پنجاب سیف سٹیز اتھارٹی کا جعلی،کلوناور ٹیمپر ڈیمز پلیٹس استعمال کرنےوالی گاڑیوںکے خلاف کریک ڈائون

لاہور(کرائم رپورٹر) پنجاب سیف سٹیز اتھارٹی نے جعلی، کلون اور ٹیمپرڈ نمبر پلیٹس استعمال کرنے والی گاڑیوں کے خلاف بڑے پیمانے پر کریک ڈائون شروع کر دیا۔ لاہور سمیت پنجاب بھر کے 43 اسمارٹ سیف سٹیز میں جدید ٹیکنالوجی کی مدد سے مشکوک گاڑیوں کی نگرانی کی جا رہی ہے جبکہ سیف سٹی کیمروں کے ذریعے مشتبہ نمبر پلیٹس کی خودکار نشاندہی کرکے متعلقہ پولیس ٹیموں کو فوری الرٹس جاری کیے جا رہے ہیں۔ ترجمان سیف سٹیز کے مطابق جدید کیمروں کے ذریعے جعلی اور کلون نمبر پلیٹس کے علاوہ نمبر پلیٹس میں ردو بدل کرنے والی گاڑیوں کی بھی نشاندہی کی جا رہی ہے۔ نمبر پلیٹس پر ٹیپ، کپڑا یا دیگر اشیاء لگا کر رجسٹریشن نمبر چھپانے والی گاڑیاں بھی سیف سٹی کی نگرانی میں ہیں۔ ترجمان کے مطابق سیف سٹی کی نشاندہی پر لاہور سمیت پنجاب کے مختلف علاقوں میں متعدد مشکوک گاڑیوں کے خلاف کارروائی کروائی جا چکی ہے۔ کنٹرول روم سے متعلقہ پولیس ٹیموں کو فوری طور پر مطلع کیا جاتا ہے تاکہ مشکوک گاڑیوں کو روک کر قانونی کارروائی عمل میں لائی جاسکے۔ ترجمان سیف سٹیز نے کہا کہ جعلی، کلون اور ٹیمپرڈ نمبر پلیٹس استعمال کرنے والوں کے خلاف مقدمات کے اندراج سمیت سخت قانونی کارروائیاں جاری ہیں، جبکہ نمبر پلیٹس چھپانے اور رجسٹریشن نمبرز میں ردو بدل کرنے والوں کے خلاف زیرو ٹالرنس پالیسی اپنائی گئی ہے۔ ترجمان نے شہریوں سے اپیل کی کہ وہ اپنی گاڑیوں پر رجسٹریشن ریکارڈ کے مطابق اصل اور منظور شدہ نمبر پلیٹس استعمال کریں۔ اگر کسی شہری کو معلوم ہو کہ اس کی گاڑی کا رجسٹریشن نمبر کسی دوسری گاڑی پر استعمال ہو رہا ہے تو وہ فوری طور پر پولیس ہیلپ لائن 15 پر اطلاع دے تاکہ بروقت کارروائی کی جاسکے۔