کراچی: (ویب ڈیسک) پی ٹی آئی سندھ کے صدر حلیم عادل شیخ نے میئر کراچی کے الیکشن میں پارٹی ہدایات پر عمل نہ کرنیوالے بلدیاتی نمائندوں کو پارٹی سے نکالنے کا نوٹیفکیشن جاری کر دیا ہے۔
اس حوالے سے جاری ہونے والے نوٹیفکیشن کے مطابق نکالے گئے نمائندوں میں صدر ٹاؤن کے علی رضا، کورنگی ٹاؤن کے سلمان خان، صدر ٹاؤن یوسی ون کے چیئرمین عمران پروانی اور مورو میر بحر ٹاؤن کے عبدالمجید شامل ہیں۔
اورنگی ٹاؤن یوسی 5 کے چیئرمین ملک اختر اور یوسی 7 مومن آباد کے محمد ادریس کو بھی پارٹی سے نکال دیا گیا ہے۔
حلیم عادل شیخ کا کہنا ہے کہ جوابات اطمینان بخش نہیں اور ایک جیسے اسٹیریو ٹائپ ہیں۔
واضح رہے کہ گزشتہ روز بھی پی ٹی آئی نے میئر کراچی کے الیکشن میں پارٹی ہدایت پرعمل نہ کرنے پر 11 بلدیاتی نمائندوں کو پارٹی سے نکالا تھا۔

راولپنڈی: (ویب ڈیسک) سربراہ عوامی مسلم لیگ اور سابق وفاقی وزیر داخلہ شیخ رشید احمد نے کہا ہے کہ مودی اور جوبائیڈن کا اعلامیہ پاکستانی خارجہ پالیسی کی ناکامی ہے۔
سماجی رابطے کی ویب سائٹ ٹوئٹر پر شیخ رشید نے اپنے پیغام میں کہا کہ امریکہ بھارت اعلامیہ کے اگلے روز ہی 2 پاکستانی سویلین کو بارڈر پر شہید کیا گیا، پاکستان کو بھرپور جواب دینا چاہیے، ہمارےفوجی جوان دہشتگردوں کے خلاف روز جام شہادت نوش کر رہے ہیں اور امریکہ انڈیا اعلامیہ میں ہمیں دہشتگردی کا مرتکب ٹھہرایا گیا ہے۔
سابق وفاقی وزیر کا کہنا تھا کہ ہتھکڑیاں چادر چاردیواری کی تباہی خواتین کی تضحیک یہ ہے شریفوں کی جمہوریت، خود سیر و تفریح موج میلے پر ہیں، غریب پر 215 ارب روپے کا مزید ٹیکس لگایا جا رہا ہے، 10 روپے پٹرول پر مزید لگ رہے ہیں۔
انہوں نے کہا کہ مہنگائی، بیروزگاری، لوڈشیڈ نگ، اجناس کی قلت غریب کا مقدر ہے، ساری دنیا کو معلوم ہے یہ کرپٹ غیر مقبول اور چور دروازے سے لایا گیا قبضہ گروپ ہے، غیر مقبول حکمران جب صرف تقریروں اور تصویروں کیلئے لائے جاتے ہیں تو اقتصادی داخلہ اور خارجہ پالیسیاں تباہ و برباد ہو جاتی ہیں۔
شیخ رشید احمد کا کہنا تھا کہ یہ الیکشن میں جانے کی پوزیشن میں نہیں، عوام انہیں مانتی ہے نہ ہی دنیا انہیں تسلیم کرتی ہے، یہ عوام کے سہارےنہیں بیساکھیوں کےسہارے چل رہے ہیں، حکمرانوں کے اپنے اثاثے اپنی دولت اپنی اولاد ملک سے باہر ہیں اگر یہ اپنےاثاثےملک کے اندر لے آئیں تو ملک کےآدھے مسئلے حل اور آئی ایم ایف کا دباؤ کم ہو جائے۔
سربراہ عوامی مسلم لیگ نے مزید کہا کہ 13 مردہ پارٹیوں نے ملک کو غریب کا قبرستان بنا دیا ہے، زرداری کو میثاق معیشت سے پہلے کرپشن کا حساب دینا ہوگا، نواز شریف کے آنے یا نہ آنے سے اب سیاست میں کوئی فرق نہیں پڑے گا۔

