بھوبنیشور(سپورٹس ڈیسک)14ویں ہاکی ورلڈکپ میں میزبان بھارت نے جنوبی افریقہ کو یکطرفہ مقابلے کے بعد 5-0سے شکست دیدی،بلجیم نے کینیڈاکیخلاف 2-1سے فتح نام کی۔بھارت کے شہر بھوبنیشورمیں 14ویں ہاکی ورلڈکپ کے پہلے روزگروپ سی میں میزبان بھارت نے جنوبی افریقہ کیخلاف عمدہ کھیل کامظاہرہ کیا اور حریف ٹیم کو سنبھلنے کاکوئی موقع نہ دیا۔ پہلے کوارٹر کے10ویں منٹ میںمندیپ سنگھ نے بھارتی ٹیم کو سبقت دلائی۔2منٹ بعدآکاش دیپ نے برتری دوگنا کردی۔تیسرے کوارٹرمیںسمرن جیت اورلالت اپادیو نے گول کرکے سکور4-0کردیا۔آخری کوارٹرمیں سمرن نے ایک اورگول کرکے بھارت کو5-0سے فتح سے ہمکنارکرادیا۔گروپ سی کے ایک اورمیچ میں بلجیم نے کینیڈاکو2-1سے قابوکیا۔فاتح ٹیم کےلئے فیلکس اورتھامس نے گول سکورکیے۔ ٹورنامنٹ میں آج پول اے کے دو میچ کھیلے جائینگے۔ اس سلسلے میں پہلا میچ ارجنٹائن اور سپین کی ٹیموں کے درمیان کھیلا جائیگا جبکہ دوسرا میچ نیوزی لینڈ اور فرانس کی ٹیموں کے درمیان کھیلا جائیگا۔ میگا ایونٹ 19 روز تک جاری رہنے کے بعد 16 دسمبر کو اختتام پذیر ہوگا۔ میگا ایونٹ میں دنیا بھر سے 16 ٹیمیں ٹائٹل کے حصول کے لئے پنجہ آزمائی کرینگی جن میں میزبان بھارت کے علاوہ پاکستان، ارجنٹائن، نیوزی لینڈ، سپین، فرانس، دفاعی چیمپئن آسٹریلیا، انگلینڈ، آئرلینڈ، چائنا، بیلجیئم، کینیڈا، جنوی افریقہ، ہالینڈ، جرمنی اور ملائیشیا شامل ہیں۔ عالمی چیمپئن آسٹریلیا کی ٹیم میگا ایونٹ میں ٹائٹل کا دفاع کررہی ہے۔

لاہور(سپورٹس رپورٹر)پی ایف ایف انتخابات میں فیصل حیات کو شکست دینے کے لئے عامرڈوگر اور ظاہر شاہ نے اتحاد کرلیا۔پاکستان فٹبال فیڈریشن کے انتخابات میں نیا موڑ آگیا ،انتخابات میں حصہ لینے والے دواہم گروپس ملک عامر ڈوگر اور سید ظاہر علی شاہ نے آپس میں الائنس کر لیا، دونوں عہدیداروں کے درمیان ایک معاہدہ طے پایا ہے جس میں دونوں دھڑوں نے ملکر 14 سال سے پی ایف ایف پر قابض فیصل صالح حیات کے خلاف الیکشن لڑنے کا فیصلہ کیا ہے۔ اس حوالے سے معاملات ملک عامر ڈوگر ایم این اے اور سید ظاہر علی شاہ کے درمیان اسلام آباد میں ہونے والی ملاقات میں طے پا گئے جس میں پنجاب فٹبال ایسوسی ایشن کے صدر سردارنوید حیدر خان بھی موجود تھے۔ذرائع کے مطابق کر جلد ہی ایک اور میٹنگ کا اہتمام بھی کیا جائے گا جس میں الیکشن میں سیٹ ایڈجسٹمنٹ کے حوالے سے بات چیت کی جائے گی ۔الیکشن میں اگر ایک گروپ کا صدر ہوگا تو دوسرے گروپ سے سینئر نائب صدر لیا جائے گا۔ پی ایف ایف کے حوالے سے تازہ ترین ملاقات کے بعد آئندہ ہونے والے انتخابات میں ڈیپارٹمنٹس کے 9ووٹ،کے پی کے کے 3 ووٹ،پنجاب کے 3ووٹ اور ممکنہ طور پر اسلام آباد، بلوچستان اور ریفری کمیشن کے ووٹ بھی اب ملک عامر ڈوگر کو جاتے نظر آرہے ہیں۔مزید معلوم ہوا ہے کہ پنجاب فٹبال ایسوسی ایشن کے صدر سردار نوید حیدر خان نے ایسوسی ایشن کے آٹھ ارکان کو شوکازنوٹس جاری کرنے کا فیصلہ کیا ہے۔نوٹس میں موقف اختیار کیا جائے گا کہ ان ارکان کی غیر قانونی اور غیر آئینی میٹنگ تھی اور ان ارکان نے ریٹرننگ افسر پر جانبداری کا الزام لگا کر الیکشن پر اثرانداز ہونے کی کوشش کی ہے، شوکاز نوٹس کی ایک کاپی سپریم کورٹ آف پاکستان کو بھی بھجوائی جائے گی۔

لاہور (سپورٹس رپورٹر) پاکستان ہاکی فیڈریشن کے سیکرٹری شہباز احمد سینئر نے کہا ہے کہ عالمی کپ ہاکی ٹورنامنٹ کیلئے نوجوان کھلاڑیوں پر مشتمل ٹیم کو بھجوایا ہے، توقع ہے کہ وہ ایونٹ میں شاندار کارکردگی کا مظاہرہ کرکے کامیابی کے ساتھ وطن واپس لوٹیں گے، پاکستانی ٹیم اپنا پہلا میچ یکم دسمبر کو جرمنی کے خلاف کھیلے گی۔ ایک انٹرویو میںانہوں نے کہا کہ فیڈریشن نے عالمی ہاکی کپ کیلئے تربیتی کیمپ میں باصلاحیت کھلاڑیوں کا انتخاب کرکے نوجوان کھلاڑیوں پر مشتمل ٹیم کو بھارت بھجوایا ہے، تمام کھلاڑی کا فٹنس لیول ٹھیک ہے اور قوم کی ان سے اچھی توقعات وابستہ ہیں۔ شہباز احمد سینئر نے کہا کہ ایونٹ کیلئے زیادہ تر نوجوان کھلاڑیوں کو ٹیم میں شامل کیا گیا ہے اور بھارتی سرزمین پاکستان کیلئے سازگار ہو گی، امید ہے کہ قومی ٹیم عالمی کپ میں عمدہ کارکردگی کا مظاہرہ کرکے کامیابی کے ساتھ وطن واپس لوٹے گی۔ واضح رہے 14 واں عالمی کپ ہاکی ٹورنامنٹ بھارتی ریاست اڑسیہ کے دارالحکومت بھوبنشوار میں شروع ہو گیا ہے۔ میگا ایونٹ 19 روز تک جاری رہنے کے بعد 16 دسمبر کو اختتام پذیر ہو گا۔ میگا ایونٹ میں دنیا بھر سے 16 ٹیمیں ٹائٹل کے حصول کےلئے میدان میں اتریں گی جن میں میزبان بھارت کے علاوہ پاکستان، ارجنٹائن، نیوزی لینڈ، سپین، فرانس، دفاعی چیمپئن آسٹریلیا، انگلینڈ، آئرلینڈ، چائنا، بیلجیئم، کینیڈا، جنوی افریقہ، ہالینڈ، جرمنی اور ملائیشیا شامل ہیں۔

عالمی چیمپئن آسٹریلیا کی ٹیم میگا ایونٹ میں ٹائٹل کا دفاع کریگی۔ 14ویں عالمی کپ میں شرکت کرنے والی 16 ٹیموں کو چار مختلف پولز میں تقسیم کیا گیا ہے۔ پول اے میں ارجنٹائن، نیوزی لینڈ، سپین اور فرانس کو رکھا گیا ہے، پول بی میں دفاعی چیمپئن آسٹریلیا، انگلینڈ، آئرلینڈ اور چین کو رکھا گیا ہے، پول سی میں بیلجیئم، میزبان بھارت، کینیڈا اور جنوبی افریقہ کو رکھا گیا ہے جبکہ پول ڈی میں ہالینڈ، جرمنی، ملائیشیا اور پاکستان کو رکھا گیا ہے۔ پاکستان کی ٹیم اپنا پہلا میچ یکم دسمبر کو جرمنی کے خلاف کھیلے گی۔ واضح رہے کہ پاکستان کی ٹیم ہاکی کا میگا ایونٹ سب سے زیادہ چار مرتبہ اپنے نام کرچکی ہے، آسٹریلیا اور ہالینڈ کی ٹیمیں یہ اعزاز تین ، تین مربتہ جیت چکی ہیں۔ جرمنی کی ٹیم دو مرتبہ جیت چکی جبکہ میزبان بھارتی ٹیم اب تک ایک مربتہ یہ اعزاز جیت سکی ہے۔

لاہور(ویب ڈیسک) لاہور قلندرز کی انتظامیہ پرامید ہے کہ جنوبی افریقی کرکٹ ٹیم کے سابق کپتان اے بی ڈی ویلیئرز ٹورنامنٹ کے تمام میچز کھیلیں گے اور پاکستان میں ہونےوالے 8 میچوں کیلئے بھی دستیاب ہوں گے۔ذرائع کا کہنا ہے کہ ڈی ویلیئرز کی پاکستان سپر لیگ (پی ایس ایل) میں شمولیت سے لاہور قلندرز کو سپانسرز کی جانب سے اچھا رسپانس مل رہا ہے۔
لاہور قلندرز کے چیف ایگزیکٹو آفیسر (سی ای او) رانا عاطف کا کہنا ہے کہ آئی سی سی کے سابق سربراہ ہارون لورگاٹ براہ راست ڈی ویلیئرز کےساتھ رابطے میں ہیں جو انہیں پاکستان آنے کیلئے قائل کر لیں گے۔رانا عاطف نے کہا ہے کہ ڈی ویلیئرز کی شمولیت سے ہماری ٹیم کا توازن بہتر ہوگیا ہے اور ہم پر امید ہیں کہ پاکستان سپر لیگ کے چوتھے ایڈیشن میں ہماری ٹیم بہتر کارکردگی کا مظاہرہ کرے گی۔انہوں نے کہا کہ سابق آسٹریلوی کپتان سٹیو سمتھ چونکہ پورے ٹورنامنٹ کےلئے دستیاب نہیں تھے اس لئے ہم نے ایسے غیر ملکی کھلاڑی کو لیا جو پی ایس ایل میں ہماری ٹیم میں اپنی کارکردگی سے جان ڈال سکے۔واضح رہے کہ سٹیو سمتھ پاکستان سپر لیگ(پی ایس ایل ) سے قبل پانچ جنوری کو شروع ہونے والی بنگلہ دیش پریمیئر لیگ(بی پی ایل) میں شرکت کریں گے۔ سٹیو سمتھ اور شعیب ملک کومیلا وکٹورین کی نمائندگی کریں گے۔یادرہے کہ 20نومبر کو ہونےوالے ڈرافٹ میں تمام ٹیموں نے پی سی بی کی جانب سے دی گئی 600سے زائد کرکٹرز کی فہرست میں سے اپنے 16رکنی اسکواڈز مکمل کرنے کیساتھ سپلیمنٹری پلیئرز بھی منتخب کرلیے جو کسی کھلاڑی کی انجری یا عدم دستیابی کی صورت میں طلب کیے جاسکیں گے۔لاہور قلندرز نے 8کرکٹرز کو برقرار رکھا تھا، پلاٹینم کیٹیگری میں فخر زمان اور ڈائمنڈ میں یاسر شاہ کی خدمات حاصل کرنےکا فیصلہ کیا گیا، اینٹن ڈیوچ، راحت علی( گولڈ) ، شاہین شاہ آفریدی(ایمبیسیڈر) تنزلی کے بعد سلور جبکہ حسان خان، آغا سلمان، سہیل اختر (سلور) کو بھی شامل کرلیا گیا تھا۔قلندرز نے کوئٹہ کیساتھ ٹریڈنگ کرتے ہوئے عمراکمل اور سنیل نارائن کے بدلے میں حسان خان اور راحت علی کو لیا تھا۔