لاہور: (خبریں ڈیجیٹل) وزیراعظم شہباز شریف نے کہا ہے کہ بجلی کی قیمت آئی ایم ایف کی شرط پر مجبوری میں بڑھائی، ملک میں 31 فیصد گھریلو صارفین کو سبسڈی دی گئی ہے۔

پاکستان اور آذر بائیجان کے درمیان پیٹرولیم کی صنعت میں تعاون کے معاہدے پر دستخط کی تقریب لاہور میں منعقد کی گئی جس میں وزیر اعظم شہباز شریف بطور مہمان خصوصی شریک ہوئے۔

تقریب سے خطاب کرتے ہوئے وزیر اعظم نے بجلی کی قیمت بڑھانے پر بھی بات کی، ان کا کہنا تھا کہ قیمتوں میں اضافہ غریب عوام پر نہیں پڑنے دوں گا، 31 فیصد گھریلو صارفین کو سبسڈی دی گئی ہے، 63 فیصد گھریلو صارفین پر بوجھ نہیں پڑے گا۔

انہوں نے مزید کہا کہ 200 یونٹ تک بجلی استعمال کرنے والوں پر بوجھ نہیں آئے گا، 300 یونٹ کے استعمال کرنے والوں پر کچھ اثر پڑے گا، بجلی کے نرخ مجبوراً بڑھا ئے گئے کیونکہ بجلی مہنگی کرنا آئی ایم ایف کی شرط تھی۔

پیٹرولیم کی صنعت میں تعاون کے معاہدے پر بات کرتے ہوئے انہوں نے کہا کہ معاہدے میں کلیدی کردار صدر آذربائیجان کا ہے، مصدق ملک، اسحاق ڈار کا کردار بھی بہت اہم رہا ہے۔

شہباز شریف نے کہا کہ پاکستان اور آذربائیجان دوست اور برادر ممالک ہیں، دونوں ممالک کے تعلقات میں آج اہم ترین دن ہے، معاہدے کی مدت ایک سال ہے اور اسے مزید ایک سال بڑھایا جاسکتا ہے۔

وزیراعظم کا مزید کہنا تھا کہ آذر بائیجان سے ایل این جی کا ایک جہاز ہر ماہ خریدا جائے گا، لیکن پاکستان فیصلہ کرے گا کہ مقررہ قیمت پر خریدنا ہے یا نہیں، نہ خریدنے پر پاکستان پر کوئی ہرجانہ نہیں ہو گا۔

قبل ازیں پاکستان اور آذر بائیجان کے درمیان پیٹرولیم صنعت میں تعاون کے معاہدے پر دستخط کی تقریب کا انعقاد کیا گیا، جس میں پاکستان اور آذربائیجان نے ایل این جی کی خریداری کیلئے تاریخی فریم ورک معاہدے پر دستخط کئے۔

پنجاب: (خبریں ڈیجیٹل) پنجاب کابینہ کا ہنگامی اجلاس ہوا جس میں سیلابی صورتحال کا جائزہ لیا گیا۔

تفصیلات کے مطابق نگران وزیر اطلاعات عامر میر کا کہنا ہے کہ پنجاب بھر میں سیلابی صورتحال پر ریڈ الرٹ جاری کر دیا گیا ہے۔

دریا ستلج پر واقع ڈیم 70فیصد بھر گیا ہے،مزید بارش کی صورت میں سیلاب کا خدشہ ہے۔

شاہدرہ سے 22 ہزار کیوسک کا سیلابی ریلا گزر رہا ہے ،1988کی طر ح شاہدرہ کا علاقہ ڈوب سکتا ہے۔

وزیراعلیٰ پنجاب نے کمشنرز اور ڈی سیز کو فلڈ ریلیف پلان پیش کرنے کی ہدایت کی ہے ۔

فلڈ ریلیف پلان بنایا گیا ہے،مزید بارش ہوئی تو دریا ئے راوی اور ستلج میں سیلاب آسکتا ہے۔

دریاوں کے کنارے غیر قانونی بستیاں قائم ہیں ،زیادہ غیر قانونی آبادیاں دریا کے اندر موجود ہیں۔

دریا میں موجود آبادیوں کو مانیٹر کیا جا رہا ہے ،سیلابی صورتحال میں دریا میں قائم آبادیوں کو خالی کرایا جائے گا ۔

عوام سے اپیل ہے کہ انتظامیہ کے ساتھ تعاون کریں۔

کراچی:(خبریں ڈیجیٹل) شہر قائد کے بعض علاقوں میں موبائل فون سروسز مختلف اوقات میں بند یا متاثر ہونے کی شکایات مل رہی ہیں۔

اس ضمن میں اسٹیل ٹاؤن، گلشن حدید اور جعفرطیار سوسائٹی کے رہائشی موبائل فون سروسز متاثر ہونے کی شکایات کر رہے ہیں جب کہ ملیر15، فیوچرکالونی، داؤد چورنگی اور ذکریا گوٹھ میں بھی موبائل سروس معطل ہونے کی اطلاعات ملی ہیں۔

شاہ لطیف ٹاؤن، بھٹائی آباد اور میمن گوٹھ مین مارکیٹ میں بھی موبائل فون سروس جزوی معطل ہے جب کہ پیپری اور بن قاسم ٹاؤن سمیت دیگرعلاقوں میں بھی موبائل فون سروس متاثرہونےکی شکایات کی جا رہی ہیں۔

پاکستان ٹیلی کمیونیکیشن (پی ٹی اے) کے حکام کا اس حوالے سے کہنا ہے کہ 10 محرم الحرام تک کچھ علاقوں میں موبائل فون سروس جزوی طور پر معطل رہے گی۔

پی ٹی اے حکام کے مطابق وزارت داخلہ کی ہدایت پر10 محرم الحرام تک موبائل فون سروس جزوی طور پر بند کی گئی ہے۔