ملتان: (ویب ڈیسک) الیکشن کمیشن کے دفتر میں ہنگامہ آرائی کے الزام میں پولیس نے تحریک انصاف کے رہنما ملک عامر ڈوگر سمیت 10 کارکنان جبکہ مسلم لیگ ن کے امیدوار شیخ طارق رشید اور سینیٹر رانا محمود الحسن سمیت متعدد کارکنان کو گرفتار کرلیا۔
الیکشن کمیشن میں حلقہ این اے 155 کے کاغذات نامزدگی جمع کرانے کے موقع پر مسلم لیگ ن اور تحریک انصاف کے کارکنان میں تصادم ہوا جس کے بعد الیکشن کمیشن کا دفتر میدان جنگ بنا۔ الیکشن کمیشن نے واقعے کا نوٹس لیکر ملزمان کیخلاف کارروائی کا اعلان کیا تھا جس کے بعد پولیس کی بھاری نفری نے ملک عامر ڈوگر کو انکے ڈیرے سے 10 کارکنان سمیت گرفتار کرلیا۔
پولیس کا کہنا ہے کہ ہنگامہ آرائی میں ملوث مسلم لیگ (ن) کے امیدوار شیخ طارق رشید اور کارکنوں کیخلاف بھی کارروائی کی جائے گی۔ تحریک انصاف کے رہنما عامرڈوگراوردیگرکارکنوں کو تھانہ کینٹ جبکہ ن لیگ کے امیدوار شیخ طارق رشید اورساتھیوں کو تھانہ صدرمنتقل کردیا گیا۔
پنجاب پولیس نے مسلم لیگ ن کے رہنما شیخ طارق رشید اور مقامی رہنما ملک انور علی سمیت دس کارکنان گرفتار کیا جبکہ کارکنان کی عیادت کیلیے آنے والے لیگی سینیٹر رانا محمود الحسن کو بھی پولیس نے گرفتار کر کے تھانے منتقل کردیا۔
دوسری جانب پاکستان تحریک انصاف کے جنرل سیکریٹری اسد عمر نے عامر ڈوگر اور کارکنان کی گرفتاری کی مذمت کرتے ہوئے کہا ہے کہ ’پی ٹی آئی کے سابق چیف وہپ کی گرفتار حکومت کی بڑھتی ہوئی فسطائیت کی ایک اور تازہ مثال ہے‘۔
پی ٹی آئی کے رہنما فرخ حبیب نے کہا کہ عامر ڈوگر کی گرفتاری کی شدید مذمت کرتے ہے، پی ڈی ایم اوچھے ہتھکنڈوں کا استعمال بند کرے اور عامر ڈوگر کو فوری رہا کیا جائے۔
تحریک انصاف کے کارکنوں نے ملک عامر ڈوگر اور دیگر کارکنان کی گرفتاری کیخلاف ڈیرہ اڈا چوک پر احتجاج کیا اور ٹائر نذر آتش کر کے سڑک بلا کردی۔
پی ٹی آئی کے رہنما مسرت جمشید چیمہ نے کہا کہ بڑی گرفتاریاں کرنے کے بعد ملتان پولیس بوکھلاہٹ کا شکار ہے، حکومت کی فسطائیت سے واضح ہو رہا ہے اس کے دن گنے جا چکے ہیں۔
انہوں نے کہا کہ مقدمات، تشدد اور گرفتاریوں سے ہماراعزم، حوصلہ کمزور نہیں مزید تقویت پکڑے گا، نگران حکومت کو کہاں سے چابی مل رہی ہے وہ کسی سے ڈھکا چھپا نہیں ، چیمہ انشا اللہ ظلم اور جبر کی سیاہ رات بہت جلد ختم ہونے والی ہے۔

کراچی: (ویب ڈیسک) وزیر خارجہ بلاول بھٹو زرداری نے کہا ہے کہ سیلاب متاثرین سے گھروں کا وعدہ کیا تھا وہ 3 سال کے اندر پورا کروں گا۔
کراچی میں تقریب سے خطاب کرتے ہوئے انہوں نے کہا سیلاب جیسی قدرتی آفت قیامت سے پہلے قیامت ہے، سیلاب سے 3 کروڑ سے زائد پاکستانی متاثر ہوئے، عالمی اداروں نے توقعات سے بڑھ کر مدد کی، یو این سیکرٹری جنرل کی خصوصی کوششوں کے مشکور ہیں، سیلاب متاثرہ علاقوں میں بحالی کا کام جاری ہے۔
وزیر خارجہ بلاول بھٹو زرداری نے مزید کہا کہ جہاں جہاں سیلابی پانی جمع ہوا وہاں صحت پر بھی خطرات ہیں، غریب لوگوں کو وسائل دے کر خود مختار بنانا چاہتے ہیں، سیلاب کے بعد زراعت اور دیگر بحرانوں کا سامنا ہے، سیلاب متاثرین سے کئے گئے وعدوں کی پاسداری کریں گے، بھرپور تعاون پر ورلڈ بینک کے بھی شکر گزار ہیں۔
چیئرمین پیپلز پارٹی بلاول بھٹو نے کہا پاکستان کے عوام آج تک سیلاب کے باعث مشکل میں ہیں، ہم سب کی ذمہ داری ہے کہ آگے بڑھ کر مدد کریں، ایک بار پھر بزنس کمیونٹی کا دھیان سیلاب متاثرین کی طرف لانا پڑے گا، ہم ٹوٹے ہوئے گھروں کو بنائیں گے، مالکانہ حقوق فراہم کریں گے، زراعت کے منصوبوں میں اضافہ کریں گے۔
انہوں نے مزید کہا کہ سیلاب سے تعلیمی اداروں کو بھی بڑے پیمانے پر نقصان پہنچا، پاکستان کبھی اس قسم کی مشکلات سے نہیں گزرا، ہمارے مسائل اور مشکلات بہت زیادہ ہیں، جو ہمارے سامنے امتحان اور مشکلات ہیں ان کا حل ہمارے پاس ہے، غریب طبقے کو معاشی طور پر مستحکم کرنے کیلئے اقدامات کررہے ہیں۔
وزیر خارجہ نے کہا آئی ایم ایف اور وزیر خزانہ کے درمیان مذاکرات چل رہے ہیں، ہمارا وفاق اور آئی ایم ایف سے مطالبہ ہے کہ سیلاب متاثرین کا خیال رکھیں، آئی ایم ایف کی ذمہ داری ہے کہ سیلاب متاثرین کو بھی تحفظ دلائے، امید ہے آئی ایم ایف سے بات چیت مثبت رہے گی، جو بھی ضروریات ہیں وہ پوری ہوں گی، اس وقت ملک میں بھی معاشی اور سیاسی بحران چل رہا ہے۔