ڈرافٹ میں لاہور نے پلاٹینم میں اے بی ڈی ویلیئرز اور محمد حفیظ، ڈائمنڈ میں کارلوس بریتھ ویٹ اور کورے اینڈرسن، گولڈ میں سندیپ کلامی چین، سلور میں حارث سہیل جبکہ ایمرجنگ پلیئرز میں محمد عمران اور عمیر مسعود کو منتخب کیا۔سابق ملتان سلطانز اور موجودہ پی ایس ایل کی ’چھٹی ٹیم‘میں 8کرکٹرز برقرار رکھے، پلاٹینم کیٹیگری میں صرف شعیب ملک (کپتان) کو دوبارہ بھی شامل رکھا گیا، محمد عرفان پلاٹینم سے تنزلی کے بعد ڈائمنڈ کیٹیگری میں ایمبیسیڈر کے طور پر رکھا گیا، جنید خان بھی اسی کیٹیگری میں رکھے گئے، شان مسعود (گولڈ)، محمد عباس، محمد عرفان خان اور عمر صدیق (سلور) اور محمد جنید (ایمرجنگ) کیٹیگری میں لیے گئے۔ڈرافٹ میں ”چھٹی ٹیم“ کی جانب سے پلاٹینیم کیٹیگری میں شاہد آفریدی اور سٹیو سمتھ کو چنا، جنید خان، جوئے ڈینلی (ڈائمنڈ)، قیس احمد، نکولس پوران(گولڈ)، لاری ایونز، نعمان علی (سلور) جبکہ محمد الیاس (ایمرجنگ) کیٹیگری میں منتخب کیے گئے۔گزشتہ برس کی فاتح ٹیم اسلام آباد یونائیٹڈ نے سب سے زیادہ 10کرکٹرز کو برقرار رکھا، پلاٹینم کیٹیگری میں شامل تینوں کھلاڑی لیوک رونکی، شاداب خان اور فہیم اشرف، محمد سمیع اورآصف علی(ڈائمنڈ)، رومان رئیس (ڈائمنڈ سے گولڈ تنزلی)، حسین طلعت(سلور، ایمبیسیڈر)، صاحبزادہ فرحان، ظفرگوہر اور وقاص مقصود(سلور) بھی موجود رہے۔اسلام آباد نے ای ڈرافٹ میں این بیل (ڈائمنڈ)، سمت پٹیل اور فل سالٹ (گولڈ)، کیمرون ڈیلپورٹ (سلور) جبکہ موسیٰ خان اور ناصر نواز (ایمرجنگ) کا انتخاب کیا۔کراچی کنگز نے 8کرکٹرز کو برقرار رکھا تھا، پلاٹینم کیٹیگری میں محمد عامر، بابر اعظم اور کولن منرو، کولن انگرام (ڈائمنڈ، ایمبیسیڈر)، عثمان خان شنواری، عماد وسیم(ڈائمنڈ)، روی بوپارا اور محمد رضوان(گولڈ) کو بھی برقرار رکھا گیا۔کراچی نے ڈرافٹ میں سکندر رضا (گولڈ)، اویس ضیائ ، سہیل خان، اسامہ میر، ایرون سمرز اورافتخار احمد (سلور) جبکہ علی عمران اور ابرار احمد (ایمرجنگ) کیٹیگری میں منتخب کیے۔کوئٹہ گلیڈی ایٹرز نے 9 کرکٹرزکو برقرار رکھا تھا، کپتان سرفراز احمد کیساتھ، ٹریڈنگ میں حاصل ہونےوالے سنیل نارائن کو پلاٹینم کیٹیگری میں شامل ہیں، آسٹریلوی آل را?نڈر شین واٹسن(مینٹور اور ڈائمنڈ پلیئر لیے گئے، ملتان سلطانز سے حاصل کیے جانےوالے سہیل تنویرکیساتھ محمد نواز(ڈائمنڈ)، رلی روسو (ایمبیسیڈر،گولڈ)، عمراکمل (گولڈ)، انور علی اور سعود شکیل (سلور) کو بھی برقرار رکھا گیا، انور علی کی گولڈ سے تنزلی ہوئی۔کوئٹہ نے ڈرافٹ میں ڈیوائن براوو (پلاٹینیم)، فواد احمد (گولڈ) محمد اصغر، دانش عزیز، احسن علی (سلور) جبکہ غلام مدثر اور نسیم شاہ (ایمرجنگ)کیٹیگری میں چنے۔