عمران خان کے وکیل نعیم بخاری نے پاناما لیکس میں وزیر اعظم نواز شریف اور ان کے گھر والوں کے اثاثوں سے متعلق دستاویزات اور شواہد سپریم کورٹ رجسٹرار آفس میں جمع کرادیئے ہیں،دستاویز کے مطابق نوازشریف کے وزارت اعلیٰ کے دورمیں شریف خاندان کی صنعتوں نے تیزی سے ترقی کی۔ان کے ذمہ 6 ارب 14 کروڑ روپے کے بینک قرضہ جات ہیں۔دستاویز میں کہا گیا ہے کہ شریف خاندان نےساڑھے14کروڑ روپے منی لانڈرنگ کی۔ 1988ءسے 1991ء تک 5 کروڑ 60 لاکھ روپےہنڈی سےبیرون ملک منتقل کیے۔نوازشریف کے کاروباری شراکت دارخالد سراج نے منی لانڈرنگ سے پردہ اٹھایا۔

دستاویز کے مطابق ٹیکس گوشواروں میں بیرون ملک بھیجی گئی رقم کا ٹیکس گوشواروں میں ذکر نہیں کیا گیاجبکہ نوازشریف نے اس دوران صرف 897روپے انکم ٹیکس اداکیا۔دریں اثناء وزیراعظم نوازشریف کے بچوں کی طرف سے جمع کرائی گئی درخواست میں سپریم کورٹ سے استدعا کی گئی ہے کہ ہم نے سلمان اسلم بٹ کی جگہ اکرم شیخ کی بطور وکیل خدمات حاصل کرلی ہیں۔شریف فیملی کی طرف سے وکیل کی تبدیلی کی درخواست ایڈووکیٹ آن ریکارڈ رفاقت حسین نے جمع کرائی ۔

جمع کرائے دستاویزات اور شواہد 686 صفحات پر مشتمل ہیں جنہیں 5 بند ڈبوں میں جمع کرایا گیا ہے۔ ان دستاویزات میں شریف خاندان کے بینک اکاؤنٹس اور قرضہ جات کی تفصیلات سمیت اہم شواہد شامل ہیں۔دستاویزات میں کہا گیا ہےکہ نوازشریف جب پہلی مرتبہ پنجاب کے وزیر خزانہ بنے تو ان کی صرف ایک فیکٹری تھی لیکن وزیر خزانہ کا قلمدان سنبھالنے کے بعد ان کے پنجاب میں انڈسٹریل یونٹس تیزی سے بڑھے اور صوبائی وزیر خزانہ ہوتے ہوئے نوازشریف کی فیکٹریوں کی تعداد 20 ہوگئی۔

