اسلام آباد (آن لائن) سابق صدر پرویز مشرف نے کہا ہے کہ بانی ایم کیو ایم کی سیاست ختم ہوچکی ہے‘ ایم کیو ایم اب کمیونٹی رہ گئی ہے‘ ایم کیو ایم کا نام اسٹیبلشمنٹ کو پسند نہیں‘ مہاجر لفظ سے میرا بھی اختلاف ہے‘ پانامہ لیکس کے معاملے پر عدالت نے کوئی نتیجہ نہیں نکالا تو عمران خان کی سیاست کو بڑانقصان ہوگا۔ نجی ٹی وی سے گفتگو کرتے ہوئے ان کا کہنا تھا کہ ایم کیو ایم تین ٹکڑوں میں تقسیم ہوچکی ہے ایم کیو ایم صرف اربن سندھ کی پارٹی ہے ایم کیو ایم کا کردار ختم صرف کمیونٹی رہ گئی ہے لیکن مستقبل میں مہاجر کمیونٹی ملک کی تیسری سیاسی قوت بنے گی انہوں نے کہا کہ میں مہاجر کے نا م سے اختلاف رکھتا ہوں۔مہاجر کے بجائے پاکستانی کہلوایا جائے۔ انہوں نے کہاکہ تحریک انصاف نے 2013 ءمیں نوجوانوں کو بہت متاثر کیا تھا، اب پی ٹی آئی کی مقبولیت میں کمی آئی ہے جبکہ دو نومبر کے احتجاج سے پارٹی کو بہت نقصان ہوا۔ انہوں نے کہاکہ عدالت میں زیر سماعت پانامہ لیکس کے معاملے پر کچھ نہیں ہوا تو پی ٹی آئی کو بہت بڑا دھچکا لگے گا۔ انہوںنے کہا کہ پاکستان آیا تو کراچی سے چترال تک عوام کو اپنی طرف متوجہ کروں گا۔ میں نے اپنے دور حکومت میں بے پناہ ترقیاتی کام کئے ہیں انہوں نے کہا کہ اگر یہی صورتحال چلتی رہی تو آئندہ 2018 ءکے الیکشن میں نواز لیگ ہی دوبارہ الیکشن جیتے گی۔ سابق صدر جنرل (ر) پرویز مشرف نے کہا ہے کہ اب دیر ہوچکی ہے آرمی چیف کو توسیع نہیں ملے گی، لیڈر کا کام عوام کو ترقی اور خوشحالی دینا ہوتا ہے ، میری صرف کراچی نہیں پورے پاکستان پر توجہ تھی ، ایم کیو ایم تین ٹکڑوں میں تقسیم ہو چکی ہے ، تحریک انصاف نے 2013میں یوتھ کو متاثر کیا تھا مگر اب اس کی مقبولیت مانند پڑگئی ،2نومبر کے دھرنے پر یوٹرن نے تحریک انصاف کی مقبولیت کو بہت نقصان پہنچایا اور اگر پانامہ کے معاملے پر کچھ نہ ہوتو پی ٹی آئی کو اور نقصان ہوگا۔ وہ اتوار کو نجی ٹی وی کو انٹرویو دے رہے تھے ۔انہوں نے کہا کہ اب دیر ہوچکی ہے آرمی چیف کو توسیع نہیں ملے گی،نوازشریف کے کسی آرمی چیف سے تعلقات اچھے نہیں رہے ، جنرل راحیل کے ساتھ نوازشریف کے تعلقات زبردست نہیں تھے ۔پرویز مشرف نے کہا کہ وطن واپسی سے متعلق ابھی کچھ نہیں کہہ سکتا مگر 2018کے انتخابات میں بھرپور شرکت کروں گا ۔ سابق صدر نے کہا کہ متحدہ بانی کا کردار پاکستانی سیاست سے ختم ہو چکا ہے ، ایم کیو ایم تین ٹکڑوں میں تقسیم ہو چکی ہے اس لئے ایم کیو ایم کا کردار سیاست سے ختم ہوگیا ہے اور پیچھے مہاجر کمیونٹی رہ گئی ہے ۔انہوں نے کہا کہ ایم کیو ایم صرف اربن سندھ کی پارٹی ہے اور اربن سندھ کی سیاست مجھے سوٹ نہیں کرتی ، ایم کیو ایم کا نام اسٹیبلشمنٹ کو بھی قبول نہیں ہے ،مہاجر کمیونٹی کو اپنے آپ کو پاکستانی کہلوانا چاہیے ۔