لاہور: (خبریں ڈیجیٹل) آرمی چیف اور  تاجروں میں معاشی بحالی کیلئے اہم مشاورت ہوئی جس میں جنرل عاصم منیر نے بھرپور اقدامات کی یقین دہانی کراتے ہوئے کہا کہ معاشی بحالی کیلئے ٹاسک فورسز قائم ہوں گی، منی ایکسچینجز کو ٹیکس نیٹ میں لائیں گے اور  ڈالر کے تبادلے، انٹربینک ریٹس میں شفافیت لائی جائے گی۔

لاہور چیمبر آف کامرس کا نمائندہ وفد تشویشناک کاروباری منظر اور عوام کی پریشانیوں کے حوالے سے اپنی تجاویز لیکر کور کمانڈر ہیڈ کوارٹرز گیا تھا جہاں اسپیشل انویسٹمنٹ فیسی لیٹیشن کونسل پر تفصیلی تبادلہ خیال کیا گیا۔ کور کمانڈر ہیڈ کوارٹرز  میں ہونے والی ملاقات میں وزیراعلیٰ پنجاب محسن نقوی بھی موجود تھے۔

وفد نے تجاویز دیں کہ بھاری بجلی بلوں سمیت عوامی،کاروباری مسائل حل کیے جائیں، سیاسی جماعتیں انتخابات سے قبل چارٹر آف اکانومی پر دستخط کر یں۔

سربراہ پاک فوج جنرل عاصم منیر نے اسپیشل انویسٹمنٹ فیسی لیٹیشن کونسل کے اہم کردار پر روشنی ڈالی، جس میں سعودی عرب، متحدہ عرب امارات، کویت اور دیگر ممالک سے 100ارب ڈالر تک کی خاطر خواہ سرمایہ کاری کو راغب کرنے کی صلاحیت پر زور دیا گیا۔

انہوں نے اقتصادی معاملات اور مختلف شعبوں پر توجہ مرکوز کرنے والی ٹاسک فورسز کی تشکیل کا انکشاف کیا،کاشف انور نے ٹاسک فورس کے ایجنڈے میں بزنس کمیونٹی کے نقطہ نظر کو شامل کرنے کے لیے تمام چیمبرز کے ساتھ فعال شمولیت کی سفارش کی اور بجلی کے بلوں پر انکم اور سیلز ٹیکس کی شرح میں کمی کی تجویز دی، عوام بجلی پر زیادہ ٹیکس کے بوجھ سے دوچار ہے جس سے روزمرہ کی زندگی، کاروبار اور عام لوگ متاثر ہو رہے ہیں۔

مزید برآں، کاشف انور نے فیول ایڈجسٹمنٹ چارجز کے لیے ایک عملی نقطہ نظر متعارف کرایا اور بتایا کہ موسم سرما کے مہینوں میں جب بجلی کی کھپت کم ہوتی ہے، صارفین پر مالی دباؤ کو کم کرنے کے لیے ان کی وصولی سردیوں میں کی جائے۔پاکستان کے معاشی منظر نامے میں شرح مبادلہ کے اہم کردار پر بات کرتے ہوئے۔ اس کے علاوہ انہوں نے انٹربینک اور اوپن مارکیٹ دونوں میں امریکی ڈالر کی قیمتوں پر زیادہ سے زیادہ کنٹرول کرنے پر زور دیا۔

جنرل عاصم منیر نے مثبت جواب دیتے ہوئے یقین دہانی کرائی کہ منی ایکسچینج کو ٹیکس کے دائرے میں لایا جائے گا، ڈالر کے تبادلے اور انٹربینک ریٹس میں شفافیت کو فروغ دیا جائے گا۔

صدر لاہور چیمبر نے اس بات کی بھی نشاندہی کی کہ اسٹیٹ بینک کے ریٹ اور ہنڈی کی شرح کے درمیان تفاوت اکثر ترسیلات کے معاملے میں ہنڈی چینلز کو ترجیح دینے کا باعث بنتا ہے۔

انہوں نے اس بات پر زور دیا کہ اگر یہ شرحیں ہم آہنگ ہو جائیں تو قدرتی طور پر اسٹیٹ بینک آف پاکستان (SBP) کے ذریعے ترسیلات زر آئیں گی۔کاشف انور نے کاروباری برادری اور متعلقہ حکام کے درمیان ایک بہتر اور پائیدار بات چیت کی اہمیت پر زور دیا۔

