ملتان (سپیشل رپورٹر) انتہائی باوثوق ذرائع سے معلوم ہوا ہے کہ وزیراعظم پاکستان عمران خان کی فوری مداخلت سے جنوبی پنجاب کے لئے قائم کئے جانے والے سب سیکرٹریٹ کی اندر خانے بہاولپور منتقلی کا معاملہ رک گیا ہے اور روزنامہ ”خبریں“ کی خبر پر وزیراعظم نے فوری مداخلت کرتے ہوئے جہانگیر ترین کو ہدایات جاری کیں کہ اس چیز کی وضاحت کروائیں کہ جنوبی پنجاب کا سیکرٹریٹ ملتان میں ہی بنے گا اور اس حوالے سے کسی کے اندرونی سازش کے کھیل کو کامیاب نہیں ہونے دیں گے۔ یاد رہے کہ روزنامہ ”خبریں“ کی خبر کو ملتان سے تعلق رکھنے والے الیکٹرانک میڈیا کے نمائندگان نے آن ائیر کیا اور ”خبریں“ کی خبر ٹاک آف دی ٹاﺅن بن گئی۔ جنوبی پنجاب کے ہیڈ کوارٹر ملتان، ڈیرہ غازیخان، مظفرگڑھ، خانیوال اور دیگر علاقوں سے علیحدہ صوبے کے حق میں کام کرنے والی تنظیموں کی طرف سے شدید ردعمل آیا اور روزنامہ ”خبریں“ کو خراج تحسین پیش کرتے ہوئے کہا کہ سازش بے نقاب کرکے اس کھیل کو ختم کردیا اور ”خبریں“ حقیقی طور پر جنوبی پنجاب کا ترجمان ثابت ہوا ہے۔ روزنامہ ”خبریں“ نے گزشتہ روز شائع ہونے والی خبر میں اس کھیل کو بے نقاب کرتے ہوئے بتایا تھا کہ جنوبی پنجاب صوبے کے لئے بنائی گئی کمیٹی کے سربراہ چودھری طاہر بشیر چیمہ اپنے بڑے بھائی طارق بشیر چیمہ، سپیکر پنجاب اسمبلی پرویز الٰہی کی جہاں مکمل حمایت حاصل ہے وہاں انہوں نے رحیم یار خان کے معروف صنعت کار اور مریم نواز کے سمدھی چودھری منیر کو بھی پیغام بھجوایا تھا کہ بہاولپور کے لئے آپ کے ارکان اسمبلی خاموشی اختیار کریں دوسری طرف نااہل ہونے سے پہلے جہانگیر ترین جو پنجاب کے وزارت اعلیٰ کے مضبوط امیدوار تھے اُن کی کوشش تھی ملتان اور بہاولپور کے درمیان لودھراں میں ضلعی ہیڈ کوارٹر بنا دیا جائے جس پر لوگ خاموشی اختیار کرلیں گے اور سرکاری اراضی بھی موجود ہے اس کمیٹی میں ملتان کی نمائندگی نہ ہونے کے برابر تھی اور کمیٹی کے سربراہ طاہر بشیر چیمہ نے راجن پور سے تعلق رکھنے والے کمیٹی ممبران کی بھی حمایت حاصل کرلی تھی۔ چاچڑاں شریف پر راجن پور اور خان پور کے درمیان پل بننے سے راجن پور سے بہاولپور کا سفر نصف رہ جاتا ہے اور اگر ہیڈ پنجند سے نیچے ترنڈہ کے مقام پر دریائے سندھ کے درمیان ایک اور پل بن جائے تو راجن پور اور بہاولپور جڑواں شہر بن سکتے ہیں پھر راجن پور کا ہمیشہ سے زیادہ تعلق بہاولپور سے زیادہ رہا ہے اور راجن پور کے اکثر لوگ خریداری کے لئے خان پور اور رحیم یار خان جاتے ہیں اور پھر سب سے اہم بات یہ ہے کہ راجن پور کے اہم افراد نے اپنا دوسرا گھر رحیم یار خان میں بنا رکھا ہے اور ملتان سے روابط کم ہیں اور لاہور زیادہ اہمیت رکھتا ہے۔ اس طرح راجن پور کی حمایت کے بعد کمیٹی کی اکثریت بہاولپور کو صوبائی سیکرٹریٹ بنانے کے حق میں ہوگئی تھی مگر روزنامہ ”خبریں“ میں یہ سارے تانے بانے منظر عام پر آنے کے بعد باوثوق ذرائع نے کنفرم کیا ہے وزیراعظم عمران خان نے فوری مداخلت کرکے جہانگیر ترین کے ذریعے یہ پیغام بھجوایا ہے کہ صوبائی سب سیکرٹریٹ ملتان میں ہی قائم ہوگا جس سے عارضی طور پر یہ بحث 24 گھنٹے کے اندر نیا رخ اختیار کرگئی ہے۔ یاد رہے کہ سرائیکی تنظیموں کی طرف سے سوموار کے دن سے اس فیصلہ کے خلاف منصوبہ بھی بنایا گیا تھا۔ لودھراں سے ڈسٹرکٹ رپورٹر، سٹی رپورٹر اور نامہ نگار کے مطابق پاکستان تحریک انصاف کے مرکزی رہنما جہانگیر خان ترین نے کہا ہے کہ میری جانب سے بہاولپور میں صوبہ جنوبی پنجاب سب سیکرٹریٹ کے قیام کی حمایت کی خبریں بے بنیاد ہیں۔ اپنے بیان میں جہانگیر خان ترین نے کہا کہ وزیراعظم عمران خان نے فیصلہ کرلیا ہے کہ صوبہ جنوبی پنجاب کا سب سیکرٹریٹ ملتان میں ہی قائم ہوگا اور میں عمران خان کے اس فیصلے کی مکمل حمایت کرتا ہوں۔ جہانگیر ترین نے کہا کہ ملتان جنوبی پنجاب کا سب سے بڑا اور مرکزی شہر ہے اور جنوبی پنجاب کے لوگوں کی ملتان تک رسائی بہاولپور کی نسبت آسان ہے۔ جہانگیر ترین نے کہا کہ پاکستان تحریک انصاف نے الیکشن سے قبل سب سے پہلے جنوبی پنجاب صوبے کے قیام، صوبے کی حمایت کا اعلان کیا تھا اور تحریک انصاف کے 100 روزہ پلان میں صوبہ جنوبی پنجاب کا قیام شامل ہے۔ جہانگیر ترین نے کہا کہ جنوبی پنجاب صوبہ بننے سے قبل سول سیکرٹریٹ اپنا کام شروع کردے گا۔
سیکرٹریٹ

لاہور (خبر نگار) قومی احتساب بیورو (نیب ) نے قومی اسمبلی میں قائد حزب اختلاف و سابق وزیر اعلیٰ پنجاب محمد شہباز شریف کے خلاف رمضان شوگر ملز کیس میں بھی گھیرا تنگ کر دیا ،محکمہ پلاننگ اینڈ ڈویلپمنٹ سے رمضان شوگر مل کے لیے جاری سات کروڑ روپے کے فنڈز کی تفصیلات طلب کر لی گئیں ۔ میڈیا رپورٹ کے مطابق نیب لاہور نے محکمہ پلاننگ اینڈ ڈویلپمنٹ پی اینڈ ڈی کو مراسلہ جاری کیا ہے کہ ان کو رمضان شوگر ملز کے لئے جاری فنڈز کی تفصیلات فراہم کی جائیں ۔رمضان شوگر ملز کے لئے نالہ بنانے کی مد میں پانچ کروڑ مختص کئے گئے بعد ازاں اس فنڈ میں دو کروڑ روپے کا اضافہ کر دیا گیا جو رمضان شوگز ملز کے لئے 2 کروڑ روپے کی سپلیمنڑی گرانٹ کے طور پر جاری کیے گئے تھے ۔نیب ذرائع کے مطابق رمضان شوگر ملز کے لئے دو کروڑ روپے سیکرٹری ہاﺅسنگ نے سپلیمنڑی گرانٹ کے طور پر جاری کئے تھے ،نیب نے ان سب رقوم کی تفصیلات پی اینڈ ڈی سے طلب کی ہیں۔

