All posts by Faisal Khan

ایم کیو ایم پاکستان کا 24 ستمبر کو ’کراچی مارچ‘ کا اعلان

ویب ڈیسک : متحدہ قومی موومنٹ (ایم کیو ایم) پاکستان کے کنوینئر خالد مقبول صدیقی نے کراچی کے عوام کو حقوق دلانے کیلئے 24 ستمبر کو مارچ کا اعلان کردیا۔

کراچی بہادرآباد میں پریس کانفرنس کرتے ہوئے خالد مقبول صدیقی کا کہنا تھا کہ  2018 میں کراچی کا مینڈیٹ چھینا گیا اور کرپٹ پیپلز پارٹی کے رحم و کرم پر چھوڑ دیا گیا۔

انہوں نے کہا کہ پیپلزپارٹی کی تعصبانہ حکومت کے خلاف اور کراچی کے عوام کو حقوق دلانے کے لیے 24 ستمبر کو احتجاج کیا جائے گا، سندھ کو اس نسل پرست صوبائی حکومت کے رحم و کرم پر چھوڑا گیا۔

ان کا کہنا ہے کہ اِس شہر کی خون پسینے کی کمائی سے ملک چلتا ہے، وفاق کی بے بسی اور ریاست کی عدم دلچسپی دیکھ رہے ہیں، یہ ضروری ہوگیا ہے کہ اس شہر کی ضروریات کے لیے آواز اٹھائیں۔

ایم کیو ایم کنوینئر کا کہنا تھا کہ اسلام آباد کے ایوان کی لائیٹیں بھی کراچی کے پیسوں سے روشن ہیں، کراچی کے پیسوں سے موٹر وے بن رہے ہیں اور بجٹ بن رہے ہیں لیکن 1100 ارب روپے شاید خیرات میں کراچی کو دیے گئے، اب لوگوں کو اپنے حق حکمرانی کے لیے گھروں سے نکلنا ہوگا۔

انہوں نے کہا کہ ہمیں 30 سالوں سے قومی سیاسی دھارے میں شامل نہیں کیا گیا، ہم سے کیے گئے کسی وعدے پر عمل نہیں کیا، ملک میں جہاں پر بھی حق تلفی ہورہی ہے، وہاں صوبے بنائیں جائیں۔

خالد مقبول نے جماعت اسلامی کے حقوق کراچی مارچ کی حمایت کا بھی اعلان کیا۔

خیال رہے کہ متحدہ قومی موومنٹ (ایم کیو ایم) پاکستان وفاقی میں حکومتی اتحاد میں شامل ہے جب کہ گزشتہ دنوں وزیراعظم عمران خان نے کراچی کے لیے 1100 ارب روپے کے پیکج کا اعلان کیا تھا۔

ابو بچاؤ مہم کی اور قسط فلاپ، فواد چودھری کی اپوزیشن کی اے پی سی پر تنقید

اسلام آباد: (ویب ڈیسک ) وفاقی وزیر فوادچ چودھری نے اپوزیشن کی آل پارٹیز کانفرنس (اے پی سی) پر تنقید کرتے ہوئے کہا ہے کہ ابو بچاؤ مہم کی اور قسط فلاپ ہو گئی۔

سماجی رابطوں کی ویب سائٹ ٹویٹر پر جاری اپنے بیان میں فواد چودھری کا کہنا تھا کہ میڈیا کی آزادی کا اس سے بڑھ کر اور کیا ثبوت ہوگا کہ نواز شریف کی تقریر براہ راست دکھائی گئی۔

ان کا کہنا تھا کہ کہتے ہیں کہ تیتیس سال ملک میں آمریت رہی لیکن انھوں نے یہ نہیں بتایا کہ ان سالوں میں پندرہ سال وہ خود اس سسٹم کا حصہ رہے اور کٹھ پتلی کے طور پر خدمات سرانجام دیں۔

 

وفاقی وزیر نے کہا کہ نواز شریف کی تقریر کا نکتہ یہ ہے کہ اگر میں حکومت میں ہوں تو سب ٹھیک ہے لیکن اگر فوج مجھے حکومت میں لانے کیلئے کردار ادا نہیں کرتی تو وہ ناقابل قبول ہے۔

