اسلام آباد: (ویب ڈیسک) ڈسٹرکٹ اینڈ سیشن کورٹ اسلام آباد نے سرکاری افسران کوبغاوت پر اکسانےکےکیس میں فواد چودھری کے خلاف فرد جرم کی کارروائی مؤخرکردی۔ ڈسٹرکٹ اینڈ سیشن کورٹس اسلام آباد میں ایڈیشنل سیشن جج طاہرعباس سِپرا نے فواد چودھری کے کیس کی سماعت کی ، فوادچودھری کے وکیل فیصل چودھری عدالت کے روبرو پیش ہوئے، عدالت میں فواد چودھری نے وکیل کے ذریعے حاضری سے استثنیٰ کی درخواست دائر کردی۔ فواد چودھری کے وکیل فیصل چودھری کا کہنا تھا کہ ان کے مؤکل بیمار ہیں اس لیے آج پیش نہیں ہوسکتے، حاضری سے استثنیٰ دیاجائے۔ جج طاہر عباس سپرا کے استفسار پر وکیل فیصل چودھری نے بتایا کہ بدلتے موسم کے باعث فواد چودھری کی طبیعت ناساز ہوگئی ہے۔ جج نے ریمارکس دیے کہ فواد چودھری کو گرمی کا خاص جھٹکا تو نہیں لگا؟ فواد چودھری پر فرد جرم عائد ہوجائے تو اس کے بعد لمبی چھٹی لے سکتے ہیں،فواد چودھری اور آپ بھی اپنی صحت کاخیال رکھیں۔ ایڈیشنل سیشن جج طاہرعباس سپرا نے فواد چودھری کی درخواست استثنیٰ منظورکرلی اور انہیں آئندہ سماعت پر پیش ہونےکا حکم دے دیا۔ عدالت نے فواد چودھری کے خلاف کیس میں فرد جرم عائدکرنےکی نئی تاریخ 7 جولائی مقرر کردی۔ خیال رہے کہ فواد چودھری کو آج سیشن عدالت نے ذاتی حیثیت میں طلب کررکھاتھا، فواد چودھری پر آج فردجرم عائد ہونا تھی۔ واضح رہے کہ اس کیس میں فواد چوہدری کو 25 جنوری کو لاہور سے گرفتار کیا گیا تھا، یکم فروری کو سیشن کورٹ نے ان کو ضمانت پر رہائی کا حکم دیا تھا۔

لاہور: (ویب ڈیسک) وزیراعلیٰ بلوچستان کے کوآرڈینیٹرز نے موسیٰ خان کی قیادت میں وفد جناح ہاؤس کا دورہ کیا اور پاک فوج سے یکجہتی کا اظہار کیا۔ وفد نے مشترکہ اعلامیہ میں کہا ہے کہ ہم بلوچستان سے لاہور تمام بلوچ برادری کی طرف سے پاک فوج کے ساتھ اظہار یکجہتی کرنے آئے ہیں، 9 مئی کو جناح ہاؤس سمیت عسکری تنصیبات پر ہونیوالے حملوں کے سبب بلوچستان کا بچہ بچہ شدید غم و غصہ میں ہے اور ملک دشمن عناصر کو قانون کے کٹہرے میں دیکھنا چاہتا ہے۔ وفد نے مزید کہا ہے کہ پاک فوج پورے پاکستان کی حفاظت کی ضامن ہے، افواج پاکستان کے خلاف اُٹھنے والی کسی بھی آواز اور ہاتھ کو بلوچستان کا کوئی بھی فرد برداشت نہیں کر سکتا، ہم اپنے مال اور جانوں سمیت پاکستان اور افواجِ پاکستان کے ساتھ کھڑے ہیں، فوجی املاک پر ہونیوالے حملوں کی پرزور مذمت کرتے ہیں۔ وفد نے حکومت وقت اور عدالتوں سے فوری انصاف اور قانونی کاروائی کا مطالبہ کرتے ہوئے کہا کہ شرپسندوں و تخریب کاروں اور ان کے ماسٹر مائنڈز کو سخت سزائیں دی جائیں تاکہ مستقبل میں ایسے دل شکن واقعات وقوع پذیر نہ ہوں۔

