کینیڈا میں بینکوں سے کیے جانے والے فراڈز کے حوالے سے 12 افراد کے خلاف مقدمات درج کیے گئے ہیں۔ ان میں پاکستانی نمایاں تعداد میں ہیں۔ ٹورونٹو پولیس نے جعلی دستاویزات پر اکاؤنٹ کھلوانے کے الزام میں یہ مقدمات درج کیے ہیں۔
گرفتار کیے جانے والے ملزمان میں حسنین اکرم، ظل علی چودھری، حمزہ بیگ، راشد اقبال، رانا فیصل مسعود خان، انمول کھرانہ، فہد بن موفیظ، عثمان سیف، علی ثنا، میاں محمد سعود، سبط حسین سید اور معید تنویر شامل ہیں۔
ٹورونٹو پولیس کا کہنا ہے کہ جن ملزمان کو گرفتار کیا گیا ہے ان کے پاس سے سیکڑوں کریڈٹ اور ڈیبٹ کارڈ، لاکھوں ڈالر اور دیگر کرنسیاں برآمد ہوئی ہیں۔ تمام ملزمان پر کم و بیش 40 لاکھ ڈالر کے مساوی ایڈوانس قرضوں کی رقوم ڈکار جانے کا الزام عائد کیا گیا ہے۔
پولیس نے بتایا کہ بیشتر ملزمان کا تعلق پاکستانی کمیونٹی سے ہے۔ ملزمان نے کئی برس تک غیر قانونی سرگرمیوں میں حصہ لینے کے لیے 680 جعلی دستاویزات تیار کیں۔