وفاقی وزیر سائنس وٹیکنالوجی کا کہنا تھا کہ فوج اور عدلیہ سے گلہ صرف یہ ہے کہ جب عمران خان اور عوام نے مجھے نکالا تو آپ میرے ساتھ کیوں نہیں کھڑے ہوئے؟

نوازشریف کہتے ہیں ووٹ کو عزت دو ، میں کہتا ہوں کورٹ کو بھی عزت دو ، شیخ رشید

سارے گندے انڈے ایک ہی ٹوکری میں جمع ہوگئے ، یہ صرف ٹی وی ٹی وی کھیل ہے ہیں ، اے پی سی پر تبصرہ

اسلام آباد(ویب ڈیسک ) وفاقی وزیر ریلوے شیخ رشید احمد نے کہا ہے کہ نوازشریف کہتے ہیں ووٹ کو عزت دو ، میں کہتا ہوں کورٹ کو بھی عزت دو ۔ سابق وزیراعظم نوازشریف کی اے پی سی میں وڈیو لنک سے تقریر پر تبصرہ کرتے ہوئے شیخ رشید نے کہا کہ سارے گندے انڈے ایک ہی ٹوکری میں جمع ہوگئے ، لیکن یہ سب مل کر بھی عمران خان کا کچھ نہیں بگاڑ سکتے، نوازشریف کہتے ہیں ووٹ کو عزت دو میں کہتا ہوں کورٹ کو بھی عزت دو ۔وفاقی وزیر ریلوے نے کہا کہ اپوزیشن کی طرف سے حکومت مخالف تحریک کا کہیں گے لیکن یہ ا سمبلیوں سے استعفیٰ نہیں دیں گے، بلکہ یہ صرف ٹی وی ٹی وی کھیل ہے ہیں ۔ واضح رہے کہ مسلم لیگ نون کے قائد اور سابق وزیراعظم نوازشریف نے کہا تھا کہ ووٹ کو عزت دے کر پاکستان عالمی برادری میں عزت اور وقار حاصل کرسکتا ہے جب ووٹ کی عزت کو پامال کردیا جاتا ہے تو سارا جمہوری عمل بے معنی ہوکر رہ جاتا ہے ۔

حزب اختلاف کی کل جماعتی کانفرنس سے ویڈیو لنک کے ذریعے لندن سے خطاب کرتے ہوئے انہوں نے کہا کہ انتخابی عمل سے سے پہلے نتائج طے کرلیے جاتے ہیں اور رہی سہی کسر حکومت سازی کے لیے جوڑ توڑکرکے رہی سہی کسر پوری کردی جاتی ہے اگر عوامی حکومت بن بھی جاتی ہے تو اسے پہلے کمزور کیا جاتا ہے اور پھر فارغ کردیا جاتا ہے. انہوں نے کہا کہ ملک کی 73سالہ تاریخ میں کسی بھی منتخب حکومت کو چلنے نہیں دیا گیا 1973کے آئین میں آرٹیکل6فوجی مداخلت کا راستہ روکنے کے لیے ڈال گیا مگر اس کے باوجود 2فوجی آمر وں نے20سال حکومت کی دو بار آئین توڑنے والے کو قانون کے کٹہرے میں لایا گیا اسے آئین اور قانون کے تحت سزا سنائی گئی مگر اسے سزا ملنا تو دور کی بات اس خصوصی عدالت کو ہی سرے سے غیر آئینی قراردیدیا گیا جس نے ملزم کے خلاف کاروائی کی تھی

ہتک عزت کا دعویٰ: میشا شفیع 28 ستمبر کو طلب

ویب ڈیسک : لاہور کی ڈسٹرکٹ اینڈ سیشنز کورٹ نے گلوکار و اداکار اداکار علی ظفر کی جانب سے دائر کیے گئے ہتک عزت کے کیس میں میشا شفیع کو 28 ستمبر کو طلب کرلیا۔

ایڈشنل سیشن جج محمد یاسر حیات نے کیس کی سماعت مقرر کرنے سے متعلق تحریری حکم نامہ جاری کیا۔

جاری کردہ حکم نامے کے مطابق عدالت نے گلوکارہ میشا شفیع سمیت دیگر گواہوں کو جرح کے لیے پیش ہونے کا حکم دے دیا۔

اس کے ساتھ ہی عدالت نے آئندہ سماعت میں اداکارہ صبا حمید اور دیگر کو پیش ہونے کی ہدایت کر دی۔

