اسلام آباد(اے این این) پاکستان مسلم لیگ ن کے رہنما آصف کرمانی بلا مقابلہ سینیٹر منتخب ہوگئے۔ سینیٹ کی یہ نشست پیپلز پارٹی چھوڑ کر پاکستان تحریک انصاف میں شامل ہونے والے ڈاکٹر بابر اعوان کے مستعفی ہونے کے بعد خالی ہوئی تھی۔الیکشن کمیشن کے مطابق بابر اعوان کے استعفے کے بعد ان کی نشست کے لیے آصف کرمانی کے علاوہ مسلم لیگ (ن) کے رہنما محمد نعمان اور آزاد امیدوار سرفراز قریشی نے کاغذات جمع کرائے تھے۔تاہم محمد نعمان نے اپنے کاغذات نامزدگی واپس لے لیے جبکہ آزاد امیدوار سرفراز قریشی کے کاغذات اعتراض کے بعد مسترد کردیئے گئے، جس کے بعد آصف کرمانی کو بلا مقابلہ سینیٹر منتخب کردیا گیا۔آصف کرمانی کے مقابلے پر پاکستان تحریک انصاف، پیپلز پارٹی اور مسلم لیگ ق سمیت کسی اپوزیشن پارٹی نے امیدوار کھڑا نہیں کیا۔مذکورہ نشست کے لیے آزاد امیدوار خرم قریشی نے کاغذات نامزدگی جمع کروائے تاہم وہ تکنیکی بنیادوں پر مسترد کر دیے گئے تھے جبکہ ن لیگ کے ایک اور امیدوار ملک نعمان احمد لنگڑیال نے اپنے کاغذات نامزدگی واپس لے لیے تھے۔آصف کرمانی کے منتخب ہونے کے بعد مسلم لیگ ن 27 ارکان سینیٹ کے ساتھ ایوان میں پہلے نمبر پر آگئی جبکہ پیپلز پارٹی کا دوسرا نمبر ہے۔آصف کرمانی اس سے قبل وزیر اعظم کے معاون خصوصی برائے سیاسی امور کے طور پر کام کر رہے تھے۔واضح رہے کہرواں سال جون میں سینیٹر اور سابق وفاقی وزیرِ قانون ڈاکٹر بابر اعوان نے پی پی پی سے 21 سالہ رفاقت کو ختم کرتے ہوئے پی ٹی آئی میں شمولیت کا اعلان کیا تھا، انھوں نے یہ اعلان اسلام آباد میں پی ٹی آئی کے چیئرمین عمران خان کے اعزاز میں دی گئی افطار پارٹی کے موقع پر کیا تھا۔
