لاہور (این این آئی)چیف سیکرٹری پنجاب زاہد اختر زمان نے کہا ہے کہ وزیراعلیٰ مریم نواز شریف
کے ڈیجیٹل پنجاب اقدامات کا دائرہ تعلیمی اور نیم خودمختار اداروں تک بڑھایا جا رہا ہے تاکہ دفتری امور میں شفافیت، انتظامی کارکردگی اور خدمات کی فراہمی کو بہتر بنایا جا سکے۔وہ گورنمنٹ کالج لاہور میں پانچ ڈیجیٹل سسٹمز کی افتتاحی تقریب سے خطاب کر رہے تھے۔ ان میں پنجاب حکومت کا ای فائلنگ اینڈ آفس آٹومیشن سسٹم (ای فاس)اور ادارے کے اپنے تیار کردہ چار ڈیجیٹل پورٹلز شامل ہیں۔ پنجاب حکومت نے ای فاس پنجاب انفارمیشن ٹیکنالوجی بورڈ (پی آئی ٹی بی)کے ذریعے بلامعاوضہ فراہم کیا ہے۔چیف سیکرٹری نے پنجاب کی تمام جامعات میں ای فاس کے جلد نفاذ کی ہدایت کرتے ہوئے گورنمنٹ کالج کے ڈیجیٹل نظام کو دیگر جامعات کے لیے قابل تقلید قرار دیا۔ انہوں نے کہا کہ گورنمنٹ کالج دیگر تعلیمی اداروں کو بھی اپنے تجربے اور تکنیکی مہارت سے فائدہ پہنچائے۔زاہد اختر زمان نے کہا کہ سرکاری دفاتر میں ای فائلنگ سے فائلوں کی نقل و حرکت کی نگرانی آسان، ریکارڈ محفوظ اور دفتری امور میں تاخیر کم ہوئی ہے۔