ٹِک ٹاک نے ٹرمپ انتظامیہ پر ہی مقدمہ کردیا

ویب ڈیسک : چینی کمپنی ٹِک ٹاک نے امریکا کی جانب سے  پابندی عائد کرنے پر ٹرمپ انتظامیہ پر ہی مقدمہ کردیا۔

امریکی نشریاتی ادارے کی رپورٹ کے مطابق ٹِک ٹاک نے واشنگٹن کی فیڈرل کورٹ میں مقدمہ دائر کیا ہے جس میں ٹرمپ انتظامیہ کی جانب سے عائد پابندی کو روکنے کی استدعا کی گئی ہے۔

رپورٹ کے مطابق ٹِک ٹاک اور اس کے زیرملکیت کمپنی نے جمعہ کی شب ٹرمپ انتظامیہ کے اقدام کو عدالت میں چیلنج کیا اور یہ چینی کمپنی کی جانب سے امریکی صدر کے ایکشن کو دوسری مرتبہ عدالت میں چیلنج کیا گیا ہے۔

ٹِک ٹک نے اپنی درخواست میں مؤقف اختیار کیا ہےکہ امریکی صدر ٹرمپ نے اپنے اختیارات سے تجاوز کیا اور یہ اقدام کسی غیر معمولی خطرے کو روکنے کے لیے نہیں بلکہ سیاسی وجوہات کی بناء پر اٹھایا گیا ہے۔

درخواست میں مزید کہا گیا ہےکہ ٹرمپ انتظامیہ کی طرف سے پابندی ان کی ہی آزادی اظہار کی پہلی ترمیم کی بھی خلاف ورزی ہے جب کہ امریکی صدر کا یہ ایکشن اس آن لائن کمیونٹی کو بکھیر دے گا جہاں لاکھوں امریکی اپنے جذبات کے اظہارکے لیے اکٹھا ہوئے ہیں۔

ٹِک ٹاک نے اپنی درخواست میں دعویٰ کیا ہےکہ امریکی حکومت نے امریکی صارفین کے لیے ٹِک ٹاک کی پرائیویسی اور سیکیورٹی کے عزم کے ثبوتوں کو نظر انداز کیا۔

امریکی میڈیا کے مطابق وائٹ ہاؤس نے امریکی انتظامیہ کے فیصلے کو عدالت میں چیلنج کرنے کے ٹِک ٹاک کے اقدام پر فوری کوئی رد عمل نہیں دیا۔

واضح رہے کہ امریکی حکومت نے چین کی معروف لپ سنکنگ ایپ ’ٹک ٹاک‘ اور ’وی چیٹ‘ پر سلسلہ وار پابندی لگانے کا اعلان کیا ہے۔

ٹرمپ انتظامیہ کا کہنا ہے کہ دونوں کمپنیاں ملک کی قومی سلامتی کے لیے خطرہ ہیں اور صارفین کا ڈیٹا بھی چوری کر رہی ہیں۔

آواران میں سیکیورٹی فورسز کا آپریشن، 4 دہشت گرد ہلاک

ویب ڈیسک : سیکیورٹی فورسز نے بلوچستان کے ضلع آواران میں خفیہ اطلاعات پر آپریشن کیا ہے جس کے دوران 4 دہشت گرد ہلاک ہوئے ہیں۔

پاک فوج کے شعبۂ تعلقاتِ عامہ (آئی ایس پی آر) کے مطابق آپریشن کے دوران فائرنگ کے تبادلے کے بعد 4 دہشت گرد ہلاک ہو گئے۔

آئی ایس پی آر کا کہنا ہے کہ آپریشن کے دوران دہشت گردوں کا خفیہ ٹھکانہ، لاجسٹک بیس سمیت تباہ کر دیا گیا ہے۔

آپریشن کے دوران سیکیورٹی فورسز نے اسلحے کا بڑا ذخیرہ اور مواصلاتی آلات بھی برآمد کر لئے ہیں، جبکہ دہشت گردوں کے کئی خفیہ ٹھکانے اور انتظامی کیمپ تباہ کر دیئے گئے۔

