لاہور(کلچرل رپورٹر) اداکارہ ریچل خان کی فلم”دی ریبلز“کا نام اور سکرپٹ تبدیل کردیا گیا ہے جس کے بعدرائٹر ابن آس نے پروڈیوسر میسم علی اور ریچل خان کی فلم”کبیر“کا سکرپٹ مکمل کرلیا ہے جبکہ فلم کی شوٹنگ دبئی جلد ہی دوبارہ شروع ہوگی۔تفصیلات کے مطابق پہلے یہ فلم”دی ریبلز“کے نام سے بنائی جارہی تھی جس کی شوٹنگ کافی حد تک کرلی گئی تھی لیکن بعض وجوہات کی بنا پر پروڈیوسرزنے ڈائریکٹرکو علیحدہ کردیا جس کے بعد نہ صرف ڈائریکٹر نیا لیا گیا بلکہ سکرپٹ بھی تبدیل کیا گیا۔اس فلم کا سکرپٹ ابن آس محمد سے لکھوایا گیا ہے جنہوں نے کہانی کے ساتھ ساتھ سکرین پلے اورڈائیلاگ بھی لکھے ہیں جبکہ فلم کے ٹائٹل پر اب رائٹرکا نام بھی خصوصی طور پر لکھا گیا ہے۔فلم میں ریچل خان اور میسم علی مرکزی کردار کررہے ہیں جبکہ کاسٹ میں دیگر بہت سے فنکار بھی شامل ہیں۔

لاس اینجلس(این این آئی) معروف امریکی اداکار اور مارشل آرٹس کے ماہر بروس لی پر بنائی جانیوالی فلم ”برتھ آف دی ڈریگن“ کا نیا ٹریلر جاری کردیا گیا ہے۔جارج نولفی کی ہدایتکاری میں بننے والی اس فلم کی کہانی 1965 میں بروس لی کی جانب سے کنگ فو لیجنڈ وونگ جیک مین کو دیے گئے چیلنج پر بنائی گئی ہے۔فلم میں بروس لی کا مرکزی کردار فلپ این جی نبھار ہے ہیں۔ جب کہ دیگر کاسٹ میں ڑیا یو، جن ڑنگ، بلے میگنوسن اور سیمون ین شامل ہیں۔ مائیکل لندن اور کرسٹوفر ولکنسن کی مشترکہ پروڈیوس کردہ یہ فلم جلد سینما گھروں میں نمائش کے لیے پیش کی جائے گی۔

نیویارک (این این آئی)جان سینا ڈبلیو ڈبلیو ای کے مقبول ترین ریسلرز میں سے ایک ہیں جن کے چاہنے والوں کی تعداد پاکستان میں بھی کم نہیں مگر آج کل فلمی اور ٹی وی مصروفیات کی بناءپر ریسلنگ کے رنگ سے دور ہیں۔یہی وجہ ہے کہ وہ رنگ میں ایکشن میں نظر نہیں آتے مگر گزشتہ دنوں ان کی ایسی تصاویر سامنے آئیں جو چہرے پر مسکراہٹ بکھیر دیتی ہیں۔ امریکا سمیت متعدد ممالک میں ہالووین کا تہوار منایا گیا تھا اس موقع پر جان سینا اور ان کی گرل فرینڈ نکی بیلا نے ایسا بہروپ بدلا کہ پرستار دیکھ کر دنگ رہ گئے۔درحقیقت ان دونوں نے ایک دوسرے کا بہروپ بنایا اور ایک ویڈیو میں ایک دوسرے کے ڈبلیو ڈبلیو ای انٹرنس میوزک کے ساتھ انٹری کی۔جان سینا کا بہروپ واقعی چونکا بلکہ دنگ کردینے والا تھا جس نے لوگوں کو بے اختیار مسکرانے پر مجبور کردیا۔اس بہروپ بدلنے کے مقابلے میں جان سینا واضح طور پر کامیاب نظر آئے جنھوں نے نکی بیلا کا روپ بہترین انداز سے نبھایا۔یہ ویڈیو نکی بیلا نے اپنے ٹوئٹر اکاﺅنٹ پر شیئر کی جسے آپ اس لنک پر جاکر دیکھ سکتے ہیں اور آپ کو جان سینا کو دیکھ کر واقعی یقین نہیں آئے گا۔واضح رہے کہ جان سینا پندرہ بار ڈبلیو ڈبلیو ای چیمپئن شپ کا ٹائٹل جیت چکے ہیں اور انہیں رک فلیر کا ریکارڈ برابر کرنے کے لیے مزید ایک اور ٹائٹل کی ضرورت ہے۔