لاہور‘ پشاور‘ اسلام آباد (خبر نگار‘ نیوز ایجنسیاں) وزیراعظم عمران خان نے فٹ پاتھ پر سردی میں سونے والے بے بس لاچاروں کے لیے عارضی پناہ گاہیں بنانے کی ہدایت کر دی۔ پنجاب میں عملدرآمد شروع کردیا گیا،کراچی اور پشاور میں بھی مقامات کی نشاندہی کی جا رہی ہے۔ عوامی حلقوں کے مطابق ان محروموں کو باعزت روزگار کی فراہمی سے یہ طبقہ بھی ملک کا کارآمد شہری بن سکتا ہے۔ تفصیلات کے مطابق ملک کے صوبائی دارالحکومتوں سمیت کئی شہروں میں مال و اسباب سے محروم ہزاروں لوگ بشمول بچوںکی ایک بڑی تعداد فٹ پاتھوں پر رات بسر کرنے پر مجبورہے۔ شہری علاقوں کی فٹ پاتھوں پر سردی میں شب بسر کرنے والے لوگوںکا آخر کار ریاست کوخیال آ ہی گیا۔ تحریک انصاف کی پہلی حکومت ہے جس نے یہ اقدام اٹھایا ہے۔ پہلے مرحلے میں وزیراعظم عمران خان کی ہدایت پر صوبائی دارلحکومت لاہور میں فٹ پاتھوں پر رات بسر کرنے والوں کے لیے ہفتہ کو عارضی پناہ گاہ بن گئی یہ پناہ گاہ خیموںپر مشتمل ہے ۔گزشتہ روزوزیراعظم نے ٹوئٹ کیا تھا کہ میں نے وزیر اعلیٰ پنجاب عثمان بزدار کو ہدایت کی ہے کہ بڑھتی سردی کے پیش نظر فٹ پاتھ پر سونے والوں کے لیے ٹینٹ لگائے جائیں اور ان کو کھانا پینا مہیا کیا جائے تاوقتیکہ پناہ گاہ کی تعمیر مکمل نہیں ہو جاتی۔ وزیراعظم عمران خان نے کہا ہے کہ کراچی اور پشاور میں بھی مقامات کی نشاندہی کی جا رہی ہے۔ وزیراعلی پنجاب نے وزیراعظم کی سماجی رابطے کی ویب سائٹ سے ملنے والے پیغام پر فوری عملدآرمد کرتے ہوئے عارضی پناہ گاہ بنادی ہے اور پنجاب حکومت دیگر صوبائی حکومتوں پر بازی لے گئی عوامی حلقوں کے مطابق یہ ہے اصل عوامی خدمت ریاست کو اس پسماندہ ترین طبقہ کی کفالت کے ساتھ اپنے پاو¿ں پر کھڑا کرنے کا بندوسبت بھی کرنا چاہیے تاکہ یہ طبقہ بھی ملک کا کارآمد شہری بن سکے۔ وزیراعظم عمران خان نے سردی کی شدت میں اضافے کے پیش نظر وزیراعلیٰ پنجاب عثمان بزدار کو بے گھر، بے آسرا افراد کیلئے عارضی ٹینٹس لگوانے اور کھانا مہیا کرنے کی ہدایات کردیں۔ وزیراعظم عمران خان کی جانب سے ٹویٹ سامنے آیا ہے جس میں انہوں نے وزیراعلیٰ پنجاب عثمان بزدار کو مستقل پناہ گاہوں کی تعمیر تک بے گھر افرادکیلئے عارضی ٹینٹ لگانے کی ہدایت کردی۔ وزیراعظم کا کہنا ہے کہ سردی کی شدت میں بتدریج اضافہ ہورہا ہے اس لئے فٹ پاتھ، سڑکوں پر سونے والے افراد کو عارضی ٹینٹس میں رکھا جائے اور انہیں کھانا بھی فراہم کیا جائے۔ پشاور اور کراچی میں بھی پناہ گاہوں کی تعمیر کیلئے جگہ کی نشاندہی کرلی گئی ہے۔ شہریوں کی جانب سے بے گھر افراد کیلئے عارضی ٹینٹس قائم کروانے کے اقدام کو خوب سراہا جارہا ہے۔ انکا کہنا ہے کہ وزیراعظم کے اس اقدام کو جتنا سراہا جائے کم ہے۔ وزیر اعظم پاکستان کی ہدایت کی روشنی میں ضلعی انتظامیہ لاہور نے مسافروں اور فٹ پاتھ پر سونے والے افراد کے لیے عارضی شیلٹر ہوم ٹینٹس میں قائم کر دیئے ہیںجب تک مستقل شیلٹر ہوم تعمیر نہیں ہوتے مسافروں اور فٹ پاتھ پر سونے والے افراد کو ٹینٹس میں رکھا جائے گا۔ اس ضمن میں ضلعی انتظامیہ لاہور نے داتا دربار، سبزی منڈی، ریلوے سٹیشن اور ٹھوکر پر ٹینٹ لگا کر عارضی شیلٹر ہوم کا آغاز کر دیا ہے جہاں پر رہنے والے افراد کو کھانے کے ساتھ ساتھ ان کے سونے کا بھی بندوبست کردیا گیا ہے۔ڈی سی لاہور صالحہ سعید نے ان شیلٹرز ہوم کا رات گئے دورہ کیا اور وہاں پر خود اپنی نگرانی میں انتظامات کو مکمل کروایا۔شیلٹر ہوم میں رہنے والوں کو بستر ، کھانا وغیرہ دیاجارہا ہے جبکہ ان کی سکیورٹی کے لیے بھی مناسب انتظامات کیئے گئے ہیں۔ڈی سی لاہور صالحہ سعید نے اسسٹنٹ کمشنرز اور متعلقہ افراد کو مزید انتظامات میں بہتری لانے کی ہدایت کی ہے۔ انہوں نے مزید بتایا کہ مستقل شیلٹر ہومز کی تعمیر کا کام تیزی سے جاری ہے اور کم سے کم عرصہ میں شیلٹر ہومز کی تعمیر مکمل ہو جائے گی۔ وزیراعلیٰ خیبرپختونخوا محمود خان نے کھلے آسمان تلے فٹ پاتھوں وغیرہ پر رات گزارنے والے افراد کا ڈیٹا اکٹھا کرنے اوراُن کیلئے شیلٹر ہومزکے قیام کے حوالے سے وزیر اعظم عمران خان کے وژن اور سوچ پر عمل درآمد یقینی بنانے کیلئے انتظامات کی ہدایت کی ہے۔ اُنہوںنے اس سلسلے میں پشاور میں تین نئے شیلٹر ہومز کے قیام کی منظوری دیتے ہوئے صوبے میں پہلے سے موجود سر ائیں/ شیلٹرہومز کی بحالی کی بھی ہدایت کی ہے ۔ اُنہوںنے ڈرگ ایڈکس سنٹر کو حقیقی معنوں میں فعال بنانے کی بھی ہدایت کی اور گداگروں اور منشیات کے عاد ی افراد کو راہ راست پر لانے کی ضرورت پر زور دیا۔ وہ وزیراعلیٰ ہاﺅس پشاور میں اجلاس کی صدارت کر رہے تھے۔ چیف سیکرٹری خیبرپختونخوا نوید کامران بلوچ ، ایڈیشنل چیف سیکرٹری پی اینڈ ڈی شہزاد بنگش، پرنسپل سیکرٹری برائے وزیراعلیٰ محمد اسرار خان، سیکرٹری خزانہ شکیل قادر، کمشنر پشاوراور دیگر متعلقہ حکام نے اجلاس میں شرکت کی۔ اجلاس کو شیلٹر ہومز کے قیام کے سلسلے میں انتظامات سے آگاہ کرتے ہوئے بتایا گیا کہ اس وقت صوبے میں 11 سرائے/ پناہ گاہیں موجود ہیں ۔ جن میں سے تین پشاور میں اور باقی ریجنل ہیڈکوارٹرز میں قائم ہیںجن کو ازسر نو بحال کرنے کی ضرورت ہے۔ اجلاس میں پشاور میں تین نئے شیلٹر ہومز کے قیام کی تجویز بھی پیش کی گئی جس کی وزیراعلیٰ نے منظوری دی۔ وزیراعلیٰ نے واضح کیا کہ مختلف ہسپتالوں میں قائم سرائے وغیرہ مریضوں کے ساتھ آئے لوگوں کے قیام کیلئے ہیں جن تک عام لوگوں کی رسائی ممکن نہیں ہوتی ہمیں فٹ پاتھوں پر سونے والے مزدوروں، مسافروں و غیر ہ کے لئے شیلٹر ہومز کی ضرورت ہے ۔ وزیراعلیٰ نے کھلے آسمان تلے فٹ پاتھ وغیرہ پر رات گزارنے والے لوگوں کی نوعیت معلوم کرنے کیلئے ڈیٹا اکٹھا کرنے کی ہدایت کی تاکہ پتہ چلے کہ یہ لوگ مزدور ہیں، گداگر ہیں یا مستقل باہر رہتے ہیں ۔وزیراعظم عمران خان کی سوچ کے مطابق قابل عمل ہوم ورک کرنا ہو گا۔ اُنہوںنے پشاور میں تین نئے شیلٹر ہومز کے قیام کی منظوری دی اور ا س سلسلے میں دستیاب عمارت کو بھی استعمال میں لانے کی ہدایت کی۔ وزیراعلیٰ نے اس موقع پر پہلے سے موجود ڈرگ ایڈکس سنٹر کی بحالی کی بھی ہدایت کی جس میں 150 افراد آسانی سے لئے جا سکتے ہیں اُنہوںنے کہاکہ اس مقصد کیلئے سنٹر کو مطلوبہ سہولیات اور سٹاف دینا ہو گا۔ اُنہوںنے پشاور کے تین بڑے ہسپتالوں میں منشیات کے عادی افراد کے مناسب علاج اور نگرانی کیلئے کم ازکم دس، دس بیڈز مختص کرنے کی تجویز سے اتفاق کیا اور ہدایت کی کہ اس سلسلے میں متعلقہ ہسپتالوں سے بات کریں اگر پہلے سے سسٹم موجود ہے توٹھیک ورنہ اس کے لئے اقدامات کئے جائیں کیونکہ یہ انتہائی سنجیدہ مسئلہ ہے۔ نشے کے عادی افراد کو خصوصی توجہ ، علاج اور نگرانی کی ضرورت ہوتی ہے ۔ وزیراعلیٰ نے اس موقع پر سٹیٹ چلڈرن کے لئے قائم زمونگ کور کو اُس کی پوری استعداد کے مطابق استعمال میں لانے کی ضرورت پر بھی زور دیااور زیادہ سے زیادہ بچوں کو زمونگ کور میں لانے کی ہدایت کی۔ اُنہوںنے فنکاروں کی طرف سے اعزازیہ نہ ملنے کی شکایت کا نوٹس لیتے ہوئے ہدایت کی کہ متعلقہ حکام شکایت کا ازالہ کریں اور معلوم کریں کہ پیسے نہ ملنے کی وجہ کیا ہے جو بھی مسئلہ ہو اُسے حل کرکے اعزازیے کی فراہمی یقینی بنائی جائے ۔
شیلٹر ہومز