اسلام آباد (مانیٹرنگ ڈیسک) بحریہ ٹاون کے بانی ملک ریاض نے کہا ہے کہ میں اپنی کل آمدنی کا 75فیصدفی سبیل اللہ خرچ کرتا ہوں، ایک کیا 10شربت گلہ کو گھر دینے کے لئے تیار ہوں۔ نجی ٹی وی کے پروگرام میں گفتگو کرتے ہوئے ان کا کہنا تھا کہ ہم نے بحریہ ٹاون میں مڈل کلاس اور لوئر کلاس کو 5،5لاکھ میں مکمل گھر دیے، جن کے پاس رہنے کو گھر نہ بھی ہو اسے مفت میں مکمل تیار گھر دیتے ہیں۔ یہ سب مجھے میرے اللہ کا دیا ہوا ہے ، ہم ایسے کام کرتے ہیں لیکن کسی کو بتاتے نہیں اورنہ ہی کبھی کسی کا پردہ اٹھاتے ہیں۔میں کسی اور کو نہیں صرف اللہ کو جواب دہ ہوں، مجھے اپنے اللہ کے سوا کسی کا خوف نہیں ہے۔ مغرب میں جب کسی پر کوئی الزام لگتا ہے تو وہ استعفی دے دیتا ہے جبکہ پاکستان کا ہر آدمی دوسرے کو الزام دیتا ہے اورخود کچھ نہیں کرتا۔احتساب زمانہ حال کا ہونا چاہیے ماضی کے گڑے مردے نہ اکھاڑے جائیں ،ان سب سے صرف وقت ضائع ہو رہا ہے۔ان کا کہنا تھا کہ وہ شربت گلہ کو ایک کیا10 گھر دینے کے لئے تیار ہیں۔ایک سوال کے جواب میں ان کا کہنا تھا کہ 5ہزار،1ہزار کا نوٹ اور بونڈز کو بند کر دینا چاہیے،رشوت اپنے آپ کم ہو جائے گی،ہر پراجیکٹ کو آنر شپ دینی چاہیے،نیلسن منڈیلا کی طرح کا فارمولا پاکستان میں بھی ہونا چاہیے۔جس دن پاکستان سے خوشامد ختم ہو جائے گی ملک ٹھیک ہو جائے گا، جب نواز شریف کو مسٹر پرائم منسٹر کہہ کر بلایا جائے گا اس دن ملک ٹھیک ہو جائے گا۔کلرک اور سیکرٹری کا واش روم ایک ہو تو مسئلہ حل ہو جائے گا۔ان کا کہنا تھا کہ جو کام جنرل راحیل شریف نے کیا وہ پہلے کسی آرمی چیف نے نہیں کیا، فوج اور سول قیادت مل بیٹھ کر اپنے دائرہ کار متعین کرلیں تو حالات بہتر ہو جائیں گے۔ گورنمنٹ سکول کے ٹیچرز کو زبان بھی ٹھیک سے بولنی نہیں آتی وہ کیا تعلیم عام کریں گے اور پرائیویٹ سکولوں میں فیسیں بہت زیادہ ہیں غریب کہاں جائیں، جس ملک نے اپنی عوام کا خیال رکھا ہے وہ ہمیشہ کامیاب ہی ہوا ہے۔ انہوں نے مزید کہا کہ پاکستان کی ترقی کی راہ میں رکاوٹ ہمارے چینلزہیں، یہ سب اپنا کام ٹھیک طریقے سے کریں تو کوئی پریشانی نہیں ہوگی۔ ہمارے ملک میں ابھی تک انقلاب نہیں آیا،انقلاب سے ملکوں کی حالت بدل جاتی ہے لیکن ملک کی موجودہ مذہبی اور سیاسی قیادت میں مجھے کسی سے کوئی امید نہیں ہے۔ پاکستانیوں کا 380بلین ڈالر سرمایہ بیرون ملک ہے لیکن میری دولت اس ملک کے عوام کی امانت ہے،میرا خاندان ہمیشہ اس ملک کی ترقی کے لئے کام کرتا رہے گا۔ ”اللہ کے کرم سے مجھے پاکستان کا مستقبل بہت اچھا نظر آرہا ہے۔ اس ملک کی خوشحالی کے لئے 50ملک ریاض قربان ہیں۔ انہوں نے کہا کہ بیورو کریسی اور سیٹیبلشمنٹ نے نہ زرداری کو کام کرنے دیا نہ نوازشریف کو کام کرنے دے رہی ہے۔

