کراچی : سندھ ہائی کورٹ نے شوگر انکوائری کمیشن اور رپورٹ کو کالعدم قرار دیتے ہوئے چینی کی قلت اور قیمت میں اضافے کی آزادانہ تحقیقات کا حکم دے دیا۔

تفصیلات کے مطابق سندھ ہائی کورٹ میں شوگر انکوائری کمیشن کے خلاف شوگر ملز مالکان کی درخواست پر سماعت ہوئی، اس دوران عدالت نے محفوظ فیصلہ سناتے ہوئے شوگر انکوائری کمیشن اور رپورٹ کالعدم قرار دے دی۔

سندھ ہائی کورٹ نے چینی کی قلت اور قیمت میں اضافے پر متعلقہ اداروں کو نئی آزادانہ تحقیقات کا حکم دے دیا ہے، عدالت کا کہنا ہے کہ نیب، ایف آئی اے، ایف بی آر اور دیگر ادارے قانون کے مطابق چینی کی قلت اور اس کی قیمت میں اضافے کی تحقیقات کریں۔

واضح رہے کہ20سے زائد شوگر ملز مالکان نے کمیشن کی تشکیل اور رپورٹ کو چیلنج کیا تھا، جسٹس کے کے آغا اور جسٹس عمرسیال پر مشتمل 2رکنی بینچ نے فیصلہ محفوظ کیا تھا۔

اس موقع پر ایڈیشنل اٹارنی جنرل کاشف پراچہ کا کہنا تھا کہ چینی کی قلت اور قیمت میں اضافے سے ہر پاکستانی متاثر ہوا ہے، تحقیقات شوگر ملز مالکان کے خلاف نہیں بلکہ قلت کی وجوہات جاننے کے لیے تھیں۔

اے اے جی کا مزید کہنا تھا کہ کمیشن کی رپورٹ میں چینی کی قلت اور قیمتوں میں اضافے کا پتا لگایا گیا ہے، شوگر ملز مالکان کے خلاف کوئی براہ راست الزام نہیں لگایا گیا،اور نہ ہی انہیں کام سے روکا گیا ہے۔

یاد رہے کہ گزشتہ ماہ جولائی میں سندھ ہائی کورٹ نے وفاقی حکومت کو شوگر انکوائری کمیشن رپورٹ میں درج سندھ کی 20 شوگر ملوں کے خلاف 30جون تک کارروائی سے روک دیا تھا۔

وزیراعظم عمران خان کا کہنا ہے ملک کی معیشت سے متعلق مزید اچھی خبریں ہیں۔

عمران خان نے سوشل میڈیا پر جاری اپنے بیان میں بتایا کہ اوور سیز پاکستانیوں کی ترسیلات زر جولائی میں 2 ارب 76 کروڑ 80 لاکھ ڈالرز ہو گئیں جو پاکستان کی تاریخ میں ترسیلات زر کی یہ سب سے زیادہ رقم ہے۔

وزیراعظم نے مزید بتایا کہ جون 2020 کے مقابلے میں ترسیلات زر میں 12.2 فیصد اضافہ ہوا جب کہ جولائی 2019 کے مقابلے میں ترسیلات زر کا اضافہ 36.5 فیصد ہے۔

خیال رہے کہ یوم آزادی کے موقع پر بھی وزیراعظم عمران خان نے قوم کو خوشخبری سناتے ہوئے کہا تھا کہ آئی پی پیز سے معاہدہ ہو گیا ہے، اب بجلی کی قیمتیں نیچے جائیں گی۔

لاہور: وزیر اعلیٰ پنجاب عثمان بزدار کا کہنا ہے کہ پنجاب حکومت کے بروقت اور مؤثر اقدامات کے باعث گندم اور آٹےکی قیمتوں میں استحکام آیا ہے۔

وزیراعلیٰ سردار عثمان بزدار نے کہا کہ  پنجاب واحد صوبہ ہے جہاں 20 کلو آٹے کا تھیلا مقرر کردہ نرخوں پر دستیاب ہے۔

ان کا کہنا تھا کہ پنجاب کے عوام کے حقوق کا تحفظ کرنا میری ذمہ داری ہے، کسی کو عوام کا استحصال کرنے کی اجازت نہیں دیں گے۔

وزیراعلیٰ پنجاب عثمان بزدار نے ہدایت کی متعلقہ حکام اور انتظامی افسران گندم اور آٹے کی قیمتوں کی مانیٹرنگ جاری رکھیں، عوام کو ہر ممکن ریلیف دینے کے لیے متعلقہ ادارے متحرک رہیں۔

انہوں نے کہا کہ گندم اور آٹے کی قیمتوں میں خود ساختہ اضافہ برداشت نہیں کیا جائے گا۔

راولپنڈی اور اسلام آباد کے شہریوں کی تفریح کے لیے ڈبل ڈیکر بس چلے گی۔

اسلام آباد اور راولپنڈی کے عوام کے لیے نئی بس سروس کا آغاز کردیا گیا ہے اور نئی ٹوریسٹ ڈبل ڈیکر بس سروس کی ٹیسٹ ڈرائیو کی گئی۔

ٹیسٹ ڈرائیو میں  ڈپٹی کمشنر اسلام آباد حمزہ شفقات اور ڈپٹی کمشنر راولپنڈی انوارالحق شریک ہوئے جب کہ مشیر وزیراعلیٰ پنجاب آصف محمود بھی ڈبل ڈیکربس کی ٹیسٹ ڈرائیوکے دوران موجود تھے۔

اعلامیے کے مطابق شہریوں کے تفریحی مقامات دیکھنے کے لیے نئی سہولت ہوگی اور محکمہ سیاحت پنجاب، پی ایچ اے نے ضلعی انتظامیہ سے مل کر بس سروس شروع کی۔

دوسری جانب ٹورازم ڈیویلپمنٹ کارپوریشن آف پنجاب(ٹی ڈی سی پی) کے سابق چیئرمین عمران گورایہ کا کہنا ہے کہ یہ سابق وزیراعلیٰ پنجاب شہباز شریف کا منصوبہ تھا، جس میں سے ایک بس راولپنڈی لے جاکر چلادی، اس میں نیاکچھ نہیں کیا گیا۔

پاکستان انٹرنیشل ائیر لائنز  (پی آئی اے) کی پیرس کے لیے متبادل ذرائع سے پروازیں بحال کر دی گئیں ہیں۔

ترجمان پی آئی اے کے مطابق ائیر لائن نے یورپی ائیر سیفٹی کی جانب سے پابندی کے باعث پیرس کے لیے متبادل آپریشن بحال کر دیا ہے، یوم آزادی کی تقریبات کی مناسبت سے پروازوں کی بحالی برطانیہ اور یورپ سے شروع ہوئی۔

پی آئی اے کی پہلی پرواز  پیرس سے اسلام آباد کے لیے 260 مسافروں کو لے کر روانہ ہوئی جب کہ پرواز میں 18 مسافروں نے ایگزیکٹو اکانومی اور  242 مسافروں نے اکانومی کلاس میں سفر کیا۔

پیرس ائیر پورٹ پر  پی آئی اے کے کنٹری مینیجر اور اسٹیشن مینیجر نے مسافروں کو رخصت کیا۔

اس ضمن میں وفاقی وزیر برائے ہوا بازی غلام سرور خان کا کہنا ہے یورپ کے لیے پی آئی اے کے فضائی آپریشن کی بحالی کے اقدامات کر رہےہیں، بین الاقوامی سیفٹی ایجنسی کے تحفظات دور کر دیے جائیں گے۔