا۔ترجمان نے حوثیوں کو دہشت گرد حوثی ملیشیا قرار دیتے ہوئے کہا کہ میزائل سعودی عرب کے مشرقی صوبے کی طرف بھیجا گیا تھا۔ رپورٹ میں میزائل داغے جانے کے وقت، اس کے ممکنہ ہدف، یا واقعے میں کسی جانی و مالی نقصان کی تفصیلات نہیں دی گئیں۔ حوثی گروپ کی جانب سے بھی اس واقعے پر کوئی ردعمل فراہم کردہ خبر میں شامل نہیں ہے۔یمن میں حوثیوں اور سعودی قیادت میں قائم اتحاد کے درمیان کشیدگی طویل عرصے سے جاری ہے۔ سعودی اتحاد کے اس تازہ بیان سے خطے میں سکیورٹی کی صورت حال ایک بار پھر توجہ کا مرکز بن گئی ہے۔ادھر برطانوی دفترخارجہ نے مشرق وسطی سمیت 16 ممالک کے لیے سفری ہدایات جاری کردیں، برطانوی میڈیا کے مطابق وارننگ والے ممالک میں سعودی عرب، ترکیہ، اسرائیل، ایران، یمن،شام،کویت شامل ہیں۔برطانوی میڈیا کے مطابق خطے کی صورتحال غیر یقینی ہے اور کشیدگی میں اچانک اضافے کا خطرہ ہے، ان ممالک میں سفر کرنے والے شہری سفری نظام میں اچانک رکاوٹوں کے لیے تیار رہیں۔
حوثی ہلاک