انہون نے کہا کہ اس وقت کے چیف جسٹس سوموٹو نوٹس لے کر کیا کر رہے تھے ، میں نے محدود مدت کے لئے ایمرجنسی نافذ کی تھی ، پی ٹی آئی سے متعلق سوال کے جواب میں پرویز مشرف نے کہا کہ تحریک انصاف نے 2013میں یوتھ کو متاثر کیا تھا مگر اب اس کی مقبولیت مانند پڑگئی ،2نومبر کے دھرنے پر یوٹرن نے تحریک انصاف کی مقبولیت کو بہت نقصان پہنچایا ہے ، پانامہ کیس پر کچھ نہیں ہوا تو عمران خان کو مزید نقصان ہوگا۔ پاکستان آنے سے متعلق سوال کے جواب میں ان کا کہنا تھا کہ کراچی سے چترال تک کی عوام کی توجہ کھینچ سکتا ہوں مگر اس کے لئے مجھے پاکستان آنے کی ضرورت ہے ۔انہوں نے کہا کہ تین مرتبہ اقتدار میں آنے والی (ن) لیگ نے عوام کو خوشحالی نہیں دی ، اگر ملک اسی طرح چلتا رہا تو آئندہ بھی (ن) لیگ جیت سکتی ہے ، کالا باغ ڈیم ملک کے لئے ضروری ہے ۔ سابق صدر نے کہا کہ 2007میں میں سمجھ رہا تھا کہ مسلم لیگ (ق) جیتے گی تو پھر ہم کالا باغ ڈیم بنائیں گے مگر نتائج توقع کے برعکس نکلے ۔

اسلام آباد(خصوصی رپورٹ)سابق بھارتی وزیراعظم من موہن سنگھ کے دور میں قومی سلامتی کے مشیر کی حیثیت سے خدمات انجام دینے والے سابق سیکرٹری خارجہ شیو شنکر مینن نے وزیر دفاع منوہر پاریکر کے اس بیان پر تنقید کی ہے کہ بھارت نے جوہری ہتھیاروں کے استعمال میں پہل نہ کرنے کی پالیسی ترک کر دی ہے۔ ساتھ ہی مینن نے یہ بھی دعویٰ کیا ہے کہ پاکستان کے ساتھ ایٹمی جنگ کا خطرہ بڑھ گیا ہے۔ بھارتی ٹی وی چینل کو انٹرویو کے دوران شیو شنکر مینن نے کہا کہ دہشت گردوں کے حملے کے نتیجے میں پاکستان کو جوہری کارروائی کی دھمکی دینا ایسا ہی ہے جیسے توپ سے چڑیا کا شکار کرنا۔ بھارت کے اپنے عوام بھی حکومت کی اس منطق کو نہیں سمجھیں گے، عالمی برادری کی بات تو رہنے ہی دیں۔ یاد رہے کہ مینن پاکستان میں بھارتی ہائی کمشنر کی حیثیت سے بھی خدمات انجام دے چکے ہیں۔ انہوں نے کہا کہ 26/11 کے ممبئی حملوں کے بعد مجھ سے غلطی ہوئی کہ میں نے حکومت کو مشورہ دیا کہ جوابی کارروائی نہ کی جائے اور اس وقت کے وزیر خارجہ پرنب مکھرجی (موجودہ بھارتی صدر) نے بھی میری بات سے اتفاق کیا تھا۔ اگرچہ مینن نے مشورے کے جواب میں من موہن سنگھ کے رد عمل کا نہیں بتایا لیکن نتیجتا بھارت نے عسکری لحاظ سے کوئی جوابی کارروائی نہیں کی۔ شیو شنکر مینن نے کہا کہ وزیر دفاع کو جوہری پالیسی کے حوالے سے اپنی ذاتی رائے کھل کر پیش کرنے کا حق نہیں، خصوصا اس وقت جب ذاتی رائے سرکاری پالیسی سے متصادم ہو۔
شیوشنکرمینن

