سعودیہ اور شام میں دفاعی تعاون کا معاہدہ عالمی توانائی فراہمی کے تسلسل پر زور

ریاض(آئی این پی )سعودی عرب اور شام نے تنائو کو کم کرنے، بحرانوں کو قابو میں رکھنے اور اختلافات کو حل کرنے میں بات چیت اور سفارت کاری کو ترجیح دینے کی ضرورت پر زور دیا ہے۔ سعودی عرب اور شام نے علاقائی اور بین الاقوامی سلامتی، جہاز رانی کی حفاظت، توانائی کی فراہمی کے تسلسل اور عالمی معیشت کے استحکام پر کسی بھی فوجی تصادم کے خطرناک نتائج سے خبردار کیا۔عرب میڈیارپورٹس کے مطابق یہ بات سعودی ولی عہد اور وزیراعظم شہزادے محمد بن سلمان اور شامی صدر احمد الشرع کے درمیان ریاض میں ہونے والے مذاکرات کے ایک سیشن کے دوران سامنے آئی، یہ سیشن شامی صدر کے خادم الحرمین الشریفین شاہ سلمان بن عبدالعزیز کی دعوت پر مملکت کے دورے کے ضمن میں منعقد ہوا۔سعودیہ اور شام نے ان تمام اقدامات کو فوری طور پر روکنے پر زور دیا جو بحیرہ احمر، باب المندب اور آبنائے ہرمز میں سمندری جہاز رانی اور آبی گزرگاہوں کی سلامتی کو خطرے میں ڈالتے ہیں۔دونوں رہنمائو ں نے خطے کی سلامتی اور استحکام کی حفاظت کیلئے علاقائی و بین الاقوامی کوششوں کو مضبوط بنانے کی اہمیت پر زور دیا، انہوں نے علاقائی اور بین الاقوامی مسائل کے حوالے سے اپنے موقف میں ہم آہنگی کی بھی تعریف کی اور کہا کہ اس سے دونوں ملکوں کے درمیان ہم آہنگی اور مشاورت کی سطح کی عکاسی ہوتی ہے۔اس دورے میں سعودی عرب اور شام کی دفاعی وزارتوں کے درمیان تعاون کے ایک معاہدے پر دستخط کئے گئے، اس کے ساتھ ساتھ سعودی وزارت صنعت و معدنی وسائل اور شامی وزارت صنعت، داخلی تجارت و تحفظِ صارف کے درمیان صنعتی تعاون کیلئے ایک سمجھوتے کی یادداشت پر بھی دستخط کیے گئے۔