ملتان : (ویب ڈیسک) وائس چیئرمین پاکستان تحریک انصاف شاہ محمود قریشی نے کہا ہے کہ آئی ایم ایف کو اسحاق ڈار پر اعتماد نہیں، انہیں فی الفور مستعفی ہونا چاہیے۔
ملتان میں میڈیا سے گفتگو کرتے ہوئے شاہ محمود قریشی کا کہنا تھا کہ آئی ایم ایف نے بجٹ کو مسترد کر دیا ہے، 215 ارب روپے کے مزید ٹیکسز کی نوید قوم کو سنائی گئی ہے، جس بجٹ پر ووٹنگ ہوگی وہ نیا فنانس بل ہوگا، جو پہلے ٹیکس لگے وہ اپنی جگہ موجود ہیں، اب مزید 215 ارب روپے کے ٹیکسز لگے ہیں۔
انہوں نے کہا کہ آئی ایم ایف کا اسحاق ڈار پر اعتماد نہیں ہے، وزیراعظم نے بھی ایم ڈی آئی ایم ایف کے ساتھ بات کی، مزید 215 ارب روپے کا بوجھ پاکستانیوں پر ڈالا ہے، آئی ایم ایف ریونیو ٹارگٹ سے مطمئن نہیں ہے، جو باتیں کی جا رہی ہیں وہ حقائق پر مبنی نہیں ہیں، وقتی طور پر لوگوں کا منہ بند کیا جا رہا ہے لیکن حقائق پر پردہ نہیں ڈال سکیں گے۔
رہنما پی ٹی آئی کا کہنا تھا کہ فنانس بل کو ریوائز کیا جا رہا ہے، شہروں میں 12، 12 گھنٹے کی لوڈشیڈنگ ہو رہی ہے، یہ بجٹ قوم، تاجر، کسان اور صنعتکار مسترد کر چکے ہیں، اب آئی ایم ایف نے بھی بجٹ مسترد کر دیا ہے، میری گزارش ہے اسحاق ڈار صاحب مستعفی ہوں اور کسی اور کو ذمہ داری سنبھالنے دیں۔
شاہ محمود قریشی نے کہا کہ یونان کشتی حادثہ پر بہت تکلیف ہوئی، دیکھنا چاہیے لوگ مجبور ہو کر گھر کیوں چھوڑ رہے ہیں، تیس تیس لاکھ دے کر موت کوئی خریدنے نہیں جاتا، جہاز میں پانی تک نہیں ملا، لوگ پیاسے مر گئے، اس کا تدارک ہونا چاہیے۔
وائس چیئرمین پی ٹی آئی کا مزید کہنا تھا کہ یہ کوئی نئی بلا نہیں، انسانی سمگلنگ عرصہ دراز سے ہو رہی ہے، اس کی بیخ کنی ہونی چاہیے، میں عہدوں اور ٹکٹوں کی سیاست سے بالا ہوگیا ہوں، میں اس وقت نظریے کی سیاست کر رہا ہوں اور نظریے پر قائم ہوں۔

