وزیراعظم آفس سے جاری افغان ڈاکٹروں کی ملک بدری پالیسی کیخلاف درخواست، وفاقی حکومت و دیگر سے جواب طلب

لاہور (کورٹ رپورٹر) لاہور ہائیکورٹ نے وزیراعظم آفس سے 6 اکتوبر 2026ء کو جاری افغان ڈاکٹروں کی ملک بدری اور زیرتعلیم پوسٹ گریجوایٹ کورسز ختم کرنے کی پالیسی کے خلاف درخواست پر وفاقی حکومت و دیگر فریقین کو نوٹس جاری کرتے ہوئے جواب طلب کرلیا۔ جسٹس خالد اسحاق نے ڈاکٹر یلدا ناصر سمیت 70 افغان ڈاکٹروں کی درخواست پر سماعت کی اور مزید سماعت 10 نومبر تک ملتوی کر دی۔ درخواست گزاروں نے موقف اختیار کیا کہ انہوں نے قانونی تقاضے پورے کرکے میرٹ پر پوسٹ گریجوایٹ پروگراموں میں داخلے حاصل کیے، جبکہ اپنے ویزوں میں توسیع اور نئے ویزوں کے اجراء کے لیے بھی درخواستیں دے رکھی ہیں۔ مقررہ مدت گزرنے کے باوجود ان درخواستوں پر فیصلہ نہیں کیا گیا۔ درخواست گزاروں کے مطابق اچانک ملک بدر کرنے اور زیر تعلیم پوسٹ گریجوایٹ کورسز ختم کرنے کی پالیسی غیرقانونی ہے، جبکہ ایسی پالیسی وزیراعظم آفس کے بجائے حکومت پاکستان کی جانب سے جاری کی جانی چاہیے تھی۔ انہوں نے عدالت سے تعلیمی کورسز مکمل کرنے کے لیے محدود مہلت دینے کی استدعا کی۔