کراچی: (ویب ڈیسک) پاکستان کی سربراہی میں کراچی کے کھلے سمندر میں ہونے والی امن مشق میں 50 ممالک نے شرکت کی۔
امن مشق 2023کے سی فیز میں ملکی اور غیر ملکی بحری جنگی جہازوں نے کھلے سمندر میں مشق کی۔
پاک بحریہ نے بحری قزاقوں کے خلاف آپریشن کی مشق کی اور کھلے سمندر میں ہیوی گن فائرنگ کا مظاہرہ کیا، امن مشق میں جے ایف 17 تھنڈر، پی تھری سی اورین اور اے ٹی آر طیاروں نے فلائی پاسٹ کا مظاہرہ کیا، سی کنگ ہیلی کاپٹرز اور زولو ہیلی کاپٹرز کی جانب سے بھی فلائی پاسٹ کیا گیا۔
امن مشق میں انڈونیشیا، امریکا، اٹلی، سری لنکا اور ملائیشیا کے جہازوں اور میزائل بوٹس نے حصہ لیا۔
وائس ایڈمرل پاکستان نیوی اویس احمد بلگرامی کمانڈر پاکستان فلیٹ کا اس موقع پر کہنا تھا امن مشق 2007 میں 28 اور 2023 میں 50 ممالک شریک ہوئے، امن مشق 2023 اپنی نوعیت کی بہت بڑی بحری مشق تھی۔
اویس احمد بلگرامی کا کہنا تھا یہ مشق کسی ایک ملک کے خلاف نہیں بلکہ اس کا مقصدخطے میں امن و استحکام ہے، مشقوں کا مقصد ہر طرح کے حالات اور ماحول میں ہمہ وقت تیار رہنا بھی ہے۔

کراچی: (ویب ڈیسک) صوبائی وزیر ٹرانسپورٹ و ماس ٹرانزٹ سندھ شرجیل انعام میمن نے کراچی میں 20 فروری کو پنک بس سروس کے مزید دو روٹس کا آغاز اور روٹ ون کی فلیٹ میں بسوں میں اضافہ کا اعلان کردیا۔
تفصیلات کے مطابق انہوں نے 17 فروری سے سکھر اور 18 فروری سے حیدرآباد کے عوام کے لیے پیپلز بس سروس کا باقاعدہ آغاز کرنے کا اعلان بھی کیا ہے۔
اعلیٰ سطح اجلاس کے بعد اپنے دفتر میں پریس کانفرنس کرتے ہوئے پیپلز پنک بس سروس کے روٹ ون کی فلیٹ میں مزید بسوں کا اضافہ کیا جائے گا، پنک بس سروس روٹ ٹو پاور چورنگی نارتھ کراچی سے انڈس ہاسپٹل کورنگی براستہ ناگن چورنگی ، شفیق موڑ ، گلشن چورنگی ، جوہر موڑ ، سی او ڈی ، ڈرگ روڈ ، شارع فیصل ، شاہ فیصل کالونی ، سنگر چورنگی ، کورنگی نمبر 5 پر چلائی جائے گی۔
انہوں نے بتایا کہ اسی طرح روٹ نمبر 10 پر نمائش چورنگی ، ایم اے جناح روڈ ، زیب النساء اسٹریٹ ، میٹرو پول ، تین تلوار ، دو تلوار ، عبداللہ شاہ غازی ، ڈولمن مال ، میکڈونلڈ اور کلاک ٹاور سی ویو تک بھی پنک بس چلائی جائے گی جبکہ پنک بس سروس کے موجودہ روٹ ون پر بسوں میں اضافہ کیا جائے گاا۔
شرجیل انعام میمن نے کہا کہ پاکستان میں مہنگائی کا طوفان ہے، ملک کی معیشت پر شدید دباؤ ہے، اس صورتحال میں چیئرمین بلاول بھٹو زرداری، سابق صدر آصف علی زرداری کی ہدایات ہیں کہ ہر محکمہ میں عوام کو جتنا ریلیف دے سکتے ہیں سندھ حکومت اس پر توجہ دے گی۔
علاوہ ازیں انہوں نے کہا کہ پاکستان پیپلز پارٹی کی سندھ حکومت عالمی مالیاتی اداروں کے تعاون سے 23 اضلاع میں 22 لاکھ گھر تعمیر کر رہی ہے، کسانوں کو فی ایکڑ 5 ، 5 ہزار روپے مالی معاونت دی جا رہی ہے جبکہ آبپاشی نظام اور سڑکوں کے انفراسٹرکچر کی مرمت اور بحالی کے منصوبوں پر خصوصی توجہ دی جا رہی ہے ۔

لاہور: (ویب ڈیسک) سابق وزیراعلیٰ پنجاب چوہدری پرویز الہٰی سے تحریک انصاف کے مرکزی رہنما اور سابق وزیر دفاع پرویز خٹک نے ملاقات کی جس میں سیاسی صورتحال اور پنجاب و خیبر پختونخواہ کے انتخابات سے متعلق تبادلہ خیال کیا گیا۔
ملاقات کے دوران چوہدری پرویز الہٰی نے گفتگو کرتے ہوئے کہا کہ عدالتی فیصلے کے بعد الیکشن کی تاریخ میں تاخیر کا کوئی جواز نہیں، عدلیہ آئین کی بالادستی کے ساتھ کھڑی ہے، کسی کو آئین پامال کرنے کی اجازت نہیں دیں گے۔
چوہدری پرویز الہٰی نے کہا کہ الیکشن کمشن اپنی ذمہ داری پوری کرتے ہوئے فوری الیکشن شیڈول جاری کرے، گورنر اور الیکشن کمیشن تاریخ کے معاملے پر فٹ بال کھیلنا بند کریں، قوم سب دیکھ رہی ہے کہ پی ڈی ایم الیکشن سے کس طرح خوفزدہ ہے۔
سابق وزیر دفاع پرویز خٹک نے کہا کہ عمران خان کی مقبولیت نے حکمرانوں کی نیندیں حرام کردی ہیں، انتخاب کا شیڈول دینا الیکشن کمیشن اور گورنرز کی آئینی ذمہ داری ہے۔
پرویز خٹک نے کہا عدالتی فیصلہ آچکا ہے اب انتخاب سے بھاگنے کی کوئی کوشش کامیاب نہیں ہوگی، انتقامی کارروائیاں اور مقدمات تحریک انصاف کا راستہ نہیں روک سکتے۔