چینی بحران: جہانگیر ترین کی ایف آئی اے کے سامنے پیش ہونے سے معذرت

ویب ڈیسک : پاکستان تحریک انصاف کے رہنما جہانگیر ترین نے ذاتی حیثیت میں وفاقی تحقیقاتی ایجنسی (ایف آئی اے) کے سامنے پیش ہونے سے معذرت کر لی۔

ایف آئی اے کی جانب سے شوگر اسکینڈل میں تحقیقات کے لیے جہانگیر ترین اور ان کے بیٹے علی ترین کو تمام دستاویزات سمیت طلب کیا گیا تھا۔

گزشتہ روز علی ترین نے ایف آئی اے کو بتایا کہ والد کی تیمارداری کے لیے لندن میں موجود ہوں اور ایف آئی اے کے سوالات کا جواب دینے کے لیے وقت درکار ہے۔

اب جہانگیر ترین نے بھی ایف آئی اے کو اپنا تحریری جواب جمع کرا دیا ہے جس میں کہا گیاہے کہ  اس وقت لندن میں زیر علاج ہوں، ذاتی طور پر ایف آئی اے کے سامنے پیش نہیں ہو سکتا۔

پی ٹی آئی رہنما نے ایف آئی اے کو یہ بھی لکھا کہ سوالات کے جواب کے لیے مناسب وقت درکار ہے۔

چینی بحران

رواں سال کے آغاز میں پیدا ہونے والے چینی بحران پر وفاقی تحقیقاتی ایجنسی (ایف آئی اے) کی تحقیقاتی رپورٹ میں انکشاف کیا گیا تھاکہ ملک میں چینی بحران کا سب سے زیادہ فائدہ حکمران جماعت کے اہم رہنما جہانگیر ترین نے اٹھایا، دوسرے نمبر پر وفاقی وزیر خسرو بختیار کے بھائی اور تیسرے نمبر پر حکمران اتحاد میں شامل مونس الٰہی کی کمپنیوں نے فائدہ اٹھایا۔

چینی بحران رپورٹ سامنے آنے کے بعد جہانگیر ترین نے اپنے اوپر لگے الزامات کو مسترد کیا اور وفاقی وزیر خسرو بختیار کی وزارت بھی تبدیل کر دی گئی۔

سندھ میں 21ستمبرسےاسکول کھولنےکافیصلہ موخر

وزیرتعلیم سعیدغنی نے کہا ہے کہ سندھ میں اسکول کھولنےکا فیصلہ موخرکردیا گیا ہے۔21 ستمبر سے چھٹی جماعت سےآٹھویں جماعت تک کے اسکول اب نہیں کھولے جائیں گے۔

کراچی میں وزیرتعلیم سعید غنی نے پریس کانفرنس کرتے ہوئے کہا کہ اسکول کھولنے کا فیصلہ سب سے مشکل تھا اور اسکول کھولنےسےمتعلق ملک بھرميں تشويش تھی۔ انھوں نے بتایا کہ 4دنوں میں مختلف اسکولزکادورہ کیا اور کچھ اسکولوں کو ایس او پی کی خلاف ورزی پر سیل بھی کیا گیا، سرکاری اسکولزبہترتھے،کچھ میں کوتائياں تھيں۔ انھوں نے کہا کہ شروعات میں سب نےکہاتھاکہ ایس اوپیزفالوکرینگے تاہم ایسا نہ ہوا،کسی بچےکووائرس ہوتا ہےتومزيدپھيلےگا۔

سعید غنی نے بتایا کہ دوسرےمرحلےميں کھلنےوالےاسکول نہيں کھليں گے، ان میں چھٹی ،ساتویں اور آٹھویں جماعت شامل ہے۔ ان کلاسز کو کھولنےکافیصلہ ایک ہفتے کےلیے موخر کیا گیا ہے کیوں کہ بہت سی کوتاہیاں نظر آرہی ہیں۔ انھوں نے مزید بتایا کہ کئی لاکھ ملازمين کےٹيسٹ کرنے کيلئےوقت درکارہے۔وزیرتعلیم نے دو ٹوک کہا کہ کرونا کیسزمیں اضافہ ہوا تو آگے بھی اسکول دیکھ کر کھولیں گے،اسکولوں کو نقصان ہوگا لیکن بچوں کی صحت سے نہیں کھیل سکتے۔

