اسلام آباد: (ویب ڈیسک) وفاقی وزیر برائے بحری امور سینیٹر فیصل سبزواری نے کہا ہے کہ بھارت کی مسلم دشمن حکومت نے یاسین ملک کو سزا دی ہے، یاسین ملک کو دی جانے والی سزا کی شدید الفاظ میں مذمت کرتے ہیں، ہماری اخلاقی، سیاسی اورسفارتی حمایت کشمیریوں کے ساتھ ہے۔
ایم کیو ایم پاکستان سے تعلق رکھنے والے وفاقی وزیر سینیٹر فیصل سبزواری نے کہا کہ آئی ایم ایف کے اعلامیے میں پٹرولیم مصنوعات پرسبسڈی ختم کرنے کا کہا گیا ہے۔
انہوں نے کہا کہ اپوزیشن کے دوست کہہ رہے ہیں کہ سری لنکا جیسا حال ہونے والا ہے، کوئی یہ کیسے سوچ سکتا ہے کہ نیوکلیئر اسٹیٹ کا سری لنکا جیسا حال ہو گا؟
سینیٹر فیصل سبزواری نے واضح طورپر کہا کہ ہمیں ملک کی معیشت مضبوط کرنی ہے تو سیاست سے بالاتر ہو کر کام کرنا ہو گا، ہمارے یہاں ایسے سیاست دان بھی ہیں جو اس بات پر خوش ہورہے ہیں کہ پاکستان ڈیفالٹ ہو رہا ہے۔
وفاقی وزیر برائے بحری امور سینیٹر فیصل سبزواری نے زور دے کر کہا کہ تمام ماہرین معاشیات کو دعوت دیں، ملک کے معاشی مسائل کا حل ڈھونڈیں، ہمیں اپنی قوم کو تقسیم در تقسیم ہونے سے بچانا ہو گا۔
