متروکہ وقف املاک بورڈ چیئرمین کی موئثر حکمت عملی21 دکانیں سیل کر کے قبضہ واپس حاصل کر لیا

لاہور (خبر نگار) چیئرمین متروکہ وقف املاک بورڈ پاکستان (ای ٹی پی بی) کی موثر حکمت عملی اور واضح ہدایات کے نتیجے میں محکمہ نے غیر قانونی قابضین اور طویل عرصے سے واجبات دبانے والے نادہندگان کے خلاف گھیرا تنگ کر دیا۔ ڈپٹی ایڈمنسٹریٹر سمیرا رضوی کی جانب سے سرکاری و محکمانہ املاک واگزار کرانے کے لیے کی جانے والی حالیہ کارروائیاں خوش آئند قرار دی جارہی ہیں جن کے دوران لاہور میں مجموعی طور پر 21 دکانیں سیل کرکے قیمتی جائیدادوں کا قبضہ واپس حاصل کر لیا گیا۔ تفصیلات کےمطابق 13 اکتوبر 2026 کو مصری شاہ کے علاقے وول پریس میں واقع پراپرٹی نمبرN-113-R-I پر کامیاب آپریشن کرتے ہوئے18 دکانیں سیل کی گئیں اور غیر مجاز قابضین سے موقع پر قبضہ واگزار کرایا گیا۔ محکمانہ اطلاعات کے مطابق مذکورہ قابضین تقریبا10 سے12 سال سے واجبات کی ادائیگی میں نادہندہ تھے اور ان کے ذمے 8 کروڑ روپے سے زائد کی رقم واجب الادا تھی۔ اسی سلسلے میں گزشتہ روز ایبک روڈ پر بھی ڈپٹی ایڈمنسٹریٹر کی کارروائی کے دوران ڈی اے سی (DAC) کی ہدایات کے مطابق پولیس کی معاونت سے مزید تین دکانیں سیل کرکے قبضہ واگزار کرا لیا گیا۔ بتایا گیا ہے کہ ان دکانوں کی لیز 2024 میں منسوخ ہو چکی تھی، تاہم اس کے باوجود وہاں قبضہ برقرار تھا۔ محکمانہ املاک کی واگزاری کے لیے ڈپٹی ایڈمنسٹریٹر کی یہ کارروائیاں ایسے عناصر کے لیے واضح پیغام ہیں جو سرکاری جائیدادوں پر غیر قانونی قبضے یا طویل عرصے تک واجبات کی عدم ادائیگی کو معمول سمجھتے ہیں۔ سرکاری املاک کا تحفظ، واجبات کی وصولی اور غیر قانونی قبضوں کا خاتمہ کسی رعایت کا نہیں بلکہ قانون کے مطابق فوری اور موثر کارروائی کا تقاضا کرتا ہے۔ چیئرمین ای ٹی پی بی کی ہدایات پر عملدرآمد اور محکمانہ مشینری کو متحرک کرنے کے نتیجے میں سامنے آنے والی یہ پیشرفت خوش آئند ہے۔ ضرورت اس امر کی ہے کہ کارروائیوں کا دائرہ مزید وسیع کیا جائے، نادہندگان سے واجبات کی وصولی یقینی بنائی جائے اور واگزار کرائی گئی املاک کو دوبارہ غیر قانونی قبضوں سے محفوظ رکھنے کے لیے موثر اقدامات کیے جائیں۔