کینال روڈ پر ٹریکٹر ٹرالی کی ٹکر سے موٹرسائیکل سوا ر میاں’ بیوی جاں بحق

لاہور (کرائم رپورٹر) نواب ٹائون کے علاقے کینال روڈ پر ٹریکٹر ٹرالی کا فرنٹ ٹائر برسٹ ہونے کے باعث پیش آنے والے خوفناک حادثے میں موٹر سائیکل سوار میاں بیوی جاں بحق ہو گئے۔ حادثے میں جاں بحق ہونے والے میاں بیوی کی
شناخت 55 سالہ بابر اور 50 سالہ گلشن بی بی کے نام سے ہو گئی ہے۔ پولیس کے مطابق حادثہ کینال روڈ پر ٹھوکر نیاز بیگ فلائی اوور کے قریب مغل آئی ہسپتال کٹ کے مقام پر پیش آیا جہاں ٹریکٹر ٹرالی کا فرنٹ ٹائر اچانک برسٹ ہو گیا اور ٹرالی بے قابو ہو کر موٹر سائیکل سے ٹکرا گئی۔ حادثے کے نتیجے میں موٹر سائیکل سوار میاں بیوی شدید زخمی ہو گئے جنہیں تشویشناک حالت میں جناح ہسپتال منتقل کیا گیا تاہم دونوں زخموں کی تاب نہ لاتے ہوئے دم توڑ گئے۔ پولیس کا کہنا ہے کہ جاں بحق ہونے والے بابر اور گلشن بی بی نئے مکان کی تلاش میں ای ایم ای سوسائٹی جارہے تھے کہ راستے میں حادثے کا شکار ہو گئے۔ متوفین کے دو بیٹے اور دو بیٹیاں ہیں پولیس نے حادثے کے ذمہ دار ٹریکٹر ٹرالی ڈرائیور محمد نوید کو موقع سے حراست میں لے کر تھانہ نواب ٹائون منتقل کر دیا جبکہ اس کے خلاف مقدمہ بھی درج کر لیا گیا ہے۔ دوسری جانب سی ٹی او لاہور سید عبدالرحیم شیرازی نے حادثے کا نوٹس لیتے ہوئے ایس ایس پی صدر سے تفصیلی انکوائری رپورٹ طلب کر لی ہے۔ ترجمان ٹریفک پولیس کے مطابق سیف سٹی کیمروں کی مدد سے بھی حادثے کے مختلف پہلوئوں کا جائزہ لیا جارہا ہے۔ قانونی کارروائی مکمل ہونے کے بعد دونوں میتیں ورثا کے حوالے کر دی جائیں گی۔