اسلام آباد: (ویب ڈیسک) ترجمان دفتر خارجہ نے امریکہ بھارت مشترکہ بیان میں پاکستان سے متعلق مخصوص حوالہ کو غیر ضروری، یکطرفہ اور گمراہ کن قرار دیتے ہوئے کہا ہے کہ یہ سفارتی اصولوں کے منافی ہے۔ ترجمان دفتر خارجہ نے 22 جون 2023 کے امریکہ بھارت مشترکہ بیان سے متعلق سوالات کا جواب دیتے ہوئے کہا کہ ہم امریکہ اور بھارت کے مشترکہ بیان میں پاکستان سے متعلق مخصوص حوالہ کو غیر ضروری، یکطرفہ اور گمراہ کن سمجھتے ہیں، یہ حوالہ سفارتی اصولوں کے منافی ہے اور یہ سیاسی نوعیت کا ہے، ہم حیران ہیں کہ دہشت گردی کے خلاف امریکہ کے ساتھ پاکستان کے قریبی تعاون کے باوجود اسے شامل کیا گیا ہے۔ ترجمان دفتر خارجہ نے کہا کہ پاکستان نے دہشت گردی کے خلاف جنگ میں بے مثال قربانیاں دی ہیں، اپنی جانوں کے نذرانے پیش کرکے ہمارے قانون نافذ کرنے والے اداروں اور مسلح افواج نے ایک مثال قائم کی ہے، پاکستان کے عوام اس جنگ میں اصل ہیرو ہیں۔ انہوں نے کہا کہ عالمی برادری نے دہشت گردی کے خلاف جنگ میں پاکستان کی کوششوں اور قربانیوں کو بار بار تسلیم کیا ہے، اس نے طویل عرصے سے یہ نتیجہ اخذ کیا ہے کہ دہشت گردی کو مشترکہ اور تعاون پر مبنی اقدامات کے ذریعے شکست دی جا سکتی ہے، نہیں معلوم مشترکہ بیان میں کیے گئے دعوے دہشت گردی کے خلاف جنگ کے بین الاقوامی عزم کو کس طرح مضبوط کر سکتے ہیں۔ ترجمان کا کہنا تھا کہ بیان سے ظاہر ہوتا ہے کہ تعاون پر مبنی جذبہ جو دہشت گردی کی لعنت کو شکست دینے کے لیے انتہائی ضروری ہے، جغرافیائی سیاسی دلچسپیوں کی نذر کر دیا گیا ہے، بھارت ریاستی سرپرستی میں دہشت گردی کے علاوہ غیر قانونی مقبوضہ جموں و کشمیر میں کشمیریوں پر ہونے والے اپنے وحشیانہ جبر اور بھارتی اقلیتوں کے ساتھ ناروا سلوک سے توجہ ہٹانے کے لئے دہشتگردی کا استعمال کرتا ہے ، اس طرح پاکستان اور دہشت گردی کے خلاف اس کی جنگ کے بارے میں کسی قسم کے الزامات لگانا بالکل غلط ہے۔ ان کامزید کہنا تھا کہ ستم ظریفی یہ ہے کہ یہ مشترکہ بیان خطے میں کشیدگی اور عدم استحکام کے کلیدی ذرائع کو حل کرنے اور بھارتی غیر قانونی مقبوضہ جموں و کشمیر میں انسانی حقوق کی سنگین صورتحال کا نوٹس لینے میں ناکام رہا ہے، یہ بین الاقوامی ذمہ داری سے دستبردار ہونے کے مترادف ہے۔ ترجمان دفتر خارجہ نے کہا کہ بھارت کو جدید فوجی ٹیکنالوجیز کی منصوبہ بند منتقلی پر بھی پاکستان کو گہری تشویش ہے ، ایسے اقدامات خطے میں فوجی عدم توازن کو بڑھا رہے ہیں اور تزویراتی استحکام کو نقصان پہنچا رہے ہیں، ہم اپنے بین الاقوامی شراکت داروں پر زور دیتے ہیں کہ وہ جنوبی ایشیا میں امن و سلامتی کے مسائل کے بارے میں ایک جامع اور معروضی نقطہ نظر اختیار کریں اور یکطرفہ موقف کی توثیق سے گریز کریں۔

لاہور: (ویب ڈیسک) پاکستان تحریک انصاف (پی ٹی آئی) کے دور اقتدار میں وفاقی وزیر مذہبی امور رہنے والے پیر نور الحق قادری کے خلاف مقدمہ درج کر لیا گیا۔ پولیس کا کہنا ہے کہ پیر نورالحق قادری کے خلاف مقدمہ لنڈی کوتل میں درج کیا گیا ہے، سابق وفاقی وزیر کے خلاف مقدمہ جمرود کے علاقے شاکس کے رہائشی نے 22 جون کو درج کروایا۔ نور الحق قادری کے خلاف درج مقدمے میں کہا گیا ہے کہ سابق وفاقی وزیر مذہبی امور نے شہریوں کو اداروں کےخلاف اکسایا، ان کے خلاف کارروائی کی جائے۔ یاد رہے کہ 9 مئی کو پی ٹی آئی چیئرمین کی گرفتاری پر ہونے والے پرتشدد احتجاج کے بعد پاکستان تحریک انصاف کے کئی رہنماؤں کو مقدمات کا سامنا ہے جبکہ کئی رہنما پارٹی چھوڑ چکے ہیں۔

تیمر گرہ: (ویب ڈیسک) تیمرگرہ میں 9 مئی کو جلائے گئے فرنٹیئر کور پبلک سکول اینڈ کالج کو دوبارہ فعال کر دیا گیا۔ 9 مئی کو شرپسندوں نے ایف سی پبلک سکول اینڈ کالج کو مکمل جلانے کے ساتھ ضروری سامان بھی لوٹا، فرنٹیئر کور نارتھ نے سکول اور کالج کو دوبارہ فعال کرنے کیلئے ہنگامی بنیادوں پر کام شروع کیا اور قلیل مدت میں تعمیر مکمل کر کے اصل شکل میں بحال کر دیا۔ ایف سی پبلک سکول اینڈ کالج کی بحالی پر طلباء اور طالبات نے خوشی کا اظہار کیا۔ طلباء و طالبات کا کہنا ہے کہ تعلیم کو نقصان پہنچانے والے شرپسندوں کو کڑی سے کڑی سزا دینی چاہئے تاکہ وہ بچوں کے مستقبل کو نقصان نہ پہنچا سکیں۔