لاہور (سیاسی رپورٹر) اتوار کو دن بھر اسلام آباد کے علاوہ پشاور، لاہور، کوئٹہ اور کراچی میں سیاسی حلقوں بالخصوص ریٹائرڈ آرمی افسروں کے مابین یہ بحث جاری رہی کہ موجودہ آرمی چیف کا جانا تو لازمی امر نظر آتا ہے لیکن ان کا جانشین کون ہو گا اس کا اندازہ لگانا مشکل ہے سوشل میڈیا پر مختلف گروپوں میں یہ مباحثہ بہت دلچسپی سے پڑھا گیا اور اس اتفاق کو بڑی دلچسپی سے زیر بحث لایا گیا کہ نئے آرمی چیف کیلئے موزوں چاروں نام یعنی زبیر محمود حیات، اشفاق ندیم، جاوید اقبال رمدے، قمر جاوید باجوہ غرض سبھی کا تعلق ایک ہی بیج سے ہے اور سروس کے اعتبار سے یہ بیج میٹ ہیں۔ اس ضمن میں اگرچہ دو روز سے ملتان کے کور کمانڈر لیفٹیننٹ جنرل اشفاق ندیم کا نام سب سے زیادہ زیر بحث آ رہا ہے لیکن اتوار کو دن بھر سوشل میڈیا پر یہ بحث جاری کہ اعلیٰ ترین خوبیوں کے باوجود لیفٹیننٹ جنرل اشفاق ندیم کا تعلق چکوال سے بتایا جاتا ہے اور یہ تاریخ کا اتفاق ہے کہ چکوال سے کوئی جنرل آرمی چیف نہ بنا اور اکثر لوگوں بنتے بنتے رہ گئے۔ جن میں جنرل عبدالمجید ملک کا نام سرفہرست ہے۔ جنرل اشفاق ندیم کا تعلق قریشی خاندان سے ہے اور ان کا سروس ریکارڈ سب سے بہتر بتایا جاتا ہے جنرل جاوید حیات رمدے ٹوبہ ٹیک سنگھ کے رہنے والے آرائیں خاندان سے تعلق رکھتے ہیں جو بعد ازاں لاہور منتقل ہو گیا جبکہ لیفٹیننٹ جنرل قمر جاوید باجوہ کا تعلق سرگودھا سے ہے اور یہ خاندان ایک مدت سے وہاں مقیم ہے۔ سنیارٹی میں پہلے نمبر پر آنے والے جنرل زبیر محمود حیات راولپنڈی کے اطراف کے رہنے والے ہیں اور ان کے ایک بھائی فوج میں لیفٹیننٹ جنرل ہیں تو دوسرے میجر جنرل۔ گویا اس وقت تینوں بھائی فوج کے اعلیٰ عہدوں پر فائز ہیں تاہم کہا جاتا ہے کہ انہیں چیئرمین جوائنٹ چیفس آف سٹاف کمیٹی مقرر کیا جائے گا اور آرمی چیف کا تقرر لیفٹیننٹ جنرل اشفاق ندیم، لیفٹیننٹ جنرل قمر جاوید باوجوہ اور لیفٹیننٹ جنرل جاوید اقبال رمدے میں سے ہو گا۔ لیفٹیننٹ جنرل اشفاق ندیم کے بھائی عرفان ندیم امریکہ میں ڈاکٹر ہیں اور عمران ندیم کے بارے میں کہا جاتا ہے کہ وہ ایک نامور صحافی رہے ہیں۔ ان تینوں افراد کے مابین کون کامیاب ہو گا۔ یار دوستوں میں مذاق ہی مذاق میں شرطیں بھی لگ گئی ہیں اور سمجھا جاتا ہے کہ پیر کی صبح موجودہ آرمی چیف جنرل راحیل شریف اسلام آباد ہوں گے تاہم جلد سے جلد اگر نئے آرمی چیف کے لئے موزوں ناموں کی فہرست ملٹری سیکرٹری برانچ سے بذریعہ آرمی چیف ڈیفنس سیکرٹری کو بھیجی گئی تو یہ کام 22 نومبر سے پہلے ممکن نہیں ہو گا۔ 25,24,23 ان تین دنوں میں کسی بھی وقت وزیراعظم پاکستان نئے آرمی چیف کا اس فہرست میں انتخاب کر سکتے ہیں اور جس کے بعد صدر مملکت کی تحریری مگر آئینی اور رسمی منظوری کے بعد اعلان کر دیا جائے گا۔ 27 اور 28 دو دنوں میں سے کسی ایک دن وزیراعظم کی طرف سے جنرل راحیل شریف کی الوداعی دعوت متوقع ہے لیکن اگر ایسا ہوا تو یہ تاریخ میں ایک روایت ہو گی کیونکہ اس سے پہلے کبھی کسی وزیراعظم نے جانے والے آرمی چیف کو دعوت نہیں دی۔ بہر حال 28 نومبر کو سارا منظر نظروں سے غائب ہو جائے گا کیونکہ موجودہ آرمی چیف جنرل راحیل شریف نے لاہور اپنے بعض دوستوں سے کہا ہے کہ 29 یا 30 کی رات کا کھانا وہ لاہور میں کھائیں گے۔

