اسٹیٹ بینک بابا گرونانک دیو جی کے 555 ویں یومِ پیدائش کے موقع پر 55 روپے کا یادگاری سکّہ جاری کرے گا۔
گرو نانک دیو جی کے 555 ویں یومِ پیدائش کے اہم موقع پر وفاقی حکومت 55 روپے مالیت کا یادگاری سکّہ جاری کر رہی ہے جو 79 فیصد پیتل اور تانبہ، 20 فیصد زنک اور ایک فیصد نکل پر مشتمل ہوگا، سکے کا قطر 30 ملی میٹر اور وزن 13.5 گرام ہوگا۔
سکّے کے سامنے کے رخ پر وسط میں بڑھتا ہوا ہلال اور پانچ نوکوں کا ابھرتا ہوا ستارہ ہے، جس کا رخ شمال مغرب کی طرف ہے۔ ستارے اور ہلال کے اوپر سکّے کے کنارے کے ساتھ ساتھ اردو میں ’’اسلامی جمہوریہ پاکستان‘‘ کے الفاظ کندہ ہیں۔
چاند کے نیچے اور گندم کی اوپر کی طرف خمیدہ دو بالیوں کے اوپرعددی صورت میں اجرا کا سال 2024 درج ہے۔ ستارے اور ہلال کے دائیں اور بائیں جانب بالترتیب سکّے کی مالیت جلی اعداد میں ’’55 ‘‘ اور اردو رسم الخط میں ’’روپیہ‘‘ تحریر ہے۔
پچھلے رخ پر وسط میں شری گرونانک دیو جی کی یادگار کی تصویر دی گئی ہے۔ یادگار کے اوپر ’’ 555th Birthday Celebrations ‘‘ اور یادگار کی عمارت کے نیچے ’’SRI GURU NANAK DEV JI ‘‘ تحریر ہے جبکہ سکے کے نچلے کنارے کے ساتھ ’’1469-2024‘‘ درج ہے جو ان کے یومِ پیدائش سے اب تک کی مدت کی عکاسی کرتا ہے۔
مملکتِ پاکستان مختلف مذہبی شناختوں کی وارث ہے۔ بابا گرونانک دیو جی، سکھ مذہب کی روایت کے بانی، اس سرزمین پر پیدا ہونے والی اُن عظیم ترین شخصیات میں سے ایک ہیں جو اب پاکستان کا حصہ ہے۔ سکھ مت ایک عالمی مذہب ہے جس کے دنیا بھر میں لاکھوں پیروکار ہیں، اور اس کے مقدس ترین مقامات پاکستان میں واقع ہیں۔
یہ سکّہ 22 نومبر 2024ء سے ایس بی پی بینکنگ سروسز کارپوریشن کے تمام فیلڈ دفاتر کے تبادلہ کاؤنٹرز کے ذریعے جاری کیا جا رہا ہے۔
