امیتابھ بچن، بومن ایرانی اور انوپم کھیر دنیا کا بلند ترین پہاڑ سر کرنے کیلئے تیار

ممبئی: (ویب ڈیسک) بالی ووڈ کے بِگ بی امیتابھ بچن، کامیڈی کنگ بومن ایرانی اور انوپم کھیر کی نئی فلم کا ٹریلر جاری کر دیا گیا۔
بالی ووڈ کے تینوں لیجنڈری اداکار اپنی آنے والی نئی فلم ’اونچائی ‘ میں اداکاری کے جوہر دکھاتے نظر آئیں گے جبکہڈینی ڈینزونگپا اور پری نیتی چوپڑا بھی فلم کا حصہ ہوں گی۔
فلم کی کہانی چار عمر رسیدہ دوستوں کے گرد گھومتی ہے جو اپنی زندگی بھرپور انداز سے جینا چاہتے ہیں۔ تاہم ان میں سے ایک کے انتقال کے بعد تین دوست اس کی ادھوری خواہش پوری کرنے اور آخری رسومات ادا کرنے کے لیے ماؤنٹ ایورسٹ سَر کرنے کی مہم جوئی کرتے ہیں۔
کامیڈی اور ڈرامے سے بھرپور یہ فلم 11 نومبر کو سنیما گھروں کی زینت بنے گی جس کا شائقین کو بےصبری سے انتظار ہے۔
یاد رہے کہ اس سے قبل امیتابھ بچن کی فلم ’گُڈ بائے‘ ریلیز ہوئی تھی جو کہ باکس آفس پر اچھا بزنس کرنے میں ناکام رہی تاہم اس فلم کیلئے امیتابھ بچن نے اُمید ظاہر کی ہے کہ لوگوں کو پسند آئے گی اور اچھا بزنس کرے گی۔