جاز ورلڈ اور یونیسیف کا ڈیجیٹل شمولیت کے فروغ کیلئے اشتراک

اسلام آباد(نامہ نگار خصوصی )پاکستان کے معروف ڈیجیٹل سروسز پلیٹ فارم جاز ورلڈ نے یونیسیف کے ساتھ ایک لیٹر آف انٹینٹ پر دستخط کیے کر دیے ہیں، جس کے تحت ڈیجیٹل سہولتوں تک رسائی بڑھانے، نوجوانوں کو بااختیار بنانے، آن لائن تحفظ کو فروغ دینے اور پاکستان بھر میں ہنگامی حالات میں ٹیکنالوجی کی مدد سے امدادی کارروائیوں کو مثر بنانے کے لیے مشترکہ اقدامات کا جائزہ لیا جائے گا۔زیرِ غور شراکت داری کے تحت دونوں ادارے ٹیکنالوجی، رابطے کی سہولتوں، جدت اور آگاہی کے شعبوں میں اپنی صلاحیتوں کو یکجا کرکے ایسے اقدامات پر غور کریں گے جنہیں وسیع پیمانے پر اپنایا جا سکے اور جن سے بچوں، نوجوانوں، خواتین اور پسماندہ طبقات کو فائدہ پہنچے۔ آرٹیفیشل انٹیلجنس تعلیم، روزگار اور خدمات تک رسائی کے طریقوں کو تبدیل کر رہی ہے۔ ایسے میں ڈیجیٹل سہولتوں تک رسائی اور ان کے استعمال کی صلاحیت بڑھانا ضروری ہے تاکہ ان سہولتوں سے محروم یا کم فائدہ اٹھانے والے لوگ بھی آرٹیفیشل انٹیلیجنس پر مبنی دنیا میں حصہ لے سکیں اور اس کے فوائد سے مستفید ہو سکیں۔جاز ورلڈ اور یونیسیف چار ترجیحی شعبوں میں تعاون کا جائزہ لیں گے۔ ان میں ڈیجیٹل شمولیت اور نوجوانوں کو بااختیار بنانا، آن لائن تحفظ اور ڈیجیٹل فلاح و بہبود، انسانی ہمدردی کی بنیاد پر امدادی سرگرمیاں اور آفات سے نمٹنے کی تیاری، جبکہ آگاہی اور عوامی سطح پر رابطے کے اقدامات شامل ہیں۔ ڈیجیٹل شمولیت کے تحت دونوں ادارے بالخصوص پسماندہ طبقات سے تعلق رکھنے والے نوجوانوں کے لیے ڈیجیٹل تعلیم، خواندگی اور مہارتوں کی تربیت تک رسائی بڑھانے کے مواقع تلاش کریں گے۔ یہ صلاحیتیں نوجوانوں کو آرٹیفیشل انٹیلجنس کو محفوظ اور ذمہ دارانہ انداز میں سمجھنے، استعمال کرنے اور اس سے فائدہ اٹھانے کے قابل بنانے کے لیے بھی بنیادی اہمیت رکھتی ہیں۔ اس اشتراک کے تحت وزیرِاعظم یوتھ پروگرام اور یونیسیف کی شراکت سے قائم کیے گئے ڈیجیٹل یوتھ ہب کو مزید مثر بنانے کے طریقوں پر بھی غور کیا جائے گا۔ اس مقصد کے لیے جاز ورلڈ کی تکنیکی صلاحیتوں سے استفادہ کیا جا سکتا ہے تاکہ نوجوانوں کے لیے سیکھنے، روزگار کے مواقع حاصل کرنے اور ڈیجیٹل معیشت میں حصہ لینے کے امکانات بہتر بنائے جا سکیں۔دونوں ادارے بچوں، نوعمروں اور لڑکیوں سمیت مختلف طبقات کے لیے ڈیجیٹل دنیا میں محفوظ اور ذمہ دارانہ شرکت کو فروغ دینے کے اقدامات پر بھی غور کریں گے۔ ان میں آن لائن تحفظ سے متعلق آگاہی، ڈیجیٹل خواندگی اور آن لائن ہراسانی، بدسلوکی اور ٹیکنالوجی کے ذریعے پیدا ہونے والے دیگر خطرات سے نمٹنے کی کوششیں شامل ہوں گی۔اس کے ساتھ ساتھ دونوں ادارے یہ بھی جائزہ لیں گے کہ موبائل رابطے اور ڈیجیٹل ذرائع ابلاغ کو استعمال کرتے ہوئے آفات سے نمٹنے کی تیاری کیسے بہتر بنائی جا سکتی ہے، ہنگامی حالات سے پہلے خبردار کرنے والے پیغامات کیسے پہنچائے جا سکتے ہیں اور انسانی ہمدردی کی بنیاد پر امداد کی ضرورت سے دوچار آبادیوں تک بروقت معلومات کی رسائی کیسے یقینی بنائی جا سکتی ہے۔اس اشتراک پر تبصرہ کرتے ہوئے جاز ورلڈ کے گروپ چیف کارپوریٹ اینڈ ریگولیٹری افیئرز سید ظہیر مہدی نے کہا:” ڈیجیٹل تقسیم کو کم کرنا آرٹیفیشل انٹیلجنس تک رسائی میں پیدا ہونے والے نئے فرق کو کم کرنے کے لیے بھی ضروری ہے۔ نوجوانوں کو ان مواقع سے فائدہ اٹھانے کے لیے رسائی، مہارتوں اور محفوظ ڈیجیٹل ماحول کی ضرورت ہے جو آرٹیفیشل انٹیلجنس فراہم کر سکتی ہے۔ یونیسیف کے ساتھ شراکت داری کا ہمارا ارادہ پسماندہ طبقات کے لیے مواقع بڑھانے، بچوں کو آن لائن تحفظ فراہم کرنے اور معاشروں کی مشکلات سے نمٹنے کی صلاحیت مضبوط بنانے کے مشترکہ عزم کا عکاس ہے۔ ہم اپنی ٹیکنالوجی اور رابطے کی صلاحیتوں کو بچوں کے حقوق اور ترقی کے شعبے میں یونیسیف کی مہارت کے ساتھ یکجا کرکے پاکستان میں آرٹیفیشل انٹیلجنس کے ایسے مستقبل کی بنیاد رکھنے میں مدد دینا چاہتے ہیں جس میں سب کے لیے مواقع موجود ہوں۔