مقبوضہ مغربی کنارہ، امریکی صحافی و یورپی سفارتکاروں پر حملے، 8 مشتبہ افراد گرفتار

مغربی کنارہ (این این آئی) مقبوضہ مغربی کنارے میں امریکی فوٹو جرنلسٹ اور یورپی سفارتکاروں پر حملوں کے الزام میں اسرائیلی پولیس نے 8 مشتبہ افراد کو گرفتار کرنے کا دعویٰ کیا ہے تاہم گرفتار افراد کی شناخت ظاہر نہیں کی گئی۔ غیر ملکی خبر ایجنسی کے مطابق نقاب پوش اسرائیلی آبادکاروں نے فلسطینیوں کی زیتون کی فصل کی کٹائی کی کوریج کرنے والی امریکی فوٹو جرنلسٹ پر تشدد کیا۔ اسرائیلی آبادکاروں کی جانب سے ہفتے کو ایک الگ واقعے میں یورپی سفارتکاروں اور ایک فرانسیسی میئر کو نشانہ بنایا گیا۔ بیلجیم کے وزیرِ خارجہ کے مطابق متاثرین میں فلسطینیوں کے لیے بیلجیم کے قونصل جنرل، فرانسیسی اور پولش سفارتکاروں سمیت مسیحی مذہبی نمائندے بھی شامل تھے۔ حملے کے دوران ایک گاڑی کو بھی نقصان پہنچایا گیا۔