اسلام آباد: (ویب ڈیسک) پاکستان مسلم لیگ (ن) کی سینئر نائب صدر اور چیف آرگنائزر مریم نواز نے اسلام آباد ضلع کے مرکزی تنظیمی اجلاس میں ہدایات جاری کی ہیں کہ ضلع میں ممبر سازی کا عمل شروع کیا جائے۔
مریم نواز نے کہا کہ سینئر عہدیداران پارٹی کے سفیر بنیں اور پارٹی کی ممبر سازی شروع کریں، عوام تک پارٹی کا بیانیہ پہنچایا جائے۔
چیف آرگنائزر مریم نواز نے کہا کہ یونیورسٹیز میں طالب علموں کو ممبر بنایا جائے، نوجوانوں کو پارٹی میں شامل اور طلباء، خواتین اور شہریوں کو مسلم لیگ (ن) کی جانب راغب کیا جائے۔
ان کا کہنا تھا کہ لاہور میں یہ کام شروع کیا تو حیران کن نتائج ملے، لاہور میں توقعات سے بڑھ کر رسپانس ملا، ہر یونیورسٹی اور کالج میں جائیں اور طالب علموں کو شامل کریں۔
مریم نواز کا مزید کہنا تھا کہ کہ اللہ نواز شریف کو اس ملک کی ایک بار پھر قیادت کرنے کی توفیق عطا فرمائے، نواز شریف کی قیادت میں یہ ملک اس راستے پر چلے جہاں ہم دیکھنا چاہتے ہیں۔

کوہاٹ : (ویب ڈیسک) کوہاٹ میں نامعلوم شخص کی فائرنگ سے ایک خواجہ سرا جاں بحق جبکہ 2 خواجہ سرا زخمی ہوگئے۔
پولیس کےمطابق واقعہ کوہاٹ میں تھانہ صدرکی حدود جرما پل کے قریب پیش آیا ، جہاں مسلح شخص کی فائرنگ سے ایک خواجہ سرا موقع پر دم توڑ گیا جبکہ اس کے دو ساتھی زخمی ہوگئے۔
پولیس کے مطابق خواجہ سرا پروگرام سے واپس پیدل اپنےگھر جا رہے تھے ، پولیس نے لاش اور زخمیوں کو مقامی ہسپتال منتقل کردیا گیا ہے۔
پولیس کا کہنا ہے کہ واقعےکا مقدمہ درج کرکے تفتیش کا آغاز کردیا گیا ہے ۔

لاہور: (ویب ڈیسک) پاکستان تحریک انصاف (پی ٹی آئی) کی رہنما مسرت جمشید چیمہ نے کہا ہے کہ مسلم لیگ (ن) کے گھر کے بھیدی نے ووٹ کو عزت دو کے بیانیے کی ہاتھوں سے تدفین کا بتا دیا ہے۔
سماجی رابطے کی ویب سائٹ ٹوئٹر پر اپنے پیغام میں پی ٹی آئی رہنما مسرت جمشید چیمہ نے کہا کہ اب تو گھر سے مریم صفدر کے تاریک مستقبل کی پیشگوئیاں ہو رہی ہیں، وہ پی ٹی آئی کو کیا چیلنج دیں گی، رجیم چینج آپریشن کے کرداروں بارے مزید ہوشربا انکشافات بھی سامنے آئیں گے۔
انہوں نے کہا کہ معیشت وینٹی لیٹر پر ہے اور اس کے علاج کی ذمہ دار ی نیم حکیم وزیر خزانہ کے سپرد ہے، یہ اطلاعات ہیں کہ مسلم لیگ (ن) نے ہائیکورٹ کے فیصلے کو چیلنج نہ کرنے کا فیصلہ کیا ہے، اب ہمت کر کے الیکشن کمیشن سے بھی کہہ ڈالیں کہ انتخابات کی تاریخ کا اعلان کر دے۔

کراچی: (ویب ڈیسک) پاکستان پیپلز پارٹی (پی پی پی) نے پی ڈی ایم کی ضمنی انتخابات میں حصہ نہ لینے کی تجویز پر امیدواروں سے براہ راست مشاورت کا فیصلہ کر لیا۔
ذرائع کے مطابق ضمنی انتخابات کیلئے نامزد امیدواروں کی مشاورت کے بعد انتخابات میں حصہ لینے یا نہ لینے سے متعلق پیپلز پارٹی اپنا حتمی فیصلہ کرے گی۔
پاکستان پیپلزپارٹی کی قیادت سے پی ڈی ایم کے وفد کی جانب سے ضمنی انتخابات میں حصہ نہ لینے کی تجویز کے بعد مشاورت کا سلسلہ جاری ہے۔