ممبئی(شوبز ڈیسک) بالی ووڈ فلموں میں اپنی آواز کا جادو جگانے والی گلوکارہ نیہا بھاسن نے طویل معاشقے کے بعد اپنے مسلمان دوست اور موسیقار سمیرالدین سے شادی کرلی۔گلوکارہ نیہا بھاسن نے کئی فلموں میں اپنی آواز کا جادو جگایا ہے جس میں ”میرے برادر کی دلہنیا“،”فورس“،”غنڈے“ اور ”سلطان“ سمیت کئی فلمیں شامل ہیں جب کہ گلوکارہ نے سلمان خان کی فلم کا مشہور گیت ”جگ گھومیا“ گا کر خوب شہرت حاصل کی جس کے بعد اب انہوں نے کیرئیر کے عروج میں ہی شادی کرلی ہے۔بھارتی میڈیا رپورٹس کے مطابق گلوکارہ نیہا بھاسن نے طویل معاشقے کے بعد اپنے مسلمان دوست اور موسیقارسمیرالدین سے شادی کرلی ہے جب کہ شادی کی تقریب اٹلی کے شہر تسکینی میں ہوئی جس میں رشتے داروں اور قریبی دوستوں نے شرکت کی۔گلوکارہ نے سماجی رابطے کی ویب سائٹ ٹوئٹر پر مداحوں کو اپنی شادی کی خوش خبری سنائی اور کئی تصاویر شیئر کیں ۔جس کے بعد فلم نگری کی نامور شخصیات اور مداحوں کی جانب سے نیک تمناو¿ں کا اظہار کیا گیا ہے۔واضح رہے کہ گلوکارہ نیہا بھاسن اور موسیقار سمیرالدین نے 2012 میں گیت”تیرا میرا پیار“ میں ایک ساتھ کام کیا تھا جس کے بعد دونوں میں قربتوں بڑھ گئی تھیں۔

لاہور(کلچرل رپورٹر)پروڈیوسر حسن ضیاکی فلم”مہرالنسا وی لب یو“کا پہلا پوسٹر لانچ کردیا گیا اور اس موقع پر ہونے والی تقریب میں بہت سے لوگوں نے شرکت کی ´فلم کی شوٹنگ کراچی میں تیزی سے جاری ہے جس کے لئے ایک خاص اور بہت بڑا سیٹ لگایا گیا ہے ۔فلم کے پروڈیوسر حسن ضیا نے کہا کہ فلم کی شوٹنگ ریکارڈ ٹائم میں مکمل کرلی جائے گی اور اسے طے شدہ تاریح پر ہی نمائش کے لئے پیش کیا جائے گا۔ایک سوال کے جواب میں انہوں نے کہا کہ یہ فلم بنانے کا مقصد لوگوں کو اچھی تفریح کی فراہمی ہے کیونکہ میں بطور پروڈیوسر یہی کوشش کرتا ہوں کہ لوگ فلم کے ذریعے اچھی تفریح کریں کیونکہ ہمارے ملک میں عام لوگوں کے لئے انٹرٹینمنٹ کے مواقع زیادہ نہیں ہیں اس لئے میں نے”مہرالنساوی لب یو“ کے سکرپٹ پر بہت محنت کی ۔حسن ضیا نے مزیدبتایا کہ فلم کے سکرپٹ کے مطابق یہ کیریکٹر نثا جاوید کے لئے بالکل مناسب ہے اور مجھے یقین ہے کہ جس طرح لوگوں نے انہیں چھوٹی سکرین پر پسند کیا ہے بڑی سکرین بھی پسند کریں گے۔