انہوں نے کاروباری شعبے کی جانب سے پیش کی جانے والی تجاویز پر ردعمل کی موجودہ کمی پر تشویش کا اظہار کیا۔

مزید برآں کاشف انور نے سیاسی جماعتوں سے متحد وابستگی پر زور دیا اور کسی بھی آئندہ انتخابات سے قبل چارٹر آف اکانومی پر دستخط کرنے کی تجویز پیش کی۔

گرے معیشت کے وجود کے بارے میں جنرل عاصم منیر کے ریمارکس پر بات کرتے ہوئے، جو مجموعی دستاویزی معیشت کا 2 سے 3 گنا ہے، کاشف انور نے ایک اختراعی طریقہ کار تجویز کیا۔

انہوں نے گرے معیشت کے شعبے کو رسمی، سفید معیشت میں منتقلی کے لیے ترغیب دینے کی سفارش کی، اس وسیع مسئلے سے نمٹنے کے لیے ایک اسٹریٹجک حل پیش کیا۔

صدر لاہور چیمبر نے کہا کہ جب تک گرے اکانومی غیر مربوط رہے گی، رسمی، سفید معیشت میں اپنا حصہ ڈالنے کے قابل نہیں رہے گی، ٹیکس بیس کی توسیع نا ممکن رہے گی۔

 اسلام آباد: نو مئی سے متعلقہ مقدمات، جوڈیشل کمپلیکس حملہ کیسز اور جعل سازی کے مقدمے میں چیئرمین پی ٹی آئی نے 9 ضمانتیں خارج کرنے کے فیصلوں کے خلاف اسلام آباد ہائی کورٹ میں درخواستیں دائر کردیں۔

چیئرمین پی ٹی آئی کی سیشن کورٹ سے چھ اور  اے ٹی سی سے تین ضمانتیں خارج ہوئیں تھیں ان کے خلاف درخواستوں پر چیف جسٹس عامر فاروق اور جسٹس طارق محمود جہانگیری نے اعتراضات دور کرنے کی ہدایت کی تھی، آج چیئرمین پی ٹی آئی کے وکلا نے رجسٹرار آفس کے اعتراضات دور کر کے درخواستیں دائر کردیں۔

چیئرمین پی ٹی آئی نے وکیل سلمان صفدر کے ذریعے ہائی کورٹ میں 9 درخواستیں دائر کیں جن میں اسٹیٹ اور مدعی مقدمہ کو فریق بنایا گیا ہے اور استدعا کی گئی ہے کہ چیئرمین پی ٹی آئی کی نو مقدمات میں ضمانتیں خارج کرنے کے فیصلے کو کالعدم قرار دیا جائے۔

ذرائع مسلم لیگ ن کا کہنا ہے کہ سابق وزیراعظم نواز شریف 15 اکتوبر کو عام پرواز کے ذریعے لندن سے روانہ ہوکر پاکستان پہنچیں گے اور وہ لاہور ایئرپورٹ پر اتریں گے۔

مسلم لیگ کے قائد اور سابق وزیراعظم نواز شریف 15 اکتوبر کو عام پرواز سے لندن سے روانہ ہوں گے اور لاہور پہنچیں گے، ان کی صاحبزادی اور پارٹی کی چیف آرگنائزر مریم نواز ان کے استقبال کے لیے تیاریوں میں مصروف ہیں۔

پارٹی ذرائع نے بتایا کہ نواز شریف نے اسلام اباد کے بجائے لاہور آنے کا فیصلہ کیا ہے، اور ان کی وطن واپسی عام پرواز سے ہوگی۔

۔(خبریں ڈیجیٹل) مسلم لیگ ن کے رہنما عطا تارڑ نے کہا ہے کہ الیکشن موخر ہوئے تو احتجاج کے لیے چیئرمین پی ٹی آئی کیساتھ بھی کھڑے ہو سکتے ہیں۔

ایک انٹرویو میں عطا تارڑ نے کہا کہ یقین ہے الیکشن آئندہ سال فروری تک ہو جائیں گے جب ان سے سوال کیا گیا کہ اگر انتخابات مذکورہ مدت سے بھی آگے بڑھے تو ن لیگ کیا کرے گی جس پر انہوں نے کہا کہ انتخابات موخر ہوئے تو مسلم لیگ ن اور پیپلز پارٹی ایک ٹرک پر ہوں گی۔

