اسلام آباد(نیوز ایجنسیاں ) نائب وزیراعظم اور وزیر خارجہ سینیٹر محمد اسحاق ڈار کی زیر صدارت اضافی چینی کی برآمد سے متعلق کابینہ کمیٹی کا اجلاس منعقد ہوا، جس میں ملک بھر میں چینی کی مجموعی طلب، دستیابی اور رسد کی صورتحال کا تفصیلی جائزہ لیا گیا۔اجلاس کے دوران چینی کی موجودہ پیداوار اور کھپت کے تخمینوں پر غور کیا گیا، جبکہ سپلائی چین کے انتظامات کا بھی جائزہ لیا گیا تاکہ ملک کی مقامی منڈیوں میں چینی کی بلاتعطل فراہمی یقینی بنائی جاسکے۔اس موقع پر اسحاق ڈار نے متعلقہ حکام کو ہدایت کی کہ ملک بھر کی مارکیٹوں میں چینی کی قیمتوں کو مستحکم رکھنے کے لئے ضروری اقدامات کیے جائیں۔انہوں نے کہا کہ وزیراعظم کی ہدایات کے مطابق حکومت عوام کو سہولت فراہم کرنے اور صارفین کو مہنگائی کے اثرات سے محفوظ رکھنے کے لئے تمام ممکنہ اقدامات کرنے کے عزم پر قائم ہے۔نائب وزیراعظم کا کہنا تھا کہ حکومت کی کوششوں میں عام صارفین کو ریلیف دینے کے ساتھ کسانوں کے مفادات کا تحفظ بھی شامل ہے، اس لئے متعلقہ ادارے دونوں پہلوئوں کو مدنظر رکھتے ہوئے اپنی ذمہ داریاں ادا کریں۔اجلاس میں وزیر برائے قومی غذائی تحفظ و تحقیق، معاون خصوصی وزیراعظم طارق باجوہ، سیکریٹریز تجارت، قومی غذائی تحفظ و تحقیق اور قانون و انصاف سمیت متعلقہ وزارتوں اور محکموں کے اعلی حکام نے شرکت کی۔دریں اثناء نائب وزیراعظم اسحاق ڈار نے کہا ہے کہ پٹرول 133 ، ڈیزل میں 162 روپے لٹر کمی کرکے عوام کو بڑا ریلیف دیا۔سماجی رابطے کی ویب سائٹ ایکس پر اپنے پیغام میں اسحاق ڈار کا کہنا تھا کہ ایران امریکا تنازع کے دوران 3 اپریل 2026 کو پٹرول کی قیمت 458 روپے اور ڈیزل کی قیمت 520 روپے فی لٹر تک پہنچ گئی تھی۔انہوں نے کہا کہ حکومتی اقدامات اور عالمی منڈی میں قیمتوں میں کمی کے باعث 18 نومبر کو پٹرول 325 روپے اور ڈیزل 358 روپے فی لٹر ہو گیا۔نائب وزیراعظم کا کہنا تھا کہ پٹرول کی قیمت میں 133 روپے جبکہ ڈیزل کی قیمت میں 162 روپے فی لیٹر کمی ہوئی ہے، وزیراعظم شہباز شریف کی قیادت میں حکومت نے پٹرولیم پالیسی میں اصلاحات اور دیگر اقدامات کے ذریعے عوام کو ریلیف فراہم کیا۔اسحاق ڈار نے کہا کہ موٹر سائیکل گاڑیوں اور 800 سی سی تک کی گاڑیوں کے لیے فیول سبسڈی سکیم جاری ہے، اس سکیم سے مستفید ہونے والوں کی تعداد ایک کروڑ 60 لاکھ سے تجاوز کر گئی ہے۔ان کا مزید کہنا تھا کہ حکومت عالمی چیلنجز کے باوجود عام آدمی پر مالی بوجھ کم کرنے کے لیے ہر ممکن اقدامات جاری رکھے گی۔
چینی
