محسن عباس حیدر نے بیوی کو دھمکیاں دیں، پولیس رپورٹ

لاہور(ویب ڈیسک)پولیس نے اداکار و گلوکار محسن عباس حیدر کو بیوی کے خلاف دھمکیاں دینے کی دفعات میں قصور وار جبکہ پستول تاننے اور امانت میں خیانت کی دفعات کو خارج کردیا ہے۔ایڈیشنل سیشن جج عظیم شیخ نے محسن عباس حیدر کی درخواست ضمانت پر سماعت کی اور عبوری درخواست ضمانت واپس لیے جانے پر اسے نمٹا دیا۔سماعت کے دوران تھانہ ڈیفنس سی کے تفتیشی افسر نے پولیس رپورٹ پیش کی جس میں محسن عباس حیدر کو دھمکیاں دینے کی دفعات میں قصوروار ٹھہرایا گیا جبکہ بیوی پر پستول تاننے اور امانت میں خیانت کی دفعات کو پولیس نے خارج کردیا۔اس رپورٹ کو پیش کیے جانے کے بعد محسن عباس کے وکیل نے دھمکیاں دینے کی دفعات میں عبوری ضمانت کی درخواست واپس لینے کی استدعا کرتے ہوئے کہا کہ یہ معمولی جرم ہے جس میں عبوری درخواست ضمانت کی ضرورت نہیں۔عدالت نے اداکار کے وکیل کی استدعا کو منظور کرتے ہوئے درخواست ضمانت واپس کردی۔بعد ازاں میڈیا سے گفتگو کرتے ہوئے محسن عباس حیدر نے کہا ‘آج حق اور سچ کی فتح ہوئی ہے اور عدالت نے مجھے بے قصور قرار دیا ہے، مجھے اس کیس سے نقصان پہنچا ہے’۔انہوں نے ماڈل نازش جہانگیر سے شادی کی خبروں کو مسترد کرتے ہوئے کہا کہ یہ بھی ان کے خلاف ایک سازش ہے۔خیال رہے کہ محسن عباس حیدر کے خلاف ان کی اہلیہ فاطمہ سہیل کی جانب سے امانت میں خیانت اور دھمکیاں دینے کی دفعات کے تحت تھانہ ڈیفنس سی میں مقدمہ کروایا گیا تھا۔اداکار کے سوشل میڈیا اکاﺅنٹس پر ایک ویڈیو بھی پوسٹ کی گئی جس میں اداکار نے کہا کہ انہیں کچھ بلاگرز، صحافیوں اور انڈسٹری کے ساتھیوں کے ردعمل سے مایوسی ہوئی ہے جنہوں نے ان کے خلاف نفرت انگیز پیغامات مکمل کہانی جانے بغیر پوسٹ کیے۔انہوں نے مزید کہا ‘جیسا میں پہلے کہہ چکا ہوں، ہر روتی ہوئی خاتون ہمیشہ سچ نہیں بول رہی ہوتی’۔فاطمہ سہیل نے جولائی میں فیس بک میں ایک پوسٹ میں اداکار پر گھریلو تشدد اور شادی شدہ ہونے کے باوجود افیئر چلانے کا الزام لگایا تھا۔ان الزامات کے بعد دنیا ٹی وی نے محسن عباس حیدر کو اپنے شو مذاق رات سے نکالتے ہوئے کہا تھا کہ جب تک وہ اپنی بے گناہی ثابت نہیں کرتے، وہ شو کا حصہ نہیں ہوں گے۔محسن عباس کی اہلیہ کی جانب سے لگائے الزامات کے بعد کئی اداکاروں نے محسن عباس حیدر پر تنقید کی جبکہ 2 اداکاروں نے دعویٰ بھی کیا کہ وہ اس سب سے آگاہ تھے۔اداکارہ دعا ملک نے محسن عباس حیدر اور ان کی اہلیہ کے درمیان تنازع سے متعلق کہا تھا کہ ’میں یقین کے ساتھ کہہ سکتی ہوں کہ میں اس انڈسٹری میں واحد عینی شاہد ہوں، میں نے یہ آگ 3 سال سے اپنے دل میں چھپا کر رکھی ہے‘۔جبکہ اداکار گوہر رشید نے سماجی رابطے کی ویب سائٹ ٹوئٹر پر کیے گئے ٹویٹ میں کہا تھا کہ ’ میں دوسرا شخص ہوں جو فاطمہ سہیل کے ساتھ ہونے والی ناانصافی سے متعلق آگاہ ہے، 2018 میں جب محسن عباس حیدر نے فاطمہ پر تشدد کیا تھا میری دوست اسے ہسپتال لے کر گئی تھی، مجھے اسی کے ذریعے پوری بات کا علم ہوا، فاطمہ میری بہن جیسی ہے‘۔