لاہور: (ویب ڈیسک) سابق وزیر اعلیٰ پنجاب چودھری پرویز الہٰی سے امریکی ڈیمو کریٹ پارٹی کے سینئر رہنماء طاہر جاوید نے ملاقات کی جس میں دوطرفہ تعلقات کو فروغ دینے اور اوورسیز پاکستانیوں کے مسائل کے حل کے حوالے سے تبادلہ خیال کیا گیا۔
دونوں رہنماؤں کے درمیان امریکہ اور پاکستان کے باہمی تعلقات پر بھی گفتگو کی گئی، اس موقع پر طاہر جاوید نے کہا کہ جنرل باجوہ خاص طور پر اہم مسئلوں پر بلاتے اور مشاورت کرتے، امریکہ پاکستان میں کسی غیر آئینی کام کا حصہ نہیں بنے گا۔
چودھری پرویز الہٰی نے گفتگو کرتے ہوئے کہا کہ پاکستان اور امریکہ کے درمیان تجارت سمیت باہمی رابطے مزید موثر ہونے چاہئیں، پاکستان اس وقت معاشی بحران کا شکار ہے، مشکل کی اس کھڑی میں دوست ممالک کے ساتھ تجارت سمیت دیگر امور کو بڑھانا ہو گا۔
سابق وزیر اعلیٰ پنجاب نے مزید کہا بحران سے نکلنے کیلئے ملک میں فوری انتخابات کروائے جائیں، پاکستان میں انتخابات سے راہ فرار اختیار کی جا رہی ہے، پنجاب اور خیبر پختونخوا اسمبلیاں تحلیل ہو چکی ہیں لیکن ابھی تک انتخاب کی تاریخ نہیں دی جا رہی۔
چودھری پرویز الہٰی نے کہا انتخابات کروانے کے بجائے انتقامی مقدمات اور گرفتاریوں کا سلسلہ جاری ہے، حکومت کی توجہ اپوزیشن کے خلاف منفی ہتھکنڈوں پر مرکوز ہے، اوورسیز پاکستانی بیرون ملک ہمارا اثاثہ ہیں، بطور وزیراعلیٰ ان کے مسائل حل کرنے کی بھرپور کوشش کی۔

لاہور: (ویب ڈیسک) لاہور ہائیکورٹ نے بجلی بلوں میں فیول ایڈجسٹمنٹ چارجز کو غیر قانونی قرار دے دیا۔
عدالت نے گھریلو صارفین کو 5 سو یونٹس تک سبسڈی دینے کا حکم دے دیا، عدالت نے وفاقی حکومت کو متبادل ذرائع سے بجلی پیدا کرنے کی بھی ہدایت کر دی۔
جسٹس علی باقر نجفی نے اظہر صدیق سمیت دیگر کی درخواستوں پر فیصلہ سنایا۔

لاہور: (ویب ڈیسک) پاکستان تحریک انصاف کے رہنما عمر سرفراز چیمہ نے کہا ہے کہ شریف، زرداری گینگ پنجاب دشمنی پر اتر آیا ہے، 10 ماہ میں پی ڈی ایم نے صرف چوروں کو ریلیف دیا۔
میڈیا سے گفتگو کرتے ہوئے انہوں نے کہا کہ عمران خان کے دور میں 6 فیصد پر معیشت گروتھ کر رہی تھی، عمران کے دور میں نئی فیکٹریاں لگ رہی تھیں، 10 ماہ بعد نااہل، نالائق ٹولے نے معیشت کو تباہ کر دیا۔
پی ٹی آئی رہنما کا کہنا تھا کہ عمران خان کی حکومت میں عوامی فلاحی منصوبے شروع کیے گئے، عمران خان نے ہر خاندان کو 10 لاکھ تک علاج کی سہولت دی، ہیلتھ کارڈ کے ذریعے غریب اپنا مفت علاج کرا سکتے ہیں۔
عمرسرفرازچیمہ نے کہا کہ چچا، بھتیجی فون پر ہیلتھ کارڈ کو بند کرنے کی باتیں کر رہے تھے، شریف، زرداری گینگ پنجاب دشمنی پر اتر آیا ہے، یہ عوامی منصوبوں کو بند کرنا چاہتے ہیں، انشا اللہ چند ہفتوں کی بات ہے اقتدار میں آکر عوامی منصوبوں کو بحال کریں گے۔
انہوں نے کہا کہ پنجاب اسمبلی کو تحلیل ہوئے 24 دن ہو چکے ہیں، پنجاب، خیبرپختونخوا کے گورنر آپس میں فٹ بال کھیلنا بند کریں، پنجاب، خیبرپختونخوا کے گورنر الیکشن کا اعلان نہ کر کے آئین شکنی کے مرتکب ہو رہے ہیں۔
عمر سرفراز چیمہ نے کہا کہ پی ٹی آئی قائدین کے خلاف جھوٹے مقدمات درج کیے جا رہے ہیں، عمران خان نے جیل بھرو تحریک کا اعلان کیا ہے، ہمیں جیلوں، گرفتاریوں سے نہیں ڈرایا جا سکتا، چند وزرا احمقانہ بیانات دینے کے بجائے اپنا ذہنی علاج کرائیں، وفاقی حکومت اس وقت بند گلی میں جا چکی ہے۔

