سموگ کے تدارک کیلئے ستھرا پنجاب کے خصوصی اقدامات کا آغاز

لاہور (این این آئی)صوبائی دارالحکومت میں سموگ اور فضائی آلودگی پر قابو پانے کے لئے ستھرا پنجاب نے خصوصی اقدامات کا آغاز کر دیا، شہر میں 10اینٹی سموگ اور مسٹ گنز فعال کر دی گئیں، جن کے ذریعے مختلف علاقوں میں پانی کا چھڑکائو جاری ہے۔رکشوں پرنصب مسٹ گنز پانی کے چھڑکائو کے ذریعے گرد و غبار کو بٹھانے میں معاون ثابت ہوں گی، جبکہ اینٹی سموگ گنز کو شہر کی سڑکوں کی دھلائی کے آپریشن میں بھی استعمال کیا جائے گا۔حکام کے مطابق چمکتا لاہور مہم کے تحت شہر کی 100 اہم شاہراہوں اور مقامات کی خصوصی صفائی کی جائے گی۔ اس مقصد کے لئے لاہور کی 648کلومیٹر سڑکوں کی دھلائی کا منصوبہ بھی تیار کر لیا گیا ہے۔منصوبے کے تحت کمرشل مارکیٹس، عوامی مقامات، سڑکوں اور فٹ پاتھوں کی صفائی اور دھلائی ترجیحی بنیادوں پر یقینی بنائی جائے گی۔