کراچی (سیاسی رپورٹر) نئے گورنر جسٹس (ر) سعید الزمان صدیقی کی صحت بدستور خراب برائی جاتی ہے۔ اگرچہ انہوں نے کچھ ضروری فائلوں پر دستخط بھی کئے۔ اہم اتنی سی مشقت سے بھی ان پر تھکن غالب آ گئی اور انہیں کچھ دیر آرام کرنا پڑا۔ اس صورت حال کے سبب سندھ کے صوبائی دارالحکومت میں ایک بار پھر قیاس آرائیاں شروع ہو گئی ہیں کہ اگر وفاقی حکومت جسٹس صاحب کو فوراً تبدیل کرنے سے ہچکچا رہی ہے اور اُمید کی جاتی ہے کہ وہ جلد صحت یاب ہو جائیں گے لیکن واقفان حال کا کہنا ہے کہ وقتی طور پر صحت یابی کے بعد بھی وہ سرکاری کاموں کو زیادہ وقت نہیں دے سکتے لہٰذا بڑی رازداری کے ساتھ ایک بار پھر نئے گورنر کی تلاش شروع کر دی گئی۔ نہال ہاشمی اگر خود کو اس دوڑ میں سب سے آگے سمجھتے ہیں جو سینئر ضرورہیں لیکن سیاسی حلقوں کا کہنا ہے کہ ابھی اتنے سینئر نہیں ہوئے کہ گورنر بنایا جا سکے۔ موجودہ پیرپگاڑا کا نام بھی نئے گورنر کے طور پر لیا جا رہا ہے۔روایت کے مطابق سندھ میں وزیراعلیٰ عام طور پر سندھی اور گورنر بالعموم اُردو سپیکنگ مہاجر منتخب کیا جاتا ہے اس لئے نئے ناموں کے ضمن میں وفاقی حکومت میں بھی زیادہ مسلم لیگ ن کی صفوں میں کوئی موزوں نام دکھائی نہیں دیتا لہٰذا مجبوراً پھر پرانے ناموں پر غور جاری ہے سول حلقے حسین ہارون کا نام لے رہے ہیں جو روزنامہ ڈان کے چیف ایگزیکٹو حمید ہارون کے بڑے بھائی ہیں اور سابق گورنر محمود ہارون اور تحریک پاکستان کے رہنما اور قائداعظم کے قریبی ساتھی حاجی سر عبداللہ ہارون کے بیٹے یوسف ہارون کے سوتیلے سعید اے ہارون کے بیٹے ہیں تاہم انتظامی اور سابق فوجی حلقوں میں جنرل معین الدین حیدر کا نام بار بار سامنے آ رہا ہے جو سابق وزیر داخلہ بھی رہے ہیں اور سندھ کے سابق گورنر بھی۔ وزیراعظم نوازشریف اپنے غیر سیاسی دوستوں کی مدد سے کوئی موزوں نام تلاش کر رہے ہیں اور بعض حلقوں میں ایک بار پھر ممتاز بھٹو کا نام لیا جا رہا ہے جو ذوالفقار علی بھٹو کے فرسٹ کزن ہیں تاہم پیپلزپارٹی کے حلقوں کو یہ نام قابل قبول نہیں۔ یوں بھی سندھی وزیراعلیٰ کے بعد سندھی گورنر قبول نہیں کیا جا سکتا۔ سابق ججوں، سابق جرنیلوں اور سابق بیورو کریٹس میں سے تلاش کا کام جاری ہے لیکن وفاقی حکومت کوئی رسک نہیں لینا چاہتی اور سو فیصد اپنے وفادار افراد سے باہر جانے کو تیار نہیں۔ یہ بات بہرحال طے ہے کہ زیادہ دنوں تک موجودہ گورنر یہ فریضہ انجام نہیں دے سکیں گے۔