اسلام آباد’ جدید سلاٹر ہائوس کا قیام معیاری گوشت کی فراہمی کیلئے ضروری

اسلام آباد (نامہ نگار خصوصی) صدر آل پاکستان جمعیت القریش میٹ ویلفیئر ایسوسی ایشن و ممبر لائیو سٹاک اینڈ ڈیری ڈویلپمنٹ بورڈ خورشید احمد قریشی نے صدر اسلام آباد چیمبر آف کامرس اینڈ انڈسٹری محمد زکریا اکبر ضیا سے ان کے دفتر میں ملاقات کی اور انہیں اسلام آباد میں جدید اور معیاری سلاٹر ہائوس کی عدم موجودگی کے باعث شہریوں اور گوشت کے کاروبار سے وابستہ افراد کو درپیش مسائل سے آگاہ کیا۔ خورشید احمد قریشی نے کہا کہ اسلام آباد میں سلاٹر ہائوس نہ ہونے کے باعث شہریوں کو معیاری اور حفظانِ صحت کے اصولوں کے مطابق گوشت کی فراہمی میں مشکلات کا سامنا ہے۔ شہر سے دور واقع مذبح خانوں تک جانوروں اور گوشت کی ترسیل سے اخراجات میں بھی اضافہ ہوتا ہے جس کا اثر بالآخر صارفین پر پڑتا ہے۔ انہوں نے کہا کہ اسلام آباد میں جدید سہولیات سے آراستہ معیاری سلاٹر ہائوس کا قیام نہ صرف شہریوں کو صاف اور معیاری گوشت کی فراہمی یقینی بنانے کے لیے ضروری ہے بلکہ اس سے پاکستان سے گوشت کی برآمدات بڑھانے میں بھی مدد مل سکتی۔ خورشید احمد قریشی نے وزیر داخلہ سید محسن نقوی سے بھی ایپل کی ہے کہ اسلام آباد میں سلاٹر ہائوس بنانے کے احکامات جاری کریں۔ صدر آئی سی سی آئی محمد زکریا اکبر ضیا نے کہا کہ اسلام آباد میں سلاٹر ہائوس کا قیام شہریوں اور تاجروں کا دیرینہ مطالبہ ہے جو کئی سال سے زیرِ التوا ہے۔ اسلام آباد چیمبر آف کامرس اینڈ انڈسٹری شہریوں اور متعلقہ کاروباری حلقوں کے مفاد میں اس اہم مسئلے کو متعلقہ فورمز پر اٹھائے گا اور اسلام آباد میں جلد از جلد معیاری سلاٹر ہائوس کی تعمیر کے لیے اپنا کردار ادا کرے گا۔ ملاقات میں سیکرٹری جنرل یونائیٹڈ بزنس گروپ (یو بی جی) ظفر بختاوری بھی میٹ ایسوسی ایشن کے وفد کے ہمراہ موجود تھے۔ وفد میں سردار ظہیر احمد، جنرل سیکرٹری جمعیت القریش میٹ ویلفیئر ایسوسی ایشن و نائب صدر اسلام آباد چیمبر آف سمال ٹریڈرز اینڈ سمال انڈسٹریز، عبداللہ قریشی، چیئرمین جمعیت القریش پاکستان، عبدالعزیز قریشی، نائب صدر جمعیت القریش میٹ ویلفیئر ایسوسی ایشن، آصف راجپوت، نائب صدر جمعیت القریش میٹ ویلفیئر ایسوسی ایشن، عبدالرحمان خان اور سبحان قریشی شامل تھے۔ ملاقات میں اس امر پر زور دیا گیا کہ اسلام آباد میں جدید سلاٹر ہائوس کی تعمیر کے لیے متعلقہ اداروں کے مابین موثر رابطہ کاری اور عملی اقدامات کیے جائیں تاکہ شہریوں کو معیاری گوشت کی فراہمی، حفظانِ صحت کے تقاضوں پر عملدرآمد اور گوشت کی برآمدات کے فروغ کی راہ ہموار ہو سکے۔