پشاور زلمی نے 8کو برقرار رکھا تھا، پلاٹینیم کیٹیگری میں صرف پیسرز وہاب ریاض اور حسن علی کی خدمات حاصل کرنے کا فیصلہ کیا گیا، ڈیرن سیمی (ڈائمنڈ) اور کامران اکمل( ایمبیسیڈر، ڈائمنڈ) بھی شامل ہیں، لیام ڈاسن (گولڈ)، عمید آصف،خالد عثمان(سلور)اور ثمین گل(ایمرجنگ) بھی برقرار رکھے گئے، کامران اکمل کی تنزلی ہوئی لیکن ایمبیسیڈر بنادیا گیا، احمد شہزاد سپلیمنٹری پلیئر کے طور پر شامل کرلیے گئے۔ڈرافٹس میں پشاور نے کیرون پولارڈ (پلاٹینیم)، مصباح الحق (ڈائمنڈ)، ڈیوڈ میلان، عمر امین (گولڈ)، وائن میڈسن، صہیب مقصود، جمال انور (سلور) جبکہ ثمین گل، نبی گل (ایمرجنگ) کیٹیگری کیلئے منتخب کیے۔ واضح رہے کہ پاکستان سپر لیگ کے چوتھے ایڈیشن کا آغاز 14فروری کو رنگارنگ افتتاحی تقریب کیساتھ یواے ای میں ہوگا۔

لاہور(ویب ڈیسک ) قومی ٹیم کے لیگ سپنر یاسر شاہ ٹیسٹ وکٹوں کی تیز ترین ڈبل سنچری کے عالمی ریکارڈ کے قریب پہنچ گئے ہیں۔تفصیلات کے مطابق پاکستان اور نیوزی لینڈ کے مابین تین ٹیسٹ میچز کی سیریز 1-1سے برابر ہوگئی ہے اور پاکستان کے پچھلے کئی میچز سے ٹاپ سپنر یاسر شاہ کی پرانی فارم ایک بار پھر بحال ہوگئی ہے۔32سالہ یاسر شاہ اب تک ٹیسٹ میچز میں 32 ٹیسٹ میچز کھیل کر 195 وکٹیں حاصل کر چکے ہیں اور ان کی وکٹیں حاصل کرنے کی اوسط 28.23 ہے۔یاسر شاہ اب تک 3 مین آف دی میچز جبکہ 4 مین آف دی سیریز کا ایوارڈ بھی حاصل کر چکے ہیں۔اب پاکستان کے بہترین لیگ سپنر کو ایک اور ریکارڈ توڑنے کا چیلنج درپیش ہے جس کے لئے ان کے پاس 3 میچز باقی ہیں جس میں یاسر شاہ کو5 وکٹیں درکار ہیں۔اگر یاسر شاہ اپنے اگلے 3 ٹیسٹ میچز میں 5 وکٹیں حاصل کرنے میں کامیاب ہو جاتے ہیں تو وہ تیز ترین 200 وکٹیں حاصل کرنے کا 82 سال پرانا ریکارڈ توڑ ڈالیں گے۔اس سے پہلے یہ ریکارڈ آسٹریلیا کے کلیری گریمٹ کے پاس ہے جنہوں نے1936ءمیں 36 ٹیسٹ میچز میں 200 وکٹیں حاصل کر کے یہ ریکارڈ قائم کیا تھا۔اگلے 3 ٹیسٹ میچز میں یاسر شاہ نے ایک ٹیسٹ نیوزی لینڈ کے خلاف کھیلنا ہے جب کہ اس کے بعد تین ٹیسٹ میچز جنوبی افریقہ کے خلاف دسمبر اور جنوری میں کھیلے جائیں گے۔32سالہ یاسر شاہ اگرتین ٹیسٹ میچز میں یہ کارنامہ سر انجام نہیں دے پاتے تو چھ ٹیسٹ میچز میں 200 وکٹیں حاصل کرنے کی صورت میں بھی وہ یہ 82 سال پرانا ریکارڈ برابر کر دیں گے۔یاد رہے کہ اب تک پہلے نمبر پر آسٹریلیا کے کلیری گریمٹ جب کہ دوسرے نمبر پر بھارت کے آف سپنر روی چندرن ایشون ہیں جنہوں نے 37 میچز میں 200 وکٹیں مکمل کی تھیں۔لیجنڈری قومی فاسٹ باﺅلر وقار یونس نے38میچز میں 200شکار مکمل کیے تھے۔