انھوں نے کہا کہ تعلیمی اداروں کو ہدایت دی گئی ہے کہ بغیر کسی چارجز کے اساتذہ اورعملے کے کرونا وائرس ٹیسٹ کروائے جائیں،اب تک 14544 ٹیسٹ لئے گئے،ان میں سے 3636 رپورٹس موصول ہوگئی ہیں،مزید رپورٹس آنا باقی ہیں،89 مثبت ہیں اور یہ شرح 2.4 ہے۔

انھوں نے یہ بھی کہا کہ اسکول مکمل بند نہیں کرنا چاہتے، لیکن بہت ساری خرابیاں نظر آرہی ہیں،اگرصورتحال بہتر ہوئی توچھٹی ،ساتویں اور آٹھویں کی کلاسز 28 ستمبر کو کھول دی جائیں گی۔ انھوں نے یہ واضح کیا کہ 30 ستمبر کو کھلنے والے اسکولوں سے متعلق 28 ستمبر تک صورتحال دیکھیں گے۔

انھوں نے بتایا کہ اسکول ٹرانسپورٹ ميں بھی بہت سےايشوزہيں،2.4 کرونا وائرس کے تعلیمی اداروں میں کیسز حوصلہ افزا شرح نہیں۔ سعید غنی

انسداد دہشتگردی، اسلام آباد ہائیکورٹ ترمیمی بل اور اسلام آباد وقف املاک بل پارلیمنٹ سے منظور

فنانشل ایکشن ٹاسک فورس (ایف اے ٹی ایف) کی ہدایات کی روشنی میں اہم معاملات پر قانون سازی کیلئے پارلیمنٹ کا مشترکہ اجلاس ہوا جس میں اپوزیشن کے بائیکاٹ کے باوجود  انسداد دہشت گردی تیسرا ترمیمی بل 2020، اسلام آباد ہائی کورٹ ترمیمی بل 2019  اور اسلام آباد وقف املاک بل 2020 کثرت رائے سے منظور کرلیے گئے۔

اس کے علاوہ  پارلیمنٹ کے مشترکہ اجلاس میں  پاکستان میڈیکل اینڈ ڈینٹل ترمیمی بل اور سرویئنگ اینڈ میپنگ ترمیمی بل بھی منظور کیا گیا۔  

ضمنی ایجنڈے کے تحت میڈیکل ٹرییونل بل 2019 اور اسلام آباد معذور افراد کےحقوق کا تحفظ بل 2020 بھی منظور کرلیا گیا۔

اپوزیشن کی ترامیم مسترد

پارلیمنٹ کے مشترکہ اجلاس میں انسداد منی لانڈرنگ ترمیمی بل کی منظوری کا عمل شروع ہوا تو  مشیر پارلیمانی امور بابر اعوان اور ملیکہ بخاری کی پیش کردہ شقوں کو منظور کرلیا گیا  جبکہ اپوزیشن کی تمام ترامیم مسترد کردی گئیں۔

اسپیکر اسد قیصر نے وزیر خارجہ شاہ محمودقریشی اور مشیر پارلیمانی امور کی مخالفت پر بلاول بھٹو زرداری اور اپوزیشن لیڈر شہباز شریف کو بات کرنے کی اجازت نہیں دی۔ دونوں کا مؤقف تھا کہ صرف اسی رکن کو فلور مل سکتا ہے جس نے ترمیم پیش کرنی ہو۔

آرمی چیف نے براق کومبیٹ سکلز ٹریننگ کمپلیکس کا افتتاح کردیا

آرمی چیف جنرل قمر جاوید باجوہ کی جانب سے براق کومبیٹ سکلز ٹریننگ کمپلیکس کا افتتاح کیا گیا ہے۔

پاک فوج کے شعبہ تعلقات عامہ ( آئی ایس پی آر) کے مطابق آرمی چیف جنرل قمر جاوید باجوہ کی جانب سے گوجرانوالہ کا دورہ کیا گیا ہے جہاں پر آرمی چیف جنرل قمر جاوید باجوہ نے براق کومبیٹ سکلز ٹریننگ کمپلیکس کا افتتاح کیا ہے۔

اس ضمن میں ڈی جی آئی ایس پی آر کا کہنا ہے کہ کمپلیکس کا مقصد براق کے عملے کی استعداد کو جارحانہ آپریشنز میں مزید نکھارنا ہے۔