لاہور: (ویب ڈیسک) کاؤنٹر ٹیررازم ڈیپارٹمنٹ (سی ٹی ڈی) نے ڈیرہ غازی خان سے 2 دہشت گردوں کو گرفتار کر لیا، جن کے قبضہ سے بارودی مواد بھی برآمد ہوا۔
سی ٹی ڈی ترجمان کے مطابق پکڑے گئے دہشت گردوں میں سبحان اللہ الیاس اور مسعود الرحمان شامل ہیں، دہشت گردوں سے ہینڈ گرنیڈ، 1970 گرام بارودی مواد، سیفٹی فیوز، ڈیٹونیٹر، 3بال بئیرنگ کے پیکٹ اور سلوشن ٹیپ برآمد کر لی گئی۔
ترجمان کے مطابق دہشت گردوں کا تعلق کالعدم تنظیم سے ہے، دہشت گردوں کو خفیہ معلومات کے ذریعے گرفتار کیا گیا، دہشت گردوں کے خلاف مقدمہ درج کر کے تفتیش شروع کر دی گئی ہے۔

کراچی: (ویب ڈیسک) وزیر اعلیٰ سندھ سید مراد علی شاہ ضیاء محی الدین کے انتقال پر اظہار ہمدردی کیلئے اُن کے گھر پہنچ گئے، انہوں نے ورثا سے تعزیت بھی کی۔
ترجمان وزیر اعلیٰ سندھ کے مطابق مراد علی شاہ نے اس موقع پر مرحوم کے بلند درجات کیلئے دعا کی، وزیراعلیٰ سندھ نے کہا کہ ضیا محی الدین بڑی شخصیت کے مالک تھے، ایک تقریب میں ملاقات ہوئی تھی جہاں اپنی تقریر بھی سنی۔
وزیر اعلیٰ سندھ نے مزید کہا کہ ضیا محی الدین کے چاہنے والے آج دنیا بھر میں موجود ہیں، فنکار کا کوئی نعم البدل نہیں ہوتا، ایک ایک لیجنڈ فنکار اپنا مقام اور جگہ خود بناتا ہے، اب کوئی اور لیجنڈ ضرور آئیں گے لیکن ضیاء محی الدین کی جگہ کوئی نہیں لے سکتا۔

اسلام آباد: (ویب ڈیسک) پاکستان آرمی کی جانب سے ترکیہ میں زلزلہ سے متاثرہ علاقوں میں ریسکیو اینڈ ریلیف آپریشن جاری ہے۔
پاکستان آرمی کے جوانوں نے ترکیہ کے زلزلہ زدگان کی امداد میں بھرپور حصہ لیتے ہوئے 14 مختلف جگہوں پر سرچ آپریشن کر کے مزید 17 لاشیں ملبے سے نکال کر ورثاء کے حوالے کر دیں۔
پاک فوج نے مجموعی طور پر اب تک 77 جگہوں پر سرچ آپریشن کیا جن میں سے 34 جگہوں پر ریسکیو آپریشن بھی کیا گیا، پاکستان آرمی کی ریسکیو ٹیموں نے 8 لوگوں کو ملبے سے زندہ نکالا ہے۔

اسلام آباد: (ویب ڈیسک) صوبائی وزیر ناصر شاہ نے کہا کہ لوگ عمران خان کو کامیاب کرکٹر اور ناکام ترین سیاست دان کے طور پر یاد رکھیں گے۔
اسلام آباد میں میڈیا سے گفتگو کرتے ہوئے وزیر بلدیات سندھ ناصرحسین شاہ نے کہا کہ عمران خان نے آصف زرداری پر قتل کرنے کا الزام لگایا، آئی ایم ایف معاہدے کے بعد مہنگائی میں مزید اضافہ ہو گا۔
پیپلز پارٹی کے مرکزی رہنما ناصر حسین شاہ نے مزید کہا کہ آنے والے وقت میں عوام کیلئے آسانیاں پیدا ہوں گی، ہم الیکشن سے کبھی پیچھے نہیں ہٹے، پیپلز پارٹی کی الیکشن سے متعلق مشاورت جاری ہے۔
صوبائی وزیر بلدیات ناصر حسین نے کہا ریاست مدینہ میں بیٹیوں کو چھپایا نہیں جاتا تھا، عمران خان واحد وزیر اعظم جس کو آئینی طریقے سے گھر بھیجا گیا، عمران نے پہلے امریکا پر سازش کا الزام لگایا تھا۔

اسلام آباد: (ویب ڈیسک) مسلم لیگ ن کے سینئر رہنما شاہد خاقان عباسی نے کہا ہے کہ پتہ کریں کہ آئی ایم ایف کی ڈیمانڈ کیا ہے؟پھرحقیقت نظر آئے گی۔
اپنے بیان میں انہوں نے کہا کہ یہ وہی کمیٹمنٹ ہیں جو ماضی میں حکومتیں کر چکی ہیں۔
اس موقع پر صحافی نے سوال کیا کہ اسحاق ڈار کی آئی ایم ایف کیساتھ ڈیلنگ کیسی ہے؟ جس پر انہوں نے کہا کہ بالکل ویسی جیسی آپ کی صحافت ہے۔
ان کا کہنا تھا کہ پی ٹی آئی معاہدے عوام کے سامنے نہیں رکھتی تھی اور نہ ہی انہیں پورا کرتی تھی۔ پی ٹی آئی کے پورے نہ کیے جانے والے معاہدوں کی قیمت ادا کی جا رہی ہے۔
انہوں نے کہا کہ الیکشن اپنے مقررہ وقت پر ہوں گے،الیکشن کمیشن صوبائی اسمبلیوں کے انتخابات کی تاریخ کا بتائے گا،آئین کہتا ہے90 دن میں الیکشن کروائے جائیں۔