لاہور: (ویب ڈیسک) چیئرمین پاکستان تحریک انصاف عمران خان نے سابق وزیر اعلیٰ پنجاب چودھری پرویز الہٰی کی رہائش گاہ پر پولیس چھاپوں کی شدید مذمت کی ہے۔
سماجی رابطے کی ویب سائٹ ٹوئٹر پر اپنے بیان میں سابق وزیر اعظم عمران خان نے کہا ہے کہ گجرات میں چودھری پرویز الہٰی کی رہائشگاہ پر پولیس کے پے در پے چھاپوں، ان کے حامیوں کے اغواء اور بلا جواز گرفتاریاں امپورٹڈ حکومت اور اس کے سرپرستوں کی جانب سے ہمارے حامیوں کو خوفزدہ کرنے کیلئے روا رکھی جانے والی ننگی فسطائیت ہے۔
عمران خان نے مزید کہا کہ محض یاد دہانی کیلئےعرض ہے کہ ہمارے دور میں شریفوں کے خلاف ہونے والی کارروائیاں اور گرفتاریاں پاناما انکشافات اور NAB کے ان مقدمات کا نتیجہ تھیں جن میں سے 95 فیصد سے زائد ہمارے حکومت میں آنے سے پہلےقائم کئےگئے، ان کے ساتھ تو قید میں بھی VIP سلوک کیا گیا، مگر ان کا ہدف NRO تھا جسے مسترد کیا گیا۔
انہوں نے کہا کہ اس کے برعکس یہ حراسگی، گرفتاریوں، زیرِحراست تشدد اور اغوا وغیرہ کو خالصتاً سیاسی انتقام کیلئےاستعمال کر رہے ہیں، انہیں یقین ہے کہ کسی بھی سطح کے انتخابات نہیں جیت سکتے چنانچہ ریاستی قوت کے ظالمانہ استعمال سے ہمیں کچلنا چاہتے ہیں، یہ اپنے عزائم میں کامیاب نہیں ہو پائیں گے کیوں کہ ان کے حربوں سے ہمارا عزم مزید پختہ ہی ہوتا ہے۔

ٹوکیو: (ویب ڈیسک) جاپانی ماہرنے انسانی چہرے اور دیگر اعضا پر کئی اہم اشیا بنائی ہیں جو ایک جانب تو دیکھنے میں بہت عجیب لگتی ہیں تو دوسری جانب عوام اس میں دلچسپی لے رہے ہیں۔
ماساتاکا شیشیدو ایک عرصے سے انسانی خدوخال جیسے بٹوے، پرس، لاکٹ، پینڈنٹ اور مہریں وغیرہ بنائی ہیں۔ یہ دیکھنے میں عجیب اور انتہائی حقیقی دکھائی دیتے ہیں۔ یہاں تک کہ پینڈنٹ پلکیں جھپکاتا ہے، انسانی انگلی کے سرے پر مہر لگائی ہے اور منہ نما بٹوہ بنایا ہے جس کے اندر انسانی دانت بھی دیکھے جاسکتے ہیں۔
اب ماساتاکا اپنے گلے میں مالا کی طرح ایک ہار پہنے رکھتے ہیں جس میں انسانی کھال کی رنگت کا ایک ایک گول پینڈنٹ پہنا ہوا ہے جس کے درمیان میں آنکھ کھلتی اور بند ہوتی ہے۔ 36 سالہ فنکار اسے ڈسکو گیند کہتے ہیں جو ایک زنجیر سے بندھی ہوئی ہے۔
انہوں نے بتایا کہ اس کی مصنوعات آرڈر پر تیار کی جاتی ہیں اور غیرمعمولی طور پر بہت مہنگی ہیں۔ اس کی وجہ یہ ہے کہ ایک پرس یا مہر کو بنانے میں دو سے تین ماہ لگ جاتے ہیں۔ اگر آپ انگلی والی یوایس بی یا مہر بنانا چاہتے ہیں تو اس کی قیمت 4500 ڈالر ہوسکتی ہے جبکہ ڈسکو بال کی قیمت 1100 ڈالر تک وصول کی جاتی ہے۔
ان کے گاہکوں میں مشہور فنکار اور شخصیات بھی شامل ہیں کیونکہ ان کی مصنوعات حقیقت سے بہت قریب دکھائی دیتی ہیں۔