بلوچستان’ 9شہروں کو محفوظ بنانے کیلئے پنجاب سے ٹیکنالوجی لینے کا فیصلہ

لاہور’کوئٹہ( این این آئی)بلوچستان میں شہریوں کے تحفظ اور جرائم کی روک تھام کے لیے 9 شہروں میں سیف سٹی منصوبوں پر کام جاری ہے تاہم ان منصوبوں کو موثر اور مکمل طور پر فعال بنانے کے لیے اب پنجاب سے معاونت حاصل کی جائے گی۔ اس سلسلے میں وزیراعلی بلوچستان میر سرفراز بگٹی اور وزیراعلیٰ پنجاب مریم نواز شریف کے درمیان سیف سٹی منصوبوں کی تکمیل، جدید ٹیکنالوجی کے استعمال اور ادارہ جاتی تعاون پر اتفاق ہوا ہے۔وزیراعلیٰ بلوچستان کے مراسلے پر وزیراعلیٰ پنجاب نے متعلقہ حکام کو بلوچستان سیف سٹی اتھارٹی کو مضبوط بنانے اور ضروری تکنیکی و ادارہ جاتی معاونت فراہم کرنے کی ہدایات جاری کردی ہیں۔دونوں صوبوں کی سیف سٹی اتھارٹیز کے درمیان مشترکہ منصوبے کے تحت سکیورٹی مانیٹرنگ، عملے کی تربیت اور تجربات کے تبادلے کے لیے بھی ایک نظام وضع کیا جائے گا۔