شاہینوں کا پلٹ کر پروٹیز پر جاندار وار ، تین میچوں کی ایک روزہ سیریز میں ساوتھ افریقہ کو شکست دے دی۔
کیپ ٹاؤن میں کھیلے جارہے اس میچ میں جنوبی افریقہ نے ٹاس جیت کر پہلے بولنگ کرنے کا فیصلہ کیا۔
پہلے میچ کی طرح اس مرتبہ پھر قومی ٹیم کی اننگز کا آغاز اچھا نہ ہوا اور اوپنر عبداللّٰہ شفیق بغیر کوئی رن بنائے پویلین لوٹ گئے۔
دوسری وکٹ پر بابر اعظم اور گزشتہ میچ کے ہیرو اور سنچورین صائم ایوب نے 48 رنز جوڑے۔ صائم اس میچ میں بڑا شاٹ لگانے کی کوشش میں کیچ آؤٹ ہوئے۔ انہوں نے 25 رنز بنائے۔
تیسری وکٹ پر بابر اعظم اور محمد رضوان نے ٹیم کا اسکور آگے بڑھایا دونوں کے درمیان 115 رنز کی پارٹنرشپ بنی اور ٹیم کا ٹوٹل 168 تک پہنچایا۔
اس دوران بابر اعظم نے اپنے کیریئر کی 34ویں جبکہ محمد رضوان نے 14ویں نصف سنچری مکمل کی۔
بابر اعظم 168 کے مجموعے پر 73 رنز بنا کر پویلین لوٹے۔ انہیں ایڈن مارکرم نے زبردست کیچ لے کر پویلین بدر کیا۔ اس بعد محمد رضوان نے جارحانہ کھیل شروع کیا تاہم وہ 192 کے مجموعے پر 80 رنز بنا کر آؤٹ ہوئے۔ انہیں مفاکا نے اپنی ہی گیند پر زبردست کیچ لے کر آؤٹ کیا۔
سلمان علی آغا اور کامران غلام کے درمیان برق رفتار 50 رنز کی شراکت بنی۔ تاہم 242 کے مجموعے پر سلمان علی آغا 30 گیندوں پر 33 رنز کی اننگز کھیل کر آؤٹ ہوئے۔
تاہم کامران غلام نے اپنا جارحانہ انداز جاری رکھا، وہ آخری اوور میں 32 گیندوں پر 63 رنز کی اننگز کھیل کر پویلین لوٹے، انکی اننگز میں 5 چھکے اور 4 چوکے شامل تھے۔
قومی ٹیم آخری اوور میں 329 رنز بنا کر آل آؤٹ ہوگئی۔ اختتامی لمحات میں عرفان خان نے 15، شاہین آفریدی نے 16، حارث رؤف نے 6 جبکہ ابرار احمد نے 4 رنز کے ساتھ ٹیم کے ٹوٹل میں اپنا حصہ ڈالا۔
ساوتھ افریقہ نے اننگز کا آغاز کیا تو وہ اچھا ثابت نہیں ہوسکا، اوپنر تیمبا بواما 17 بالز پر 12 رنز بنا کر نسیم شاہ کی گیند پر پویلین لوٹ گئے۔
ٹونی دی زورزی سست روی سے کھیلتے ہوئے 40 بالز پر 34 رنز بنا کر ابرار احمد کی گیند پر بولڈ ہوگئے۔
تیسرے نمبر پر آنے والے رسی وین ڈیر سلمان آغا کی گیند پر صائم ایوب کی ہاتھوں کیچ آوٹ ہوگئے، انہوں نے 30 گیندوں پر 23 رنز بنائے، ایڈن مرکرم کو ابرار احمد نے ایل بی ڈبلیو کیا وہ 21 رنز پر کھیل رہے تھے۔
چار وکٹیں گرنے کے بعد ساؤتھ افریقہ کے بیٹرز نے زور پکڑا، ہینریچ کلاسن جارحانہ انداز میں کھیلنے لگے اور ڈیوڈ ملر نے ان کا بھرپور ساتھ بھی دیا، ڈیوڈ ملر 29 رنز بنا کر شاہین آفریدی کی گیند پر آؤٹ ہوگئے، ان کے بعدر یسی وین ڈر ڈیسن 23، ایڈن مارکرم 21 اور ٹیمبا باؤما 12 رنز اسکور کر پائے۔
پاکستانی فاسٹ بولر شاہین شاہ آفریدی نے 8 اوورز میں 47 رنز دیکر چار وکٹیں حاصل کیں، نسیم شاہ 3 اور ابرار احمد 2 وکٹیں حاصل کر پائے جبکہ سلمان آغا کے حصے میں ایک وکٹ آئی۔
جنوبی افریقہ کی ٹیم پاکستان کے 330 رنز کے ہدف کے جواب میں 248 رنز بنا کر آؤٹ ہوگئی اس طرح یہ میچ پاکستان نے 81 رنز سے اپنے نام کرلیا۔
اس فتح کے ساتھ 3 ون ڈے میچز کی سیریز میں پاکستان کو 2 صفر کی فیصلہ کن برتری حاصل ہوگئی، محمد رضوان نے کپتان بننے کے بعد مسلسل تیسری ون ڈے سیریز اپنے نام کی۔
