پاکستان کے مایہ ناز مرحوم اداکار شفیع محمد شاہ کے خاندان پر ایک اور غم کا پہاڑ ٹوٹ پڑا ہے، مرحوم اداکار کی بیٹی ارسلانہ محمد شاہ اچانک دل کا دورہ پڑنے کے باعث انتقال کر گئیں۔
یہ افسوس ناک خبر مرحوم شفیع محمد شاہ کی دوسری صاحبزادی نے سوشل میڈیا پر ایک جذباتی پیغام کے ذریعے مداحوں کو دی ہے، ان کے مطابق ارسلانہ محمد شاہ اچانک ہارٹ اٹیک کے باعث دنیا سے رخصت ہو گئیں۔
ارسلانہ محمد شاہ میڈیا انڈسٹری سے بھی وابستہ تھیں اور انہوں نے مختلف ٹی وی چینلز میں اسسٹنٹ ڈائریکٹر اور ڈائریکٹر کے طور پر خدمات انجام دیں، تاہم ان کی بہن کے مطابق ارسلانہ کی اصل پہچان ان کی پیشہ ورانہ کامیابیاں نہیں بلکہ ان کا نرم دل، انسان دوست اور ہمدرد شخصیت ہونا تھا۔
ایک بیان میں کہا گیا کہ ارسلانہ سیٹ پر کام کرنے والے ہر فرد کے ساتھ عزت اور محبت سے پیش آتی تھیں، وہ ضرورت مند افراد کی خاموشی سے مدد کرتی تھیں، لوگوں کو ملازمتیں دلواتیں اور کبھی کسی صلے یا تعریف کی خواہش نہیں رکھتی تھیں۔
اپنی بہن کو خراجِ عقیدت پیش کرتے ہوئے انہوں نے لکھا ہے کہ ہم نے صرف ایک بہن نہیں کھوئی بلکہ انسانی روپ میں ایک فرشتہ کھو دیا ہے، ارسلانہ اپنے پیچھے اپنی پیاری بیٹی ام البنین کو چھوڑ گئی ہیں، جو ہمیشہ اپنی والدہ کی محبت اور روشنی کا عکس بن کر زندہ رہے گی۔
واضح رہے کہ شفیع محمد شاہ پاکستان ٹیلی ویژن کے ان عظیم فنکاروں میں شمار ہوتے ہیں جنہوں نے آخری چٹان، آنچ، تیسرا کنارہ، بند گلاب، چاند گرہن، تپش، زینت، نوری جام تماچی، جنگل، ذرا سی عورت اور تلاش جیسے یادگار ڈراموں میں اپنی اداکاری کے جوہر دکھائے، وہ 17 نومبر 2007ء کو 58 برس کی عمر میں انتقال کر گئے تھے۔