رائے ونڈ ( نامہ نگار) تبلیغی جتماع کا دوسرا مرحلہ مولانا ابراہیم جمیل کی اجتماعی دعا کے بعد اختتام پذیر ہوگیا، اللہ کے راستے میں وقت لگانے والے ہزاروں اسلام پنڈال میں موجود ہیں جو تشکیل کے بعد تبلیغ دین کے لئے نکلیں گے جبکہ باقی لاکھوں مندوبین اپنے آبائی شہروں کےلئے روانہ ہوگئے ہیں ، اجتماعی دعا میں لاکھوں مندوبین کے ہمراہ امیر جماعت اسلامی سراج الحق ،مشیر وزیر اعلیٰ پنجاب مرزا جاوید بھی شریک ہوئے۔ انہوں نے کہا کہ اسلام ہمیں ایک دوسرے کے کام آنے کا درس دیتا ہے ،اجتماع کے دونوں مراحل امن و امان کے ساتھ پایہ تکمیل تک پہنچنے پر سرکاری اور اجتماع کی انتظامیہ نے شکرانے کے نوافل ادا کئے ۔ اجتماعی دعا کے وقت رقت آمیز مناظر نظر آئے لاکھوں افراد اللہ کے حضور اپنے گناہوں کی معافی، دین الٰہی کی سربلندی،سنت نبوی پر عمل پیرا ہونے کی توفیق ،پاکستان کی سالمیت، ملک دشمنوں سے تحفظ، بیماریوں سے شفائ، آسمانی آفات کے ٹالے جانے کی دعائیں مانگتے ہوئے زارو قطار رو رہے تھے۔ آہوں اور سسکیوں سے پرسوز آمین کی صداﺅں سے پنڈال گونج رہا تھا۔ دعا سے قبل مرکزی امیر حاجی عبدالوہاب نے بیان کیا جبکہ نماز فجر کے بعد مولانا خورشید نے ہدایات دیتے ہوئے فرمایا کہ اللہ کے ساتھ اپنا تعلق استوار کرنا بہت بڑی بات ہے پیارے پیغمبر حضرت محمد رسول اللہ کے فرمان کے مطابق ہم اللہ تعالیٰ پر بن دیکھے ایمان لائے اور ایک ایسی عظیم ہستی جس کو کسی مسلمان نے آج تک دیکھا ہی نہیں اسے اپنا خالق و مالک اور رب کائنات تسلیم کر کے غیب پر ایمان لے آئے اور اس کے احکامات کے سامنے سرتسلیم خم کر لیا جو بھی انسان نبی مکرم کا کلمہ پڑھ کر اللہ تعالیٰ کے ساتھ اپنے رابطے کو مضبوطی سے قائم رکھتا ہے تو پھر اللہ اسے کبھی تنہا نہیں چھوڑتا اور قدم بقدم ہر حال میں اس کو دنیا میں بھی اور آخرت میں بھی عظیم مرتبوں سے نوازتا ہے اور اسے دنیا و آخرت میں رسوائی سے بھی بچاتا ہے۔ اللہ تعالی نے قرآن پاک میں اپنے ساتھ محبت کا معیار نبی اکرم کی سنت مبارکہ پر سختی سے کاربند رہنے کو قرار دیا ہے ،اللہ نے فرمایا کہ اے میرے پیغمبر کہہ دیجئے کہ اگر تم اللہ سے محبت رکھنا چاہتے ہو تو یہ آپ کی اتباع کریں اللہ ان سے محبت کرے گا۔ انہوں نے کہا کہ اسلام عملی زندگی کا نام ہے زبانی دعوﺅں کی دین میں کوئی اہمیت نہیں ہے ،مسلم اُ مہ عمل کی دنیا میں آئے احکام الٰہی اور سنت نبوی کے مطابق دنیاوی زندگی کے تمام اعمال کو ڈھال لے اسی سبب اللہ تعالیٰ ان کےلئے اپنی رحمتوں اور عنائیات کا سلسلہ شروع کردے گا ۔

لاہور(نامہ نگار)سندر کے علاقے میں دو افراد نے مبینہ طور پر 23سالہ لڑکی کا اجتماعی زیادتی کا نشانہ بنا ڈالا ،پولیس تاحال مقدمہ درج نہ کر سکی ، آزاد کشمیر کی رہائشی عروج نامی لڑکی کا کہنا ہے کہ وہ لاہور میں تعلیم حاصل کرنے کے لئے آئی تھی یہاں پر مصطفی نامی شخص نے اپنے ساتھی سے ملکر اس کو اغوا کرکے زیادتی کا نشانہ بنانے کے بعد اس کی فحش ویڈیو بنا لی ہے ملزمان اس سے پیسے اور زیورات بھی لیکر اس کو داتا دربار کے قریب چھوڑ کر فرار ہو گئے وہ ملزمان کے خلاف تھانہ سندر مقدمہ درج کروانے گئی مگر پولیس نے مقدمہ درج کرنے سے انکار کر دیا ہے ۔ پولیس کا کہنا ہے کہ خاتون سے زیادتی نہیں ہوئی خاتون کے بیانات متضاد ہیں تفتیش کی جا رہی ہے ۔