لاہور: (ویب ڈیسک) علمائے کرام کے وفد نے جناح ہاؤس لاہور کا دورہ کیا، فوجی تنصیبات پر حملہ کرنیوالوں کو سخت سزائیں دینے کا مطالبہ کیا ہے۔
اس موقع پر علمائے کرام نے کہا کہ نو مئی کو جناح ہاؤس پر ہونے والے واقعہ کی شدید مذمت کرتے ہیں، جناح ہاؤس بابائے قوم اور پاک فوج کا گھر تھا، اس پر حملہ کرنے والے ملک دشمن عناصر ہیں۔
انہوں نے کہا کہ ہم سب یہ سمجھتے ہیں کہ افواجِ پاکستان عالمِ اسلام کی فوج ہے، پاک فوج کی بقاء میں ملک کی بقاء ہے، ناگہانی آفات میں بھی پاک فوج کا مثالی کردارہے جو ہمہ وقت عوامی خدمت کے لیے تیار رہتے ہیں، پاکستان کے محافظ صرف وہ لوگ نہیں جو وردی پہن کر کھڑے ہیں، پاکستان کا محافظ ہر محب وطن پاکستانی ہے۔
وفد کا کہنا تھا کہ افواجِ پاکستان جہاں پاکستان کا پرچم بلند رکھنے کی ضامن ہے ، وہیں افواجِ پاکستان اسلام کا پرچم بھی بلند رکھنے کی ضامن ہے، افواجِ پاکستان پر انگلی اٹھانے یا ایسا شرمناک اقدام کرنے سے پہلے یہ یاد رکھیئے گا کہ ہم پوری قوم اپنی افواج کے ساتھ کھڑے ہیں۔
علماء کرام کے وفد نے ملکی اثاثوں اور فوجی تنصیبات پر حملہ آور شرپسندوں کو قانون کے کٹہرے میں لا کر سخت سزائیں دینے کا مطالبہ بھی کیا۔

مظفرآباد: (ویب ڈیسک) آزاد کشمیر کی کابینہ میں توسیع کا فیصلہ کر لیا گیا، ارکان اسمبلی آج حلف اٹھائیں گے۔
ذرائع کے مطابق حلف برداری کی تقریب آج 3 بجے ہوگی، 27 سے زائد ارکان اسمبلی وزرائے حکومت کا حلف اٹھائیں گے، صدر آزاد کشمیر بیرسٹر سلطان محمود چودھری کابینہ اراکین سے حلف لیں گے۔
ذرائع کا کہنا ہے کہ مخصوص نشستوں پر منتخب ارکان اسمبلی کو مشیر حکومت اور معاون خصوصی بنایا جائے گا، انوارالحق گروپ، پیپلز پارٹی اور مسلم لیگ ن کے اراکین اسمبلی کو کابینہ میں شامل کیا جا رہا ہے۔

لاہور: (ویب ڈیسک) پاکستان بھر میں لوگ انتہائی گرم موسم اور بجلی کی طویل بندش کے دہرے عذاب سے دوچار ہیں، ملک بھر میں بجلی کا شارٹ فال 6 ہزار 598 میگاواٹ پر پہنچ گیا ہے۔
ذرائع پاور ڈویژن کے مطابق ملک بھر میں 8 سے 10 گھنٹے تک لوڈ شیڈنگ کی جاری ہے، بجلی کی مجموعی پیداوار 20 ہزار 402 میگاواٹ ہے، جبکہ بجلی کی طلب 27 ہزار میگاواٹ ہے۔
ذرائع پاور ڈویژن کے مطابق پن بجلی کی پیداوار 6 ہزار 200 میگاواٹ ہے، سرکاری تھرمل پاور پلانٹس 563 میگاواٹ بجلی پیدا کر رہے ہیں، جبکہ نجی شعبے کے بجلی گھروں کی پیداوار 9 ہزار میگاواٹ ہے۔
پاور ڈویژن ذرائع کا کہنا ہے کہ ونڈ پاور پلانٹس سے بجلی کی پیداوار 1 ہزار 245 میگاواٹ ہے، سولر بجلی گھروں کی پیداوار 100 میگاواٹ ہے، بگاس سے 130 میگاواٹ بجلی پیدا کی جا رہی ہے، نیوکلیئر پاور پلانٹس کی پیداوار 3 ہزار 164 میگاواٹ ہے، سسٹم اوور لوڈ اور ٹرپنگ سے کچھ علاقوں میں 12 گھنٹے سے زائد بجلی غائب ہے۔
لاہورمیں شدید گرمی اور جان لیوا حبس میں بدترین لوڈشیڈنگ کا سلسلہ جاری ہے۔
سسٹم پر لوڈ بڑھتے ہی اوور لوڈڈ ڈسٹری بیوشن ٹرانسفارمرز جواب دے گئے، سسٹم اوور لوڈ ہونے سے شہر کے مختلف علاقوں میں رات بھر بجلی غائب رہی۔
لیسکو کی بجلی کی طلب 5500 میگاواٹ سے تجاوز کر گئی ہے، لوڈ بڑھنے کے باعث ٹرانسفارمرز جلنے کے واقعات میں اضافہ ہوا، سٹاف کی کمی کے باعث شکایات کا بروقت ازالہ ممکن نہیں رہا۔
ذرائع کے مطابق شدید گرمی اور حبس میں طویل لوڈشیڈگن کے باعث بچے، بوڑھے، خواتین اور بیمار شہری شدید اذیت میں مبتلا ہیں، مختلف علاقوں میں بجلی کی طویل بندش کے باعث پانی کی بھی کمی کا سامنا ہے۔
لاہور کے علاقے مزنگ، کچا جیل روڈ، عامر ٹاون، ہربنس پورہ، شاہدرہ ٹاؤن، امامیہ کالونی کے مختلف علاقوں میں 24 گھنٹے تک بجلی بند رہی، شدید گرمی اور حبس سے شہری نڈھال ہوگئے۔