اسلام آباد: (ویب ڈیسک) نیشنل ڈیزاسٹر مینجمنٹ اتھارٹی (این ڈی ایم اے) کی جانب سے 4.7 ٹن امدادی سامان کی ایک اور کھیپ ترکیہ روانہ کر دی گئی ہے۔
ترجمان این ڈی ایم اے نے اپنے بیان میں کہا کہ ترکیہ روانہ کئے جانے والے امدادی سامان میں 1420 کمبل اور موسم سرما کے 26 خیمے شامل ہیں۔
ان کا کہنا تھا کہ امدادی سامان پی آئی اے کی پرواز کے ذریعہ ترکیہ روانہ کیا گیا ہے۔
قبل ازیں وزیراعظم کی ہدایت پر نیشنل ڈیزاسٹر مینجمنٹ اتھارٹی (این ڈی ایم اے ) کی جانب سے ترکیہ کے زلزلہ متاثرین کیلئے 16.5 ٹن مزید امدادی کھیپ بھیجی گئی تھی۔
امدادی سامان میں فیملی سائز 250 وینٹرائزڈ خیمے شامل تھے، کھیپ اسلام آباد ائیر پورٹ سے پی آئی اے کے طیارے بوئنگ 777 کے ذریعے ترکیہ بھیجی گئی۔

گجرات: (ویب ڈیسک) امیر جماعت اسلامی سراج الحق نے کہا ہے کہ سپریم کورٹ اور نیب مکمل ناکام ہو چکے ہیں، قومی اسمبلی بے توقیر ہو چکی ہے، مرکز و صوبوں میں نگران حکومت قائم ہو جانی چاہئے، ملک میں فی الفور عام انتخاب ہونے چاہئیں۔
گجرات میں مہنگائی کیخلاف مارچ سے خطاب کرتے ہوئے سراج الحق کا کہنا تھا کہ اداروں پر اعتماد ختم ہونا ہماری بربادی کی وجہ ہے، آج پیپلزپارٹی، ن لیگ اور پی ٹی آئی کا ووٹر مایوس ہے، صرف ایک طبقہ خوشحال ہے وہ حکمران ہیں، مسائل سے نکلنے کا واحد حل اسلامی ریاست ہے، ہم عوام کی خاطر نکلے ہیں، پی ڈی ایم نے 8 ماہ میں 8 ہزار ارب قرض لیا۔
سراج الحق نے کہا کہ مرکز و صوبوں میں نگران حکومت قائم ہو جانی چاہئے، ملک میں فی الفور عام انتخاب ہونے چاہئیں، ملک کے 23 کروڑ عوام بے حد پریشان ہیں، پاکستان زرعی ملک ہے مگرآٹا نہیں، دالیں، چینی، سبزیاں مہنگی ہوگئی ہیں اس بدحالی کی بنیادی وجہ حکمران ہیں۔
امیر جماعت اسلامی کا کہنا تھا کہ سابقہ اور موجودہ حکومت نے عوام کو آئی ایم ایف کا غلام بنایا، اسٹیبلشمنٹ کو سیاست کا حصہ نہیں ہونا چاہیے، ان کے تمام تجربات ناکام ہوئے ہیں، سیاستدان ٹھیک ہو جائیں تو سب ادارے ٹھیک ہو جائیں گے، جب سیاستدان ڈی ٹریک ہو جائیں تو ادارے بھی ڈی ٹریک ہو جاتے ہیں۔

اسلام آباد: (ویب ڈیسک) صدر مملکت ڈاکٹر عارف علوی نے ایران میں انقلاب کی 44 ویں سالگرہ پر مبارکباد دیتے ہوئے کہا ہے کہ پاکستان اور ایران کے درمیان برادرانہ تعلقات لسانی، ثقافتی اور مذہبی بنیادوں پر استوار ہیں۔
ایوان صدر سے جاری اعلامیہ کے مطابق صدر مملکت نے ایران میں انقلاب اسلامی کی 44 ویں سالگرہ کے موقع پر پاکستان کی حکومت اور عوام کی جانب سے مبارکباد کا پیغام بھیجا ہے ، انہوں نے اپنے تہنیتی خط میں کہا کہ پاکستان دوطرفہ تعلقات کے تمام پہلوؤں میں ان روابط کو مزید مضبوط بنانے کے لیے پرعزم ہے۔
صدرمملکت نے آیت اللہ سید علی خامنہ ای کی صحت اور اسلامی جمہوریہ ایران کے برادر عوام کی ترقی، خوشحالی اور فلاح و بہبود کے لیے نیک تمناؤں کا بھی اظہار کیا۔