برسلز(این این آئی)یورپی پارلیمنٹ نے عالمی حدت میں اضافے کو روکنے، صاف توانائی کے استعمال کو فروغ دینے کے لیے یورپی منڈی میں داخل ہونے والی صنعتی مصنوعات پر نیا ماحولیاتی کاربن ٹیکس نافذ کرنے کا قانون حتمی طور پر منظور کر لیا ہے۔ غیر ملکی خبر رساں ادارے کے مطابق برسلز میں ہونے والے اجلاس میں اراکینِ پارلیمنٹ نے بھاری اکثریت سے اس بل کی منظوری دی جس کے تحت بیرونِ ملک سے درآمد کیے جانے والے اسٹیل، سیمنٹ، ایلومینیم، کیمیائی کھادوں پر پیداواری اخراج کے مطابق اضافی محصول عائد کیا جائے گا۔ یورپی کمیشن نے واضح کیا کہ اس قانون کا مقصد یورپی صنعتوں کو تحفظ فراہم کرنا، دنیا بھر کے کارخانہ داروں کو ماحول دوست ٹیکنالوجی اپنانے پر مجبور کرنا ہے۔