اسلام آباد: (ویب ڈیسک) صدر مملکت ڈاکٹر عارف علوی حج کی سعادت حاصل کرنے کے لیے سعودی عرب روانہ ہو گئے۔
تفصیلات کے مطابق صدرِ مملکت ڈاکٹر عارف علوی کے خاندان کے افراد بھی ان کے ہمراہ ہونگے ، صدر مملکت کی غیر موجودگی میں اب چیئرمین سینیٹ صادق سنجرانی نے قائم مقام صدر کی ذمے داریاں سنبھال لی ہیں۔
کابینہ ڈویژن نے قائم مقام صدر کا نوٹیفکیشن جاری کر دیا ہے۔

فیصل آباد: (ویب ڈیسک) ایف آئی اے کمپوزیٹ سرکل فیصل آباد نے اہم کارروائی کرتے ہوئے بدنام زمانہ انتہائی مطلوب انسانی سمگلرگرفتار کرلیا۔
ایف آئی اے حکام کے مطابق انسانی سمگلر طاہر ندیم کے خلاف 30 سے زائد مقدمات درج تھے، ملزم کیخلاف ایف آئی اے فیصل آباد سرکل میں 14 مقدمات اور 3 انکوائریاں بھی درج تھیں ۔
حکام کا کہنا ہے کہ ملزم کیخلاف فیصل آباد کے مختلف تھانوں میں فراڈ کے تحت 16 مقدمات بھی درج تھے۔
ایف آئی اے حکام کے مطابق ملزم نے متعدد شہریوں سے جعل سازی اور بیرون ملک ملازمت کے نام پر کروڑوں روپے لوٹے، ملزم شہریوں کو غیر قانونی طریقے سے یورپ، کینیڈا، جاپان و دیگر ممالک بھیجنے میں ملوث تھا ، ملزم فیصل آباد کے شہریوں سے جعل سازی اور فراڈ کرنے میں بھی ملوث رہا۔
حکام کے مطابق ماضی میں ملزم کے خلاف 6 مقدمات میں چالان میں جمع کروایا گیا تھا۔ ملزم مذکورہ مقدمات میں عدالتی مفرور بھی ڈکلیر ہوا تھا۔
ایف آئی اے حکام کے مطابق چھاپے کے دوران ملزم کے قبضے سے 25 پاکستانی پاسپورٹس، جعلی بینک مہریں برآمد کر لی گئی، ملزم سے مختلف ممالک کے جعلی ویزے، چیک بکس، اسٹاپ پیپرز اور متعدد چیکس بھی برآمد ہوئے ہیں ۔
ایف آئی اے حکام کا کہنا ہے کہ چھاپے کے نتیجے میں ملزم کے خلاف ایک اور مقدمہ درج کر لیا گیا ہے جبکہ ملزم کے دیگر ساتھیوں کی گرفتاری کے لئے چھاپے مارے جا رہے ہیں۔