ممکنہ احتجاج میں چیئرمین تحریک انصاف کی شمولیت سے متعلق سوال پر انہوں نے کہا کہ احتجاجی تحریک میں چیئرمین پی ٹی آئی بھی ہمارے ساتھ ہو سکتے ہیں۔

۔(خبریں ڈیجیٹل) مسلم لیگ ن کے رہنما اور سابق وفاقی وزیر خواجہ آصف نے کہا ہے کہ چیئرمین پاکستان تحریک انصاف (پی ٹی آئی) پاکستان دشمن طاقتوں کے آلۂ کار ہیں۔

مسلم لیگ ن کے رہنما خواجہ آصف کا کہنا تھا وہ شخص جس نے ایک ملعون کا کیس لڑا اسے عمران خان نے وکیل رکھا، کیا چیئرمین پی ٹی آئی وکیل جیفری رابرٹس کو اپنی جیب سے فیس دےگا؟

انہوں نے کہا صیہونی اور دیگر بین الاقوامی لابیاں چیئرمین پی ٹی آئی عمران خان کو اسپانسر کر رہی ہیں، 9 مئی کے واقعے کے پیچھے بھی ان لابیوں کا ہاتھ ہے اور یہی لابیاں عالمی عدالت میں چیئرمین پی ٹی آئی کو وکیل کر کے دے رہی ہیں۔

9 مئی کے بعد سے پی ٹی آئی کے چیئرمین عمران خان سمیت پارٹی رہنماؤں پر کیس کیے گئے ہیں جو پاکستانی عدالتوں میں زیر سماعت ہیں جن میں سے بہت سے رہنماؤں کو گرفتار کیا گیا ہے تو بہت سے رہنماؤں نے پارٹی سے علیحدگی اختیار کر لی ہے۔

چیئرمین پی ٹی آئی عمران خان کو 5 اگست کو توشہ خان کیس میں گرفتار کر کے اٹک جیل منتقل کیا گیا  تھا تاہم بعد میں انہیں 19 اگست کو سائفر گمشدگی کیس میں بھی گرفتار کر لیا گیا تھا، اسلام آباد ہائیکورٹ کی جانب سے توشہ خانہ کیس میں عمران خان کی 3 سال کی سزا معطل کر دی تھی تاہم سائفر کیس میں گرفتاری کے باعث ان کی جیل سے رہائی ممکن نہ ہو سکی۔

پی ٹی آئی نے عمران خان کے خلاف مقدمات بین الاقوامی عدالتوں میں بھی لڑنے کا فیصلہ کیا اور اس حوالے سے چیئرمین پی ٹی آئی نے بیرسٹر جیفری رابرٹسن کو اپنا وکیل مقرر کیا تاہم بعد ازاں شدید دباؤ کے پیش نظر پی ٹی آئی نے جیفری رابرٹسن کی خدمات واپس کرنے کا فیصلہ کر لیا۔

۔(خبریں ڈیجیٹل) نگران وزیر اعظم انوار الحق کاکڑ کا کہنا ہے کہ رواں برس 9 مئی کو جو کچھ ملک میں ہوا وہ بغاوت اور خانہ جنگی کی جانب ایک کوشش تھی ۔

انوار الحق کاکڑ نے کہا کہ ایسا تاثر نہیں دینا چاہتے کہ 9 مئی کے ملزمان کے خلاف کوئی انتقامی کارروائی ہو رہی ہے لیکن اگر ملکی قوانین کو  پامال کرنے اور تشدد پر آمادہ جماعت کے خلاف قانون کے مطابق کارروائی نہ ہوئی تو ہم اس معاملے میں فریق نظر آئیں گے۔

اس کے علاوہ انوار الحق کاکڑ کا کہنا تھا کہ بجلی ایسا مسئلہ نہیں جس پر پہیہ جام ہڑتال کی جائے اور ہمیں اس طبقے سے بہت ہمدردی ہے جس پر بجلی بلوں کا بہت بوجھ ہے۔

انہوں نے کہا کہ  رات کو دکانیں جلد بند کرنے سے متعلق فیصلہ صوبوں کو اعتماد میں لے کر کریں گے اور فیصلے کا نفاذ جلد نظر آئے گا، بجلی معاملے پر جلدی فیصلہ نہیں کرنا چاہتے، ہم ایسا فیصلہ نہیں کرنا چاہتے جو بعد میں واپس لینا پڑے۔