لاہور (کرائم رپورٹر) سمن آباد کے علاقہ میں نئی نویلی دلہن کی پراسرار موت پولیس کیلئے معمہ بن گئی۔ نعش پوسٹمارٹم کے بعد ورثاءکے حوالے‘ پولیس کو فرانزک رپورٹ کا انتظار۔ تفصیل کے مطابق سمن آباد کے علاقہ کا رہائشی تنویر نامی نوجوان کچھ عرصہ قبل دبئی سے پاکستان واپس آیا اور 3روز قبل اس کی شادی پھوپھو کی بیٹی حرا سے بڑی دھوم دھام سے ہوئی۔ شادی کے دوسرے روز ہی سسرالیوں نے حرا کی نعش اس کے والدین کے گھر بھیج دی۔ دو روز قبل دلہن بننے والی بیٹی کی نعش کو دیکھتے ہی والدین دھاڑیں مار مار کر رونا شروع ہو گئے۔ اطلاع ملنے پر پولیس موقع پر پہنچ گئی جنہوں نے نعش کو قبضہ میں لے کر پوسٹمارٹم کیلئے مردہ خانہ جمع کرا دیا۔ لڑکی کے ورثاءکے مطابق ان کی بیٹی کو سسرالیوں نے پھندا دے کر قتل کیا ہے جبکہ اس بارے ہولی سائیڈ انچارج ارشد طور نے آج صبح ”نیااخبار“ سے گفتگو کرتے ہوئے بتایا کہ حرا کی نعش رات گئے پوسٹمارٹم کے بعد ورثاءکے حوالے کر دی گئی ہے۔ متوفیہ کے جسم پر بظاہر کسی قسم کے تشدد یا زخمی کے نشان موجود نہیں تھے‘ تاہم حرا کی نعش گھر پہنچی تو اس کی ناک اور منہ سے خون بہہ رہا تھا۔ تمام شواہد اور نمونے فرانزک لیب بھیج دیئے گئے ہیں جس کے بعد اصل حقائق سامنے آئیں گے۔ ابتدائی تفتیش کے دوران تنویر نے اعتراف کیا ہے کہ وہ حرا سے شادی نہیں کرنا چاہتا تھا۔
