دبئی ( ویب ڈیسک ) انگلش کمنٹیٹر ایلن وکنز نے پاکستان سپر لیگ (پی ایس ایل) کا فائنل میچ لاہور میں کرانے کے فیصلے کو بہترین قرار دیتے ہوئے پاکستانیوں کو مبارکباد دی ہے۔تفصیلات کے مطابق ایلن وکنز کا کہنا تھا کہ سب کی خواہش ہے کہ پی ایس ایل پاکستان کی اپنی سرزمین پر ہو، اس سال بہت سے نئے کھلاڑی ابھر کر سامنے آئے ہیں، ان پر صرف پاکستان ہی نہیں بلکہ دنیا بھر کی نظر ہے۔ اس فیصلے پر وہ خود بھی اتنے خوش تھے کہ انہوں نے پاکستانیوں کو مبارکباد بھی ”گلابی اردو“ میں دی۔ان کا کہنا تھا کہ پاکستان سپر لیگ کا صرف دوسرا سال ہے اور اس ایونٹ نے کرکٹ کے ریکارڈ شائقین جمع کئے ہیں۔ انہوں نے امید ظاہر کی کہ یہ ایک مثبت قدم ہو گا اور درست سمت میں ہوگا، سب ہی چاہتے ہیں کہ پاکستان میں بین الاقوامی کرکٹ واپس آئے اور پاکستانی کرکٹرز کا ان کے اپنے ملک میں ہوم گراﺅنڈ ہو۔
