فلیٹس کی الاٹمنٹ پالیسی تیار، فیز تھری بھی مکمل کیا جائیگا:بیرسٹر عقیل

ٹیکسلا(نمائندہ خصوصی )وفاقی وزیر مملکت بیرسٹر عقیل ملک نے کہا ہے کہ ورکرز ویلفیٔر فلیٹس منصوبہ محنت کشوں کا حق ہے اور اس منصوبے کے تحت تعمیر ہونے والے فلیٹس سمیت دیگر سہولیات سے اصل مستحقین کو فائدہ پہنچنا چاہیے۔ فلیٹس کی الاٹمنٹ پالیسی تیار ہو چکی ہے، جبکہ فیز تھری کی تکمیل کے لیے بھی کوششیں جاری رہیں گی۔ورکرز ویلفیٔر فلیٹس کے فیز ٹو کی افتتاحی تقریب سے خطاب کرتے ہوئے بیرسٹر عقیل ملک نے کہا کہ اس منصوبے کو گزشتہ 10 سے 12 سال کے دوران مختلف مشکلات اور تاخیر کا سامنا رہا، تاہم اللہ تعالیٰ نے اب اس کی پیش رفت کا موقع فراہم کیا ہے۔ انہوں نے منصوبے کی تکمیل اور افتتاح کے سلسلے میں تعاون کرنے پر متعلقہ حکام اور سیاسی قیادت کا شکریہ ادا کیا۔انہوں نے کہا کہ اس منصوبے کا بنیادی مقصد محنت کشوں اور مزدوروں کو رہائشی سہولیات فراہم کرنا ہے۔ فلیٹس کے ساتھ اسکول، مسجد، بینکوئٹ ہال، پیٹرول اسٹیشن اور کمرشل دکانوں سمیت دیگر سہولیات کی فراہمی بھی اہمیت رکھتی ہے۔ ان منصوبوں سے حاصل ہونے والی آمدن کو اسی نظام کی بہتری اور مقامی محنت کشوں کی فلاح و بہبود پر خرچ کیا جانا چاہیے تاکہ یہ منصوبہ خود کفیل بن سکے۔بیرسٹر عقیل ملک نے کہا کہ حلقے کے تمام محنت کش ان کے لیے برابر اہمیت رکھتے ہیں، خواہ ان کا تعلق ٹیکسلا سے ہو، ایچ ایم سی سے ہو یا پی او ایف سے۔ انہوں نے کہا کہ مزدوروں کے حقوق کے معاملے میں کسی قسم کی تفریق نہیں ہونی چاہیے اور تمام مستحقین کو یکساں بنیادوں پر دیکھا جانا چاہیے۔انہوں نے منصوبے کے تاریخی پس منظر کا ذکر کرتے ہوئے کہا کہ 2007 اور 2008 میں پاکستان مسلم لیگ (ق) کے دورِ حکومت میں، جب چوہدری شجاعت حسین وزیراعظم پاکستان تھے، اس منصوبے کا آغاز ہوا تھا۔ انہوں نے کہا کہ منصوبے کے آغاز میں کردار ادا کرنے والوں کے تعاون اور خدمات کو تسلیم کیا جانا چاہیے اور ایسے عوامی فلاحی منصوبوں کو سیاسی اختلافات سے بالاتر ہو کر دیکھا جانا چاہیے۔وفاقی وزیر مملکت نے مزید کہا کہ 2018 میں بھی متعلقہ سیاسی قیادت کے پاس حکومت اور وزارتوں کی ذمہ داریاں تھیں، لیکن اس منصوبے میں تاخیر برقرار رہی۔ ان کے مطابق اب فیز ٹو کا افتتاح ایک اہم پیش رفت ہے اور امید ہے کہ فیز تھری پر بھی کام آگے بڑھے گا۔انہوں نے تقریب میں شریک میڈیا نمائندوں، سیاسی رہنماؤں، کارکنوں، بزرگوں اور نوجوانوں کا شکریہ ادا کرتے ہوئے کہا کہ وہ اس منصوبے کی تکمیل کے لیے تعاون کرنے والے تمام افراد کے مشکور ہیں۔ انہوں نے اس عزم کا اظہار کیا کہ محنت کشوں کی فلاح و بہبود کے لیے ایسے اقدامات کو آگے بڑھانے کی ضرورت ہے اور منصوبے کی مزید پیش رفت کے لیے متعلقہ قیادت سے تعاون جاری رکھا جائے گا۔