اسلام آباد: (ویب ڈیسک) الیکشن کمیشن نے مزید 7 اراکین پارلیمنٹ و صوبائی اسمبلی کی رکنیت بحال کر دی۔
رکنیت بحال ہونے والوں میں سینیٹر اعظم سواتی، رکن قومی اسمبلی عبدالشکور شاد شامل، فرخ خان اور امیر علی شاہ جیلانی کی رکنیت بھی بحال کر دی گئی۔
الیکشن کمیشن نے رکن سندھ اسمبلی معظم علی خان، سعید احمد، رکن بلوچستان نعمت اللہ زہری کی بھی رکنیت بحال کر دی۔
واضح رہے کہ الیکشن کمیشن آف پاکستان نے رکنیت مالی گوشوارے جمع نہ کرانے پر 16 جنوری کو معطل کی تھی۔

پشاور: (ویب ڈیسک) امیر جماعت اسلامی سراج الحق نے کہا ہے کہ 8 فروری کو امن مارچ میں آئندہ کے لائحہ عمل کا اعلان کریں گے۔
پشاور میں پریس کانفرنس کرتے ہوئے سراج الحق نے کہا ہے کہ حکومت فتوؤں کی بنیاد پر نہیں چلتی، علما کرام تو ہر جمعہ کو امن قائم کرنے کی بات کرتے ہیں، اگر حکومت امن قائم نہیں کر سکتی تو پھر گھر چلی جائے، قومی میڈیا نے پشاور دھماکے کے بجائے فواد چودھری کیس کو اہمیت دی، ان کی ترجیح ایک دوسرے کو ذلیل کرنا ہے قوم کو بچانا نہیں، معیشت اور امن اسلامی نظام کے بغیرٹھیک نہیں ہو سکتی۔
امیر جماعت اسلامی نے مزید کہا کہ حکومت اگلے کسی حادثے کا انتظار نہ کرے، خیبرپختونخوا کے لوگوں میں خوف وہراس ہے، صوبے میں حکومت نام کی کوئی چیز دکھائی نہیں دے رہی، ہماری ہمدردیاں خیبرپختونخوا کی غیرت مند پولیس کے ساتھ ہیں، آج پولیس اپنے آپ کو لاوارث سمجھ رہی ہے۔
سراج الحق نے کہا کہ حکومت کو خبردارکرتا ہوں آج لوگ جلسے، جلوس کر رہے ہیں اگر حکومت، فوج نے ذمہ داری پوری نہ کی تو احتجاجی جلسے ان کے محلات تک پہنچ سکتے ہیں، ہم چاہتے ہیں حکومت اپنی ذمہ داری پورے کرے، موجودہ حکومت کے آنے کے بعد خیبرپختونخوا کے حالات خراب ہوئے ہیں، قبائلی علاقوں کے انضمام کے بعد مزید بدامنی میں اضافہ ہوا، قبائلی اپنےآپ کو لاوارث سمجھ رہے ہیں۔
انہوں نے مزید کہا کہ حکومت کی اے پی سی میں شرکت کریں گے، اے پی سی صرف نشست برخاستا نہ ہو، ہم چاہتے ہیں اے پی سی میں کوئی پلان پیش کیا جائے، اگر وفاقی حکومت امن و امان قائم نہیں کر سکتی تو پھر شہباز شریف کا عہدے پر رہنے کا کوئی حق نہیں، عوام کے صبر کا پیمانہ لبریز ہو گیا ہے، اگرعوام معطمئن نہ ہوئے تو پھر عوام کا ہاتھ ان کے گریبانوں پر ہو گا۔
امیر جماعت اسلامی نے کہا کہ خیبرپختونخوا کو محفوظ بنانے کیلئے حکومت کو پلان دیں گے، عوام اور اسٹیبلشمنٹ کے درمیان عدم اعتماد کی فضا ہے، ایک طرف مہنگائی، دوسری طرف بدامنی اور دہشت گردی ہے، افسوس وفاقی اور صوبائی حکومت عوام کے اعتماد پر پورا نہیں اتری، جب تک افغانستان کے ساتھ تعلقات بہتر نہیں ہوتے تب تک ملک میں امن قائم نہیں ہو سکتا۔
سراج الحق نے مزید کہا آپس کی لڑائیوں کی وجہ سے دہشت گرد ماحول سے فائدہ اٹھا رہے ہیں، پورے ملک میں بدامنی، بے یقینی کی صورتحال ہے، نیشنل ایکشن پلان کا کوئی مثبت نتیجہ نہیں نکلا، ہمارے وزیر خارجہ نے دنیا کا دورہ کیا لیکن